பாதாம்புஜம் பணிந்தேன்

                                           பாதாம்புஜம் பணிந்தேன்




                                                 பல்லவி

                                     பாதாம்புஜம் பணிந்தேன் கேசவா
                                     ஆதாரம் நீயே அகிலமனைத்திற்கும்

                                               அனுபல்லவி

                                     வேதாகமங்கள் சாத்திரங்கள் போற்றும்
                                     பாதா சகலலோக நாதா காத்தருள்வாய்

                                                    சரணம்

                                      நீதான் கதியென்றே நம்பியுனைத் துதித்தேன்
                                      மாதா மகாலக்ஷ்மி மனங்கவர் மாதவனே
                                      கீதோபதேசம்தனை உலகிற்களித்தவனே
                                      யாதவகுல திலகா ஶ்ரீவாசுதேவா

சிதம்பரநாதன்

                                        சிதம்பரநாதன்


                                             பல்லவி

                            வெட்டவெளியாய் ஆகாசமாய் விளங்கும்
                            சட்டநாதனை சிதம்பரத்தைத் துதித்தேன்

                                           அனுபல்லவி

                            அட்டதிக்பாலகரும் பிரமனும் தேவரும்
                            நந்தியும் கணங்களும் வணங்கிடும் ஈசனை

                                              சரணம்

                            வட்டநிலாவின் ஒருகலையணிந்தவனை
                            பிட்டுக்கு மண் சுமந்து பிரம்படி பட்டவனை
                            அட்ட மூர்த்தியைக் கேசவன் நேசனை
                            மட்டவிழ் மலர் தூவிப் பாதம் பணிந்து
                 
                                             

தாள் பணிந்தேன் தயாநிதே

                                  தாள் பணிந்தேன் தயாநிதே



                                             பல்லவி

                               தாள் பணிந்தேன் தயாநிதே
                               நாள்தொறும் உளமார உருகித்துதித்து

                                          அனுபல்லவி

                               மாள்வதும் பிறப்பதும் இல்லாத நிலையளித்து
                               தோள்கொடுத்தெனையே காத்தருள்வாயே

                                               சரணம்

 

                               வேள்விகள் செய்திடும் வேதியரும் முனிவரும்

                               கோள்களும் தேவரும் பிரமனும் வணங்கிடும்

                               தாமரைப்பாதனே ்பாற்கடல்வாசனே

                               ஆள்வதுன் தர்மம் ஆதிகேசவா

மாதவமுரளி கேசவா

       
                                       மாதவமுரளி கேசவா


                                                  பல்லவி

                                      மாதவ முரளி கேசவா
                                      நீதான் எந்தன்துணை என்றென்றும்

                                                அனுபல்லவி

                                      பாதம் பணிந்தேன் ஶ்ரீபத்மநாபா
                                      சாதாரணரும் சான்றோரும் துதித்திடும்

                                                    சரணம்

                                      வேதங்கள் போற்றும் யாதவனே
                                      கீதையின் நாயகனே ராதையின் கண்ணனே
                                      ஶ்ரீதேவி அன்னையை மணிமார்பில் தாங்கும்
                                      ஶ்ரீதரனே என்னை ஆண்டருள்வாய்

இஷ்டசித்தி கணபதி

                                       இஷ்டசித்தி கணபதி


                                                   பல்லவி

                          இடர்கள் களைந்திடும் இஷ்டசித்தி கணபதியே
                          அப்பமோடவல்பொரி அளித்துனைப் பணிந்தேன்

                                                 அனுபல்லவி

                           தொடர்ந்திடும் பவப்பிணி பழவினைப்பயன்கள்
                           தொலைந்திட வேண்டுமென அடியவன் கேசவன்

                                                     சரணம்

                            குடம் குடமாய்ப் பால் அபிஷேகம் செய்தாலும்
                            நடையாய் நடந்துனை வலம் வந்தாலும்
                            அடுத்தவரைக்கெடுத்து தீச்செயல் புரிந்திடும்
                            அடங்கா மனிதருக்கு உந்தன் துணை ஏது

சந்திரசூடன்

                                              சந்திரசூடன்


                                                    பல்லவி

                                 சந்திரனைச்சூடிய சாம்பசதாசிவனை
                                 வந்தனை புரிந்து சந்ததம் துதித்தேன்

                                                   அனுபல்லவி

                                  நந்தியும் கணங்களும் இந்த்ராதி தேவரும்
                                  பிரமனும் முனிவரும் அனைவரும் போற்றும்

                                                         சரணம்
                                 
                                  கந்தன் கணபதி வணங்கிடும் தந்தையை
                                  வெந்தழலேந்திடும் நெற்றிக்கண்ணனை
                                  அந்தமுமாதியும் இல்லாத ஈசனை
                                   உந்திகமலன் கேசவன் நேசனை
                                  

அச்சுதன்

                                   அச்சுதன்


                                      பல்லவி

                       அச்சுதானந்த கேசவா உனை
                       மெச்சியே பணிந்தேன் எனக்கருள் புரிவாய்

                                    அனுபல்லவி

                       நச்சரவணையில் பள்ளிகொண்டிருக்கும்
                       நாராயணா ஶ்ரீ தாமோதரா

                                         சரணம்

                       துச்சமாய் லட்சங்கள் வாரிக்கொடுத்தாலும்
                       அச்சுவெல்லப்பாயாசம் படையல் செய்தாலும்
                       இச்சகம் பேசி இழிச்செயல் புரிந்திடும்
                       பிச்சி மாந்தருக்கு உன்னருளேது

திருமலைவாசா கோவிந்தா

                             திருமலைவாசா கோவிந்தா



                                            பல்லவி

                         மலர்ப்பதம் பணிந்தேன் கோவிந்தா
                         தலங்களுள் சிறந்த திருமலையிலமர்ந்தவுன்

                                         அனுபல்லவி

                         அலமேலுமங்கையின் மலர்க்கரம் பற்றிய
                         கேசவனே என்னை இனிதாட்கொள்ளென

                                               சரணம்

                         பலப்பல பிறவி எடுத்தே சலித்தேன்
                         நலன் தரும் செயல்கள் எதுவும் செய்யாமல்
                         உலகில் வாழ்நாளை வீணே கழித்தேன்
                         கலங்கி மனம் வருந்தி உனைச்சரண்டைந்து

கமலக்கண்ணன்

                                       கமலக்கண்ணன்



                                             பல்லவி

                              கமலவனம் போல் காட்சியளித்திடும்
                              கமலநாபனை முகுந்தனைத் துதித்தேன்

                                            அனுபல்லவி

                              கமலவல்லியை மார்பினில் வைத்திருக்கும்
                              கமலக்கண்ணனை நீலவண்ணனை

                                                சரணம்

                             கமலத்திருமுகம் கமலச்செம்பவளவாய்
 .                           கமலத்திருமேனி கொண்டவனைக் கேசவனை
                             கமலாசனனும் நாரதரும் பணிந்திடும்
                             கமலமலர்ப்பாதன் செங்கமலநாதனை

திருவண்பரிசாரம் திருக்குறளப்பன்

                                திருவண்பரிசாரம் திருக்குறளப்பன்


                                             பல்லவி

                        திருமலைவாசனைத் திருக்குறளப்பனை
                        திருவாழ்மார்பனை மனமாரத் துதித்தேன்

                                           அனுபல்லவி

                        வருமிடர் தவிர்த்திடும் ஆதிகேசