சீதையின் நாயகனே

                       சீதையின் நாயகனே

                                        பல்லவி

                       சீதையின் நாயகனே ஸ்ரீ ராமா

                        பேதை நான் மனமார மலரடி பணிந்தேன் 

                                      அனுபல்லவி           

                         கோதை ஆண்டாளின் திருக்கரம் பற்றிய 

                         மாதவனே மதுசூதனனே 

                                        சரணம் 

                          கீதையை ஓதி வாழும் வழி சொன்ன 
   
                          ராதையின் நாயகனே கண்ணனே கேசவா 

                           வேதங்கள் போற்றும் மாதயாநிதியே 

                            ஆதரவளித்தெனை ஆண்டருள்வாயே 

                             

                                                 

                                 








     
                 

கரம்பனூர் உத்தமன்

                               கரம்பனூர் உத்தமன் 

                                                      பல்லவி

                   உருகி மனமார உனையே துதித்தேன்

                    தருமமோ கேசவா எனை நீ சோதித்தல்

                                                  அனுபல்லவி

                     புருஷோத்தமனே கரம்பனூர் தலத்துறையும்

                     திருவின் நாயகனே கருணாகரனே

                                                   சரணம்

                       கருணை க்கடலென்றும் கலியுகக் கடவுளென்றும்

                        பெருமையுடன் பேசும் பேச்சும் பொய்யோ

                        கருமவினைப் பயனால் யான் படுந்துயர் நீக்கி

                         திருவுளமிரங்கி  ஆண்ட ருள்வாயே








     

கோகர்ண கணபதி

                                      கோகர்ண கணபதி                        

           
                                                    பல்லவி

                               ஸ்ரீ கணபதியே உனதருள்  வேண்டினேன்

                                 ஆகம வேத புராணங்கள்  போற்றும்

                                                   அனுபல்லவி

                                நாகத்தணையான்  கேசவன் மருகனே

                                சேகரன் மகனே  வாரணமுகனே

                                                     சரணம்
               
                                கோகர்ணம் பதியில் வீற்றிருப்பவனே

                                 பாகம் பிரியாள்  பார்வதி மைந்தனே

                                 ஏகதந்தனே மோதகப்பிரியனே

                                 சோகமிடர் களைந்து சுகமளிப்பவனே
   

பள்ளிகொண்டா ரங்கநாதன்

                           பள்ளிகொண்டா  ரங்கநாதன் 

                                    பல்லவி

                     ஸ்ரீ ரங்கநாதனை மனமாரத் துதித்தேன்

                     பாரெங்கும் புகழ் விளங்கும் பள்ளிகொண்டானை

                                    ம.காலம்

                      நாரதர் நான்முகன் சுகசனகாதியர்

                       மார்க்கபந்தீச்வரன்  கரம் பணிந்தேத்தும்

                                      அனுபல்லவி

                       மாறனையீன்ற  மதுசூதனனை

                        கோர அரக்கரின் குலமழித்த  கேசவனை

                                       சரணம்

                        சாரங்கபாணியாய்க் குடந்தையில் கிடந்திடும்

                        ஆராவமுதனை  அன்பர்க்கன்பனை

                         ஸ்ரீ  ரங்கநாயகி தாங்கும் திருமார்பனை

                         பாற்கடல் வாசனை ஸ்ரீமன் நாராயணனை


                       

மரகதவல்லிநாதன்

                                    மரகதவல்லிநாதன்

                                                 பல்லவி

                              மரகதவல்லிநாதன் மார்க்கபந்தீச்வரனை

                               அரவிந்தபதம் பணிந்து ஆராதனை புரிந்தேன்

                                                அனுபல்லவி

                                கரன் முரனை வதம் செய்த கேசவன் நேசனை

                                 சரவணனிடம் பாடம்  கேட்ட சர்வேஸ்வரனை

                                                      சரணம்

                                 சுரபதி ரதிபதி  கணங்களின் அதிபதி

                                 சரஸ்வதியின் பதி  ஸ்ரீ பதி  போற்றும்

                                  பரமேஸ்வரி பதி  பரம கிருபாநிதியை

                                  புரமெரித்த சிவனைக் காமேஸ்வரனை

                                 





                                       

மார்க்கபந்தீச்வரன்

                      மார்க்கபந்தீச்வரன்

                                                 பல்லவி

                          மரகதவல்லியின்  மலர்க்  கரம் பற்றிய

                           மார்க்கபந்தீச்வரன் பொற்பதம் பணிந்தேன்

                                               அனுபல்லவி

                            வரங்களை எளிதில் பக்தருக்களிப்பவன்

                             நரர்சுரர்   நான்முகன் கரம் பணிந்தேத்தும்
                     
                                                   சரணம்

                            கரங்களில் சூலமும் கபாலமுமேந்தும்

                             பரமேஸ்வரன் சிவன் கயிலை நாதன்

                             அரவிந்தனாபன் கேசவன் நேசன் 

                              சுரபதி கணபதி வணங்கிடுமீசன் 




     

குறைதீர்க்கும் கணபதி

                                               குறைதீர்க்கும் கணபதி


                                                        பல்லவி

                                குறைதீர்க்கும் குணநிதியை  குமரேசன் சோதரனை

                                 மறை போற்றும் கணபதியை மனமாரத் துதித்தேன்

                                                          அனுபல்லவி

                                 முறையாகத் துதித்திடும் பக்தருக்கெல்லாம்

                                  அறம் பொருளின்பமனைத்தையுமளிப்பவனை

                                                               சரணம்

                                   புரமெரித்த சிவனின் மகனைக் கரிமுகனை

                                   கறவைகள் மேய்த்திடும் கேசவன் மருகனை

                                   கறைபிறவிப் பிணிதீர பரகதியடைந்திட

                                   அறவோர் வணங்கிடும் ஆனைமுகத்தோனை

                                 

மரகதவல்லி

                                               மரகதவல்லி
               

                                                    பல்லவி

                             மரகதவல்லியுன் அரவிந்த பதம் பணிந்தேன்

                              கரமலர் காண்பித்தபயமளித்திடுவாய்

                                                 அனுபல்லவி

                              சுரபதி நரர்சுரர் நான்முகன் துதித்திடும்

                               பரமேஸ்வரி கௌரி விரிஞ்சிபுரம் வளர்

                                                    சரணம்

                               அரவணை துயிலும் கேசவன் சோதரி

                                புரமெரித்த பரமன் மனங்கவர் நாயகி

                                 சரவணன் கணபதி வணங்கிடும் தாயே

                                 பரகதி பெறவே உனைச்சரணடைந்தேன்

வடிவுடை அம்பிகையே

                                             வடிவுடை அம்பிகையே


                                                          பல்லவி

                                  வடிவுடை அம்பிகையே  மரகதவல்லி

                                   அடிமையெனக்கிரங்கி அருள்புரிவாயே

                                                         அனுபல்லவி

                                     கொடியிடையாளே  கேசவன் சோதரி

                                     அடிமலர் பணிந்துனை ஆராதனை புரிந்தேன்

                                                            சரணம்

                                      கொடிய அரக்கர் குலமழித்து அமரருக்கு

                                       விடிவெள்ளியாய் விளங்கும் விரிஞ்சிபுரம் தாயே

                                       அடிமுடி காணா அயனரி தேடிய

                                        ஆடியபாதனிடமமர்ந்தவளே 

சோதனை செய்தாலும்

                                          சோதனை செய்தாலும்


                                             பல்லவி

                       சோதனை செய்தாலும் வேதனையளித்தாலும்

                         மாதவனே கேசவா  நீதான் என் துணை

                                           அனுபல்லவி

                          வாதங்கள் செய்து வழக்கிடவில்லை

                            வேதனையைத் தாங்கும் மனவலியே வேண்டினேன்

                                                சரணம்

                           காதறுந்த ஊசியும் கடைவழிக்கு வாராதெனும்

                           சேதியறிந்தே உன் பாதம் துதித்தேன்

1.                  நாதனே நீதான்  என்  பிழை பொறுத்து 

                           ஆதரவளித்தெனை ஆண்டிட வேண்டும் 

இது நியாயமா

                                                    இது நியாயமா


                                                       பல்லவி

                                    இது நியாயமா  கேசவா  --  உனக்கு

                                                      அனுபல்லவி

                                    கதிகலங்க வைக்கும் துன்பங்கள் தந்து

                                     மதிமயங்கச் செய்யும் நிலையளித்தாயே

                                                            சரணம்

                                     விதியேயென்றாலும் வினைப்பயனென்றாலும்

                                     கதியென்றுன் பதி வந்து துதி செய்யும் பக்தனுக்கு

                                      இதமுடன் அருள் செய்து உதவிகள் புரியாமல்

                                       புதிராக எதிர் நின்று காட்சியளிப்பவனே

படைத்தவன் நீயே

                                              படைத்தவன் நீயே

                                                      பல்லவி

                           படைத்தவன் நீயே பரிதவிக்கச் செய்தால்

                            அடைக்கலம் எவரிடம் அடைவேன் கேசவா

                                                    அனுபல்லவி

                            மடைதிறந்த வெள்ளமென மனக்கவலையளித்து

                             விடைபெறவியலாத வினாவைத் தொடுத்தாய்

                                                        சரணம்

                             இடைக்குலத்துதித்து அவனியைக்காத்திட

                              குடைதனைக் குன்றாக ஏந்திய கண்ணனே

                              தடைகள் நீங்கி என்வாழ்வு நலம் பெற

                              கடைக்கண் வைத்தெனைக் காத்தருள்வாயே

கணப்புரத்தரசன்

                                                        கணப்புரத்தரசன்


                                                                 பல்லவி

                                கண  நேரமேனும் கடைக்கண்ணருள்  வைத்து

                                என் குறைகள் தீராயோ  கணப்புரத்துக் கருமணியே

                                                            அனுபல்லவி

                                 இணையடி நிழலே சதமெனத்  தெளிந்து

                                  வணங்கியுன்  பதம் பணிந்து   மனமாரத் துதித்தேன்

                                                              சரணம்

                                  துணை யெனத்   துதித்திடுமடியவர்க்கெல்லாம்

                                   தனம் குலம் கல்வி   அனைத்தையும ளித்திடும்

                                   தினகர  குலத்தோனே  ஸ்ரீ ரகுராமனே

                                    கணப்புரத்து நாயகியின் மனங்கவர் கேசவனே
                                               

அருமாகடமுதன்

                              அருமாகடமுதன் 

                                                 


