தேனினும்…..
பல்லவி
தேனினும் தெளிவான சிவபெருமானே
மான் மழு தாங்கிய மங்கலமூர்த்தியே
அனுபல்லவி
கானுறை முனிவரும் கேசவனும் பிரமனும்
வானுறை இந்திரனும் அமரரும் பணிந்தேத்தும்
சரணம்
தானெனும் மாயையின் பிடியிலகப்பட்டு
ஊனுடம்பும் புலன்களும் தன் வழி செல்லால்
தேனு புரீசனே தடுத்தாட் கொண்டு
தீனனெனக்கருள வேண்டுமெனத் துதித்தேன்
அதிசயமானவளே….
பல்லவி
அதிசயமானவளே அகிலாண்டேச்வரியே
துதித்தேன் உனதிரு கமல பதங்களையே
துரிதம்
ரதிபதி,சுரபதி, சரச்வதியின்பதி
பசுபதி,கணபதி, தேவ சேனாபதி
நிதிகளின் அதிபதி, கதிரவன்,முழுமதி,
துதித்திடும் பதங்களின் அதிபதியே தேவி
அனுபல்லவி
விதியையும் மாற்றும் வல்லமை படைத்தவளே
எதிலும் இயங்கும் இயற்கையே மாயே
சரணம்
மதுரையில் அரசாளும் மீனாக்ஷியே
பதி காசியில் விளங்கும் விசாலாக்ஷியே
மதியணிந்தவளே காஞ்சி காமாக்ஷியே
கதி நீயே தாயே கேசவன் சோதரியே
பாகம்பிரியாளே…..
பல்லவி
பாகம்பிரியாளே உன் பாதம் பணிந்தேன்
மோகினி வடிவெடுத்த கேசவன் சோதரியே
அனுபல்லவி
ஏகாம்ப்ரேச்வரரின் மனங்கவர்ந்தவளே
மூக கவிக்கு அருள் தந்த ஈச்வரியே
சரணம்
வேகமுடனடியார்க்கருள் தர வருபவளே
யோகமாயையே பக்தரைக் காப்பவளே
நாகாபரணனின் இடப்பாகம மர்ந்தவளே
சாகசங்கள் பல புரிந்து திருவெற்றியூரில் நின்ற
காளிகாம்பாளுன்…..
பல்லவி
காளிகாம்பாளுன் தாளினைப் பணிந்தேன்
வாளினையொத்த கூர் விழியுடைவளே
அனுபல்லவி
கோளினைப் படைத்தவளே கேசவன் சோதரியே
கேளிக்கையாகவே மூவுலகும் ஆள்பவளே
சரணம்
மாளிகை வாழ்வும் மணி முடியும் செல்வமும்
ஆளும் அரச போகமும் பதவியும் வேண்டேன்
நீலத்திரைகடலோரத்தில் நிலைத்திருப்பவளே
நாளுமுன் கழலடி நிழலொன்றே போதும்
मातः क्षणं स्नपय मां तव वीक्षितेन
मन्दाक्षितेन सुजनैरपरोक्षितेन ।
कामाक्षि कर्मतिमिरोत्करभास्करेण
श्रेयस्करेण मधुपद्युतितस्करेण ॥
மாத: க்ஷணம் ஸ்னபய மாம் தவ வீக்ஷிதேன
மந்தாக்ஷிதேன ஸுஜனை ரபரோக்ஷிதேன |
காமாக்ஷி கர்ம திமிரோத்கர பாஸ்கரேண
ச்ரேயஸ்கரேண மதுபத்யுதி தஸ்கரேண ||
-மூகபஞ்சதசி
‘மாத:’ - அம்மா ‘
க்ஷணம் ஸ்நபய மாம் தவ வீக்ஷிதேன’- உன்னுடைய கடாக்ஷத்துனால என்னை ஒரு க்ஷணம், நனைப்பாயாக, ‘ஸுஜனைரபரோக்ஷிதேன’ - உன்னுடைய கடாக்ஷம் புண்யசாலிகளால் தரிசிக்கப் பட்டது. ‘ மந்தாக்ஷிதேன’ - மந்தமா சலிச்சிண்டு இருக்கு. ‘காமாக்ஷி கர்ம திமிரோத்கர பாஸ்கரேண’ - என்னுடைய வினைகள் என்ற இருளைப் போக்கும் பாஸ்கரனாக, ஸூரியனாக உன்னுடைய கடாக்ஷம் இருக்கு. ‘ஸ்ரேயஸ் கரேண’ - எல்லா க்ஷேமமும் கொடுக்கக்கூடியது. ‘மதுபத்யுதி தஸ்கரேன’ - மதுபஹன்னா வண்டு. அந்த வண்டினுடைய ஒளியை உன்னுடைய கண்கள் அபகரிக்கிறதுன்னு சொல்றார். அதாவது கண்கள் வண்டு மாதிரி இருக்குங்கறதை சொல்றார். தாயே உன்னுடைய கடாக்ஷம் புண்யசாலிகளால் தரிசிக்கப் பட்டது. மந்தமா சலிச்சிண்டு இருக்கின்ற என்னுடைய வினைகள் என்ற இருளைப் போக்கும் பாஸ்கரனாக, ஸூர்யனாக, எல்லா க்ஷேமமும் கொடுக்கக்கூடியது உன்னுடைய கடாக்ஷம். வண்டு மாதிரி இருக்கின்ற உன்னுடைய கடாக்ஷம் எனும் வர்ஷத்தினால் என்னை ஒரு க்ஷணமேனும் நனைத்து உன்னருளை தர வேண்டும் அம்மா.
கண நேரமேனும்….
பல்லவி
கண நேரமேனும் நீ கண்டாலும் போதும்
காமாக்ஷி தேவியுன் மலரடி பணிந்தேன்
அனுபல்லவி
வணக்கத்துக்குரியவளே கேசவன் சோதரி
தணலேந்தும் நெற்றிக்கண் கொண்ட ஈச்வரி
சரணம்
பணிந்திடுமடியாரை கடைக்கண்ணால் காண்பவளே
குணமுடன் இருளை நீ்க்கிடும் சூரியனைப்போல்
வணங்கிடுமெனது பவ வினைப் பயன் தொலைய
அணங்கே உன் கருவண்டுக் கண்களாலெனையே
உனையே துணையென….
பல்லவி
உனையே துணையென நம்பினேனே ராமா
எனை இனியாட்கொள்ள இன்னுமென்ன தயக்கம்
அனுபல்லவி
நினைவிலும் கனவிலும் உன்னையே நினைத்தேன்
அனவரதமுமுன் நாமமே துதித்தேன்
சரணம்
வனம் சென்று தந்தையின் சொல்காத்த தனயனே
ஜனகனின் மகளை மணந்த ரகுவரனே
சனகாதியோரமரரிந்திரன் பணிந்திடும்
வனமாலை கௌத்துபமணிந்த கேசவனே
வினைப் பயனால் நான் படுந்துயரங்கள்
அனைத்தும் நீங்கிட கோதண்ட ராமனே
உனையன்றி வேறு யார் இப்புவியில் உள்ளார்
தினகர குலத்துத்தித்த ஶ்ரீ ரகு ராமா
ஓ ஜகந்நாதனே….
பல்லவி
ஓ ஜகந்நாதனே உனையே துதித்தேன்
மா ஜகந்நாயகியை மார்பினில் வைத்திருக்கும்
அனுபல்லவி
தேஜோ மயமானவனே திருமாலே கேசவனே
பூஜிக்குமடியாரை காத்தருள் புரிபவனே
சரணம்
உலகில் சிறந்த தேர் வலம் காணும்
தலங்களில் சிறந்த பூரி மாநகர் தனில்
பலபத்திரரும் சுபத்திரையுமுடனிருந்து
நலமுடன் கோயில் கொண்டு அழகுறக் காட்சி தரும்
மோகன ராமா….
பல்லவி
மோகன ராமா
உனையே துதித்தேன்
அனுபல்லவி
சாகசங்கள் பல புரிந்த
சாகேத ராமனே
சரணம்
ஆகமங்கள் அருமறைகள்
போற்றுகின்ற கேசவனே
நாகத்தணை பாற்கடல் கிடக்கும்
நாராயணன் நீயே ஆண்டருள்வாயே
சக்தியின் வனப்பு...
பத்துவிரல் மோதிரம் எத்தனை பிரகாசமது
பாடகம் தண்டை கொலுசும்,
பச்சை வைடூரியம் இச்சையா இழைத்திட்ட
பாதச் சிலம்பினொலியும்
முத்து மூக்குத்தியும் ரத்தினப் பதக்கமும்
மோகன மாலை வரி அழகும்,
முழுதும் வைடூரியம் புஷ்பரா கத்தினால்
முடிந்திட்ட தாலி அழகும்,
சுத்தமாயிருக்கின்ற காதினிற்
வைர கம்மலும்
செங்கையிற் நாக கங்கணமும்
ஜெகமெலாம் விலைபெற்ற முகத்தழகை
பெருக்கும் கூர்நாசியின் சிறப்பும் பெற்ற
மஹா விஷ்ணுவின் தங்கை சக்தி சிவரூபத்தை
அடியனாற் சொல்ல திறமோ
அழகான கருவிலியில் புகழாக வாழ்ந்திடும்
அம்மை ஸர்வாங்க சுந்தரி உமையே.
உத்தமியே….
பல்லவி
உத்தமியே கருவேலி சர்வாங்க சுந்தரியே
நித்தமுனைப் பணிந்தேன் எனக்கருள் புரிவாய்
அனுபல்லவி
சத்தியகிரி நாதன் கேசவன் சோதரியே
எத்திசையும் புகழ் விளங்க அழகுடன் வாழ்ந்திடும்
சரணங்கள்
முத்தும் மாணிக்கமும் ரத்தினமும் பதித்த
பத்து விரல் மோதிரங்கள் அணிந்த பேரழகியே
நத்தணிந்த நாசியில் மூக்குத்தி மின்ன
சித்தும் வெள்ளிக்கொலுசும் பளபளக்க
பத்தரை மாற்று பசும் பொன்னில் அழகுடன்
மெத்தப் பளபளக்கும் புஷ்பராகம் வைடூரியம்
பதித்த மங்கலத் திருமாங்கல்யத்துடனே
நித்திய சுமங்கலியாய் வலம் வரும் பத்தினியே
முத்தாரம் மாலைகளணிந்த சங்குக் கழுத்தும்
சிற்றிடையில் அழகுடன் தங்க ஒட்டியாணமும்
சுத்தமான கரங்களில் நாக கங்கணமும்
சத்தம் கேட்கும் செவிகளில் வைரத் தாடங்கமும்
நெத்திக்கு மேலழகு பிறைச்சந்திரனும்
நெத்திச்சுட்டியும் வட்ட வடிவப் பொட்டும்
முத்துப் பல்லழகும் கொவ்வைச் செவ்வாயும்
அத்தனைக்கும் முத்தாய்ப்பாய்ப் பட்டுடையும் தரித்தவளே
தேவ தேவனை…..
பல்லவி
தேவ தேவனை ஶ்ரீ ராமனை
ராவணாதியரை அழித்தவனைத் துதித்தேன்
அனுபல்லவி
காவலாய் நின்று முனிவர்கள் வேள்வியை
ஆவலுடன் காத்தவனை ஆதி கேசவனை
சரணம்
தேவி ஜானகியின் மனங்கவர்ந்த நாயகனை
மாவிடை வாகனன் போற்றும் மாதவனை
மாவலியின் கர்வம் தீர்த்த மதுசூதனனை
பூவிதழ் தூவி மலர்ப் பதம் பணிந்து
கோவிந்தனாய் வந்து திருமலையில் நின்றவனை
கூவியழைத்த கரிக்கும் காரிகைக்கும்
தாவி வந்து அபயம் அளித்த தாமோதரனை
கோவர்த்தனமலையைக் குடையாகப் பிடித்தவனை
சேவடி பணிந்தோரின் நலம் காக்கும் உத்தமனை
ஆவினங்கள் மேய்த்தவனை ஆய்ப்பாடிக் கண்ணனை
மூவாசைப் பிணி போக்கி முன் வினைப் பயன் நீக்கும்
காவளம்பாடி வளர் கோபாலகிருஷ்ணனை
கருணை தந்தெனையே…..
பல்லவி
கருணை தந்தெனையே காத்தருள்வாயே
அரு மறைகள் போற்றும் திருமயிலைக் கற்பகமே
அனுபல்லவி
கருநீலவண்ணன் கேசவன் சோதரி
அருகிருக்கும் கபாலியின் மனங்கவர் நாயகியே
சரணம்
குருவி தலையில் பனங்காயை வைத்தது போல்
இருவினைப் பயன்களை என் தலையில் வைத்தாயே
இருகரம் கூப்பி மனமாரத் துதித்தேன்
பெரும் பிணி பவக்கடல் கடந்திட எனக்குன்
சகலமும் நீயே….
பல்லவி
சகலமும் நீயே சாம்பசிவா
அகிலம் காக்கும் சதாசிவா
அனுபல்லவி
முகமைந்துடைய அழகு சிவா
மகாதேவனே சிவலிங்க சிவா
சரணம்
இகபர சுகம் தரும் ஈசனே சிவா
மகாகணபதியை படைத்த சிவா
குகனெனும் முருகனை அளித்த சிவா
சுகம் தரும் கேசவன் நேசனே சிவா
அகிலாண்டேச்வரி நாயகனே சிவா
சுக சனகாதியர் வணங்கும் சிவா
மகபதி தேவர்கள் பணியும் சிவா
சகம் புகழும் புண்ணிய மூர்த்தி சிவா
சுகபாணி போற்றும் ஈசனே சிவா
பகைவரும் பணிந்திடும் பரமசிவா
ககனமும் புவனமும் போற்றும் சிவா
அகணித குணகண அமுத சிவா
தகனம் திரிபுரம் செய்த சிவா
மகனிடம் மறைபொருள் பயின்ற சிவா
சுகந்தரும் காமனை எரித்த சிவா
அகந்தையை அழித்திடும் ஆதி சிவா
சுகந்த குங்கும மணிந்த சிவா
பகலவனொருகோடி ஒளிதரும் சிவா
இகழ்ந்த தட்சணையழித்தசிவா
உகந்தென் பவப்பிணித் தீர்ப்பாய் சிவா
பகீரதியைச் சூடிய சிவா
மகேசனெனும் பெயர் கொண்ட சிவா
முகத்தில் பிறையணிந்த தேவனே சிவா
அகம் குளிர அனைவரும் வணங்கும் சிவா
மகிடனை மாய்த்த சக்தி சிவா
மகாதேவியும் நீயே சிவா
சகலரும் வணங்கிடும் ஈசனே சிவா
புகலிடம் நீயெனப் பணிந்தேன் சிவா
ஸ்ரீ மீனாக்ஷீ பஞ்சரத்னம் (Meenakshi Pancharatnam) பாடல் வரிகள் மற்றும் பாடல் பொருளுடன் இந்த பதிவில் உள்ளது…
1.உத்யத்பானுஸஹஸ்ரகோடி ஸத்ருசாம் கேயூரஹாரோஜ்வலாம்
பிம்போஷ்டீம் ஸ்மிததந்த பங்க்திருசிராம் பீதாம்பராலங்க்ருதாம் I
விஷ்ணு ப்ரஹ்மஸுநேந்திர ஸேவிதபதாம் தத்வஸ்வரூபாம் சிவாம்
மீனாக்ஷீம் ப்ரணதோsஸ்மி ஸந்ததமஹம் காருண்யவாராம் நிதிம் II
ஆயிரம் ஆயிரம் சூர்யர்கள் உதித்ததுபோல் இருப்பவளும், தோள்வாளை, முக்தாஹாரம் இவற்றையணிந்தவளும், கோவைப்பழம் போன்ற உதடும், சுத்த வெள்ளை புன்முறுவல், பீதாம்பரம் இவற்றால் அழகியவளும், விஷ்ணு, பிரம்மா, இந்த்ரன் இவர்கள் ஸேவிக்கும் தத்வஸ்வரூபமுள்ள, மங்கள கருணைக் கடலை, ஸ்ரீ மீனாக்ஷியை நமஸ்கரிக்கிறேன்.