                                                          பல்லவி


                            திருமாலே கேசவனே நீயே சோதித்தால்

                             சிறியேன் என் செய்வேன் எவரிடம் செல்வேன்

                                                         அனுபல்லவி

                             திருவடியே கதியென்றுன் தாளினைச் சரணடைந்தேன்

                             உருகி உன்னாயிரம் திருநாமமே துதித்தேன்

                                                              சரணம்

                              அருமாகடலமுதே  கருணாகரனே

                               திருவுள்ளமிரங்கி என் குறைகள் தீராயோ

                               கருணைக்கடல் நீயே கருமாமுகில்வண்ணா

                               பெருமைக்குரிய திருக்கண்ண புரத்தரசே

கதறியழைத்தேன்

                                             கதறியழைத்தேன்


                                                   பல்லவி

                      கதறியழைத்தேனே காதில் விழவில்லையா

                      உதவிட உனக்கென் மேல்  தயவில்லையா

                                                   அனுபல்லவி

                       பதறித் துடித்திடும் அடிமையெனக்கிரங்க

                        இதயத்தில் இடமில்லையா  கேசவா

                                                      சரணம்

                        சதமுந்தன் பதமென்றே கதியெனக் கிடந்தேன்
                         
                         நிதமுமுன் நாமமே பாடித் திரிந்தேன்

                         விதம் விதமாகப் பல அவதாரம் எடுத்தவனே

                          இதம் தந்தெனையே ஆட்கொள்ள வேண்டுமென

சத்தியமூர்த்தி

                                          சத்தியமூர்த்தி 

                                                     பல்லவி

                                     சித்தமிரங்காததேனோ  கேசவா

                                      நித்தமுன் திருவடி பணிந்திடும் எனக்குன்

                                                    அனுபல்லவி

                                      தத்துவமறிந்திலேன் தவமும் புரிந்திலேன்

                                       பக்தியுடன் உந்தன் நாமமே துதித்தேன்

                                                       சரணம்

                                         பித்தனும் பிரமனும் நரர்சுரரும்  நாரதரும்

                                          வித்தகரும் சுகசனகாதியரும் போற்றும்

                                          உத்தமனே  உயர்  சத்தியமூர்த்தியே

                                          மெத்தனமேனோ  ஏழை யெனக்கருள

சென்னகேசவன்

                                     சென்னகேசவன்                                     

                                                      பல்லவி                    

                                என்னிடம் சிறிதளவும் கருணை இல்லாததேன்    
       
                                பன்னக சயனனே  சென்னகேசவா

                                                     அனுபல்லவி

                                 இன்னல்களளித் தெனைப் பதப்படச் செய்தாய்

                                 அன்னை குந்தியைப் போல் ஆனந்தமே கொண்டேன்

                                                        சரணம்

                                   சின்ன வயதில் யான் செய்த பிழைகளோ

                                    முன்வினைப் பயனோ இந்நிலை எய்திட

                                    கன்னலே தேனே உன்னடியே துதித்தேன்

                                     உன்னருள் தந்தெனைக் காத்தருள்வாயே

நீலவண்ணன்

         

                                                 நீலவண்ணன் 

                                                       பல்லவி

                                  என்னைக் கைவிடல் தகுமோ  கேசவா

                                  உன்னையே அனுதினம் துதித்திடும் அடிமை

                                                       அனுபல்லவி

                                  புன்னை மரத்தடியே குழலூதி நிற்கும்

                                   கன்னலே தேனே கருநீலவண்ணனே

                                                            சரணம்

                                    பக்தியில் சிறந்த சபரியையும் விதுரரையும்
     
                                    உதாரணமாய்க் கொண்டு உனதடி பணிந்தேன்

                                    அன்னையும் தந்தையும் அகிலமனைத்தும்

                                     நீயென நம்பி  தொழுதிடும் மெய்யன்பன்

மதுசூதனன்

                                       

                                       மதுசூதனன் 

                                                    பல்லவி                  
         
                             மனமிரங்கி எனக்கருள இன்னும் என்ன தயக்கம்

                              உனதிரு பதமே தினம் துதித்தேன் கேசவா

                                                    அனுபல்லவி

                             மனதுக்கினியவனே  மதுசூதனனே

                              தினகரகுலத்தோனே  தீன தயாகரனே

                                                       சரணம்

                                   அனல் புனல் காற்று ஆகாயம் பூமி

                                   அனைத்தும் நீயே ஆராவமுதனே

                                    அனவரதமுமுன்  நாமமே போற்றும்

                                    உனதடிமை மீது கடைக்கண் வைத்து

சௌரிராஜன்

                                               

                                               சௌரிராஜன் 

                                                             பல்லவி              
   
                                   எனக்கிந்த சோதனை ஏன் கொடுத்தாய் இறைவா        
 
                                   மனமாரத் துதித்ததன்றி உனக்கென்ன குறை வைத்தேன்

                                                           அனுபல்லவி

                                   தனக்குவமையில்லாத  கண்ணபுரத்தரசே

                                   வினைப்பயனோ விதியோ சரி செய்யலாகாதா

                                                             சரணம்

                                     தினமுமுன் திருநாமம் ஆயிரமோதினேன்

                                     கனவிலும் நினைவிலும் உனையே துதித்தேன்

                                     உனதிரு கழலே நிழலெனக் கிடந்தேன்

                                      வனமாலையணிந்த அழகனே கேசவா


                   
                     

ஆதிமூலம்

 