2.முக்தாஹார லஸத்கிரீட ருச்ராம் பூர்ணேந்து வக்த்ர ப்ரபாம்
சிஞ்ஜந்நூபுர கிங்கிணீ மணிதராம் பத்மப்ரபா பாஸுராம் I
ஸர்வாபீஷ்ட பலப்ரதாம் கிரிஸுதாம் வாணீ ரமாஸேவிதாம்
மீனாக்ஷீம் ப்ரணதோsஸ்மிஸந்தமஹம் காருண்யவாராம் நிதிம் II
முத்துமாலையும், கிரீடமும் அணிந்து பூர்ண சந்திரன் போன்ற முகப்பொலிவுடன் விளங்குகிறாள் மீனாக்ஷி. ஒளிக்கின்ற காற் சதங்கை மணிகளைக் கொண்டவளாய், தாமரை மலரையத்த ப்ரபையுடனும் இருக்கிறாள். அனைவரின் விருப்பத்தையும் நிறைவேற்றி, ஸரஸ்வதீ-லக்ஷ்மீ தேவியரால் சேவிக்கப்பட்டும், கருணைக்கடலாயும் மிளிர்கின்ற ஸ்ரீமீனாக்ஷியை நமஸ்கரிக்கிறேன்.
3.ஸ்ரீவித்யாம் சிவவாமபாக நிலயாம் ஹ்ரீங்கார மந்த்ரோஜ்வலாம்
ஸ்ரீசக்ராங்கித பிந்துமத்யவஸதிம் ஸ்ரீமத்ஸபாநாயகீம்
ஸ்ரீமத் ஷண்முக விக்னராஜ ஜனனீம் ஸ்ரீமத் ஜகன்மோஹினீம்
மீனாக்ஷீம் ப்ரணதோsஸ்மிஸந்தமஹம் காருண்யவாராம் நிதிம் II
ஸ்ரீவித்யையாகவும், சிவனின் இடது பாகத்தில் ஹ்ரீம் என்ற மந்த்ரத்தால் பிரகாசிப்பவளாயும், ஸ்ரீ சக்ரத்தில் பிந்து நடுவே வசிப்பவளாயும், ஸபாநாயகியாகவும், ஸ்ரீ ஷண்முகர், கணபதி ஆகியோரின் மாதாவாகவும், ஜகத்தை ஆகர்ஷிப்பவளாயும். கருணைக் கடலாயுமுள்ள ஸ்ரீமீனாக்ஷியை நமஸ்கரிக்கிறேன்.