                          ஆதிமூலம் 

                                              பல்லவி

                                  சிரிக்கச்செய்தாலும்  அழ வைத்தாலும்

                                   கிரிதரனே கேசவா நீயேயென் துணை

                                                     அனுபல்லவி

                                      மரித்தலும் பிறத்தலும்  உனதருளாலே

                                       அரி நாராயணனே  ஆதிமூலமே

                                                           சரணம்

                                         தரித்திரனாய்ச் செய்து நான் படும் பாட்டை

                                          பரிகாசம் செய்வதுன்  விளையாட்டா

                                          விரிகமல மலர் தனை  நாபியில் வைத்திருக்கும்
     
                                          பரிபூரணனே  பரிந்தருள் புரிவாய்

பாண்டுரங்க விட்டலன்

                                       பாண்டுரங்க விட்டலன் 

                                                 பல்லவி

                           உனக்கென் மீதிரக்கம்  வராததேன்

                           பண்டரீ புரத்தரசே  பாண்டுரங்க விட்டலா

                                                  அனுபல்லவி

                            உனது திருவடியே சதமெனப் பணிந்தேன்

                             வனத்திடை தோன்றிய அனந்தனே கேசவா


                                                        சரணம்

                              ஜனன மரண பயம் வாட்டிடும் பொழுது

                               உனது நாமமே மனமாரத் துதித்தேன்

                               எனது மனக்கவலை அனைத்தையும் போக்கி

                                உனதருள் தந்தெனை ஆண்டருள்வாயே

மதுராபுரிக் கண்ணன்

                     மதுராபுரிக் கண்ணன் 

                                              பல்லவி

                         எதற்கிந்த சோதனை எனக்களித்தாய்  கேசவனே

                          சதமுந்தன் பதமென்று நம்பியே உனைத் துதித்தேன்

                                                     அனுபல்லவி

                           வதம் புரிந்தரக்கர்கள் குலமழித்தவனே

                            முதலும் முடிவுமில்லாத  மாயவனே

                                                        சரணம்

                               யது குலத்துதித்த  மதுசூதனனே

                                மதுராபுரியரசே கண்ணபெருமானே

                                சதுமறையும் சதுர் முகனும் போற்றும் நாராயணனே
   
                                 துதித்திடும் உனதடிமை எனைக் காத்தருள்வாய்




     

நாவாய் முகுந்தன்

                                   நாவாய் முகுந்தன் 

           
                                                 பல்லவி    

                              நீயே அருள் தர மறுத்தால் கேசவனே

                              நாயே னுக்கிவ்வுலகில் வேறு புகலேது

                                                 அனுபல்லவி

                               தாயும் தந்தையும் நீயேயன்றோ

                               சேயெனைக் காப்பதுன்றன் கடனல்லவோ

                                                    சரணம்

                                 ஆயர் குலத்துதித்த வேணுகோபாலனே

                                  தேயாத புகழ் மேவும் திருநாவாய் முகுந்தனே

                                  நோயெனும் பவவினையால் யான்படுந்த்துயரங்கள்

                                   மாயமாய் மறைந்திட  மலரடி பணிந்தேன்

அத்தி முகன்

                               அத்தி முகன் 

                                                       பல்லவி        
                      
                                     சித்தி விநாயகனை  புத்தியிலுறைபவனை

                                     சித்தத்திலிருத்தி  நித்தமும் துதித்தேன்

                                                     அனுபல்லவி

                                     உத்தமிப் புதல்வனை மத்தள வயிற்றனை

                                     வித்தகர் போற்றும்  கேசவன் மருகனை

                                                         சரணம்

                                      சுத்தி வந்து பெற்றோரே உலகென உணர்த்திய

                                      அத்திமுகப் பெருமானை ஆனைமுகத்தோனை                               

                                     முத்தமிழ் கலைகளை ரசித்திடும் கரிமுகனை
                                     
                                      எத்திசையும் புகழ் விளங்கும் மகா கணபதியை 

வாட்டாற்றுக் கேசவன்

                     வாட்டாற்றுக் கேசவன் 

                                               பல்லவி 

                               கேட்டதும்   கேட்டதையளித்திடும் கேசவா  - உன் 

                                திருவடி நிழலில் தங்கிடும் வரமருள்வாய் 

                                                 அனுபல்லவி 

                                வீட்டையடைய விரும்பியே உனைத் துதித்தேன் 

                                 வாட்டாற்றில் பள்ளி கொண்ட  ஆதிகேசவா 

                                                      சரணம் 

                                  திருமகளுக்கிணையாக திருமார்பிலிடம் வேண்டேன் 

                                   கருடனினிடமான வாகனத்தைக் கேட்கவில்லை 

                                  அரவணையாய் விளங்கும் அனந்தனிடம் போட்டியில்லை 

                                   திருவடியருகினிலோரிடமே  வேண்டினேன் 

திருப்பேரை மகரநெடுங்குழைக்காதன்

                                திருப்பேரை  மகரநெடுங்குழைக்காதன் 

                                                 பல்லவி

                               பிழையென்ன செய்தேன் அழகனே கேசவா

                                சோதனையளித்து  வேதனையேன் கொடுத்தாய்

                                                 அனுபல்லவி

                                  குழையணிந்த மகர நெடுங்குழைக் காதனே

                                   திருப்பேரை  தலத்துறையும் நீலமுகில்வண்ணனே

                                                     சரணம்

                                   அழையாத விருந்தாளியாகவே கவலை

                                   நுழைந்தென்றன் உள்ளத்தில் பிணியாகச் சேர்ந்ததே

                                    மழையாகக் கருணை பொழிந்திடும் கேசவா

                                    விரைந்துன்றன் கடைக்கண்ணருள்தந்து காத்தருள்

காவளம்பாடிக் கண்ணன்

                     காவளம்பாடிக் கண்ணன் 

                                                பல்லவி

                           பாமாலை புனைந்து பாடும் ஏழையெனக்கு

                            ஏமாற்றம் வேதனை ஏன் கொடுத்தாய் கேசவனே

                                               அனுபல்லவி

                            பாமா ருக்மிணியுடன் காவளம்பாடியில்

                             க்ஷேமமாய் வீற்றிருக்கும் கோபால கிருஷ்ணனே

                                                   சரணம்

                             சீமான் செல்வந்தனோ நானில்லையென்று

                              சாமானியன் என்னை அலட்சியம் செய்தாய்

                              பூமாலை பொன்மாலை வனமாலையணிந்த

                              கோமானே மனமிரங்கி எனக்குள் புரிவாய்

மோதகப்பிரியன்

                             மோதகப்பிரியன் 

                                                 பல்லவி

                                வேதனை வினை தீர்க்கும் விக்ன விநாயகனை

                                 மாதொருபாகன் மகனைப் பணிந்தேன்

                                                   அனுபல்லவி

                                  சீதக் கடல் துயில் கேசவன் மருகனை

                                  ஆதவனொளியையும் மிஞ்சும் தேசுடையவனை

                                                       சரணம்

                                   வேத சாத்திர புராணங்கள் கொண்டாடும்

                                    பூத கணங்களின் தலைவனைக் கரிமுகனை 

                                    மோதகப்பிரியனை வேழமுகத்தோனை 

                                     பூதலம் போற்றும் ஆனைமுகத்தோனை 




            

ஸ்ரீ பெரும்புதூர் கணபதி

                       ஸ்ரீ பெரும்புதூர் கணபதி 

 
                                                        பல்லவி                      

                         திருப்பெரும் புதூரென்னும் திருத்தலத்தில் கோயில் கொண்ட                

                          அருட்கடலை கணபதியை உளமாரத் துதித்தேன்


                                                  அனுபல்லவி

                              வருமிடர் களைந்திடும்  வாரண முகனை

                               கருநிற வண்ணன் கேசவன்  மருகனை

                                                       சரணம்            
                               
                               அருகம் பில்லும் எருக்கு  மாலையும்
   
                                 விரும்பி ஏற்றிடும்  விக்ன விநாயகனை
                               
                                 உருகும் மெழுகென உள்ளம் கரைந்து

                                 திருவடி  சரணமே  கதியெனப் பணிந்து

ஸ்ரீ சுதாவல்லி

 