4.ஸ்ரீமத் ஸுந்தரநாயகீம் பயஹராம் ஜ்ஞானப்ரதாம் நிர்மலாம்
ச்யாமாபாம் கமலாஸனார்சிதபதாம் நாராயணஸ்யானுஜாம் I
வீணாவேணு ம்ருதங்கவாத்ய ரஸிகாம் நாநாவிதா டம்பிகாம்
மீனாக்ஷீம் ப்ரணதோsஸ்மிஸந்தமஹம் காருண்யவாராம் நிதிம் II
பயத்தைப் போக்கி ஜ்யானத்தையளிக்கும் நித்யசுத்த அழகம்மையாக கரிய திருமேனியுடன் காட்சி தருகிறாள். அவள் பிரம்மன் போற்றும் திருவடியுடையவள். ஸ்ரீ நாராயணரின் ஸஹோதர். வீணை, புல்லாங்குழல், மிருதங்கம் முதலிய வாத்யங்களை ரஸிப்பவள், பற்பல ஆடம்பரம் உடையவள். அந்த கருணைக்கடலான மீனாக்ஷியை நமஸ்கரிக்கிறேன்.
5.நாநாயோகி முனீந்த்ரஹ்ருந்நிவஸதிம் நாநார்த்தஸித்தி ப்ரதாம்
நாநாபுஷ்ப விராஜிதாங்க்ரியுகலாம் நாராயணே நார்சிதாம் I
நாதப்ரஹ்ம மயீம் பராத்பரதராம் நாநார்த்தத்வாத்மிகாம்
மீனாக்ஷீம் ப்ரணதோsஸ்மிஸந்தமஹம் காருண்யவாராம் நிதிம் II
பற்பல யோகிகள் முனிவர்கள் ஆகியோரின் ஹ்ருதயத்தில் குடிகொண்டு பற்பல ஸித்தியருளுபவள். பலவித புஷ்பங்களால் திருவடியில் பூஜிக்கப்பட்டவள். ஸ்ரீ நாராயணரின் போற்றுதலுக்குறியவள். நாதப்ரஹ்மமானவள். பரத்திற்கும் பரமானவள். தத்ஸ்ரூபிணியுமானவள். அந்த மீனாக்ஷியை நமஸ்கரிக்கிறேன்.
மீனாக்ஷி தேவியின்….
பல்லவி.
மீனாக்ஷி தேவியின் பாதம் பணிந்தேன்
தேனார் மொழியாள் கருணைக் கடலெனும்
அனுபல்லவி
வானுறை தேவரும் சுகசனகாதியரும்
பானுவும் மதியும் யாவரும் வணங்கிடும்
சரணங்கள்
முத்துமாலை தோள்வளை பீதாம்பரமணிந்து
முத்துப் பற்களும் கோவைச்செவ்விதழுடனும்
எத்திசையும் ஒளிதரும் கோடி சூர்யத் தேசுடனே
பத்மநாபன் கேசவன் பிரமனிந்திரன் வணங்கும் ….( மீனாக்ஷி ….)
பூரண சந்திரன் போல் முகப்பொலிவுடையவள்
கிரீடம் காற்சலங்கை மணிமாலையணிந்தவள்
சரச்வதி திருமகளனைவரும் பணிந்தேத்தும்
அரவிந்த மலரொத்த கழலடி உடைய ……( மீனாக்ஷி…..)
ஶ்ரீ சக்கரம் நடுவிலழகுடன் அமர்ந்தவள்
ஈசனிடப்புறத்தில் மந்திரப் பொருளாயிருந்து
நேசமுடன் கணபதி முருகன் தாயாகவும்
பாசமுடனுலகை அரவணைத்துக் காக்கும்…..( மீனாக்ஷி …..)
அச்சம்தனைப் போக்கி ஞானமளிப்பவள்
மெச்சுமழகுடையவள் கரிய நிறம் கொண்டவள்
அச்சுதன் சோதரி ஆடம்பரப்பிரியை
யாழிசை மத்தளம் குழலிசை விரும்பும்….( மீனாக்ஷி…..)
முனிவர்கள் யோகியர் மனங்களிலிருப்பவள்
தனிக்கருணை தந்து நலன்களையளிப்பவள்
இனிய மலர் தூவி துதிக்கப்படுபவள்
கனிவுடன் மால் போற்றும் பரம்பொருளான…..( மீனாக்ஷி ….)