                                                ஸ்ரீ சுதாவல்லி
         
                                                      பல்லவி

                                    அருள் தருமன்னை ஸ்ரீ சுதாவல்லியை

                                     மகாலட்சுமியை மனமாரத்துதித்தேன்

                                                     அனுபல்லவி

                                      திருமால் கேசவன் மணிமார்பில் வீற்றிருக்கும்

                                      திருமகளை அலைமகளை கருணைக் கடலை

                                                            சரணம்

                                      பொருள் புகழ் போகமனைத்தையுமளித்திடும்

                                      பெருமைமிகு நிலமகளை  சமுத்திர குமாரியை

                                      இருவினைப் பயன்களால் படுந்துயர் நீக்கி

                                      இருள் சூழென் வாழ்வு  ஒளியுற வேண்டுமென

அதிசய ஆனை முகன்

                       அதிசய ஆனை முகன் 

                                               பல்லவி

                                 அதிசயமான வடிவுடையவனை

                                 மதியணிந்தவனை   கணபதியை துதித்தேன்
                                         
                                             அனுபல்லவி              
           
                                 புதிய கருமங்கள் தொடங்கும் முன்னனைவரும்          

                                  துதித்திடும்  கரிமுகனை கேசவன் மருகனை                          
                                           
                                                சரணம்
                                  
                                   கதியென வணங்கி  பணிந்திடுமடியார்கள் 

                                   விதியையும் மாற்றும் வல்லமை படைத்தவனை 
                                                                  
                                    ரதிபதியை எரித்த முக்கண்ணன் மகனை

                                    சதுர் மறைகள்  போற்றும் விக்ன விநாயகனை

                               

                         






     

கணநாயகன்

                                  கணநாயகன் 

                                                            பல்லவி 

                                 துணை புரிந்தருள்வாய் கணநாயகா உன் 

                                 இணையடி நிழலே என்றுமெந்தன் துணை 

                                                          அனுபல்லவி 

                                 வணங்கிடுமடியார்க்கு  நலன்களை அளிப்பதில் 

                                 இணையுனக்காருளார்  கேசவன் மருகனே 

                                                               சரணம் 

                                  பிணங்கிய குறமகள் வள்ளியை முருகன் 

                                  மணந்திட உதவிய  விக்ன விநாயகா 

                                  கணங்களின் அதிபதியே ஆனைமுகத்தோனே        

                                  அணைத்தெனையாண்டருள  இதுவே தருணம் 

படித்ததில் பிடிக்காதது

            படித்ததில் பிடிக்காதது
             ******************

           வண்ணப் பெண்ணின் வர்ணனை

           அவளிடத்து அவன் காதல்
         
            அவனிடத்து அவன் காதல்

             விரகம் காமம் சோகம் விரக்தி

             வார்த்தை  ஜாலம்  ஓசை நயம்

              இடையிடையே வசன நடை

               புரியாத புதிர்  விடுகதை

                தத்துவம்  நடுவே போதனை

                 மொத்தத்தில்

                  இந்தக் கவிதை எனக்குப் பிடிக்கவில்லை


             
           
           

கார்த்திகேயன் சோதரன்

                                     கார்த்திகேயன் சோதரன் 

                                                 பல்லவி 

                             மூர்த்தி  சிறிதான  வடிவுடைய  கணபதியை 

                             கீர்த்தியில் சிறந்தவனை மனமாரத்துதித்தேன் 

                                                       அனுபல்லவி 

                              வார்த்தையிலடங்காத பேரெழிலழகனை 

                              கார்த்திகேயன் தமையனைக் கரிமுகனை 

                                                        சரணம் 

                              ஆர்த்தெழுந்த  கயமுகனை அழித்தவனை 

                               பார்த்தசாரதி கேசவன் மருகனை 

                               ஊர்த்வ  தாண்டவம்  ஆடிடும் சிவன் மகனை 

                                பார்த்தவர் பரவசிக்கும்  ஆனைமுகத்தோனை 

      

                                

                                

சக்தி கணபதி

                                       

                             சக்தி கணபதி 

                                                          பல்லவி

                                சக்தி கணபதியை நெஞ்சாரத் துதித்தேன்

                                முக்தியளித்திட அவனருள் வேண்டி

                                                         அனுபல்லவி

                                 அக்கினி வைத்த நெற்றிக் கண்ணனும்

                                  சக்தியும் மடிவைத்துக் கொஞ்சிடும் மகனை                                
                               
                                                               சரணம்

                                முக்கிய கருமங்கள் தொடங்கும் முன்னனைவரும்

                                 பத்தியுடன் தினம் உளமுருகிப் பணிந்திடும்
                                 
                                 விக்ன விநாயகனை  கேசவன் மருகனை 
                             
                                 நெக்குருகிப் பணிந்து மலரிட்டுத் தொழுது

இந்தியா

   இந்தியா



    ஆங்கிலேய  மாது

      சென்னை  கடைத்தெருவில்

       பஞ்சாப் சீக்கியரிடம்

        டெல்லி மோடா இரண்டை

          இந்தியில் பேரம் செய்து

            அமெரிக்க டாலர் கொடுத்து

             வாங்கினார்   

திருமண் காப்பு

                                திருமண்  காப்பு 

                                                                 

                                                               பல்லவி 

                                  கருணை பொழிந்திடும்   கேசவனையனுதினம் 

                                  அருள் வேண்டி நினைந்திடவே அணிந்தேன் திருக்காப்பு 

                                                              சமஷ்டி சரணம் 

                                                                           

                                   திருமாலின் அவதாரப் பெருமைகளைப் பாடி 

                                   வருகின்ற ஆனந்தக் கண்ணீரால் நனைந்தந்த 

                                   பெருமைமிகு அடியார்கள் திருப்பாதம் தோய்ந்த 

                                   திருமண்ணே என்றுமென் நெற்றிக்குத் திருக்காப்பு 

                                    

                                    

                                    

                                   

மகா பாரத கணபதி

மகா பாரத கணபதி

பல்லவி

பாரதமெழுத வியாசருக்குதவிய
மகாபாரதகணபதியைத்துதித்தேன்

அனுபல்லவி

மாரனும் வியக்கும் பேரெழிலழகனை
கார்முகில்வண்ணன் கேசவன் மருகனை

சரணம்

கோரின வரம் தரும் கௌரிசுதனை
பூரணம் நிறைந்த மோதகப்பிரியனை
பாரினிலனனைவரும் முதல் வணங்கும் கரிமுகனை
காரமர் மேனியனை  ஆனைமுகத்தோனை

ஸ்ரீ மகா கணபதி

                                                ஸ்ரீ மகா கணபதி


                                                      பல்லவி

                                நிதம் துதித்தேன் ஸ்ரீ மகா கணபதியை 

                               இதயத் தாமரையிலெழுந்தருள  வேண்டுமென

                                                      அனுபல்லவி

                                  மதவாரணமுகனைக்   கேசவன் மருகனை

                                  சிதம்பர நாதன் மகனை   கணநாதனை

                                                           சரணம்

                                   பதம் பணிந்தோர்க்கருளும் தீன தயாபரனை

                                   கதம்ப மலர்மாலை  மணிமாலையணிந்தவனை
     
                                    இதமுடனிடர் துயர் களைந்திடும் கரிமுகனை
                                 
                                    சதமவன் திருவடி நிழலெனத் துணிந்து







                                 


                             

பகவத் விநாயகன்

                              பகவத் விநாயகன் 

                                                                  பல்லவி

                              கருணை மாகடலை மகா கணபதியை
                              இருவினைப் பயன் தொலைய வேண்டுமெனத் துதித்தேன்

                                                                அனுபல்லவி

                              பெருமைக்குரிய பகவத் விநாயகனை
                              கருமாமுகில் வண்ணன் கேசவன் மருகனை

                                                                    சரணம்
                                   
                               விருப்பமுடன் பணியும் அடியவர்க்கெல்லாம்
                               விரும்பும் வரமளிக்கும் முருக சோதரனை
                                வருமிடர் களைந்திடும்  வாரண முகனை
                                தருமம் தழைத்திடும் குடந்தையில் வீற்றிருக்கும்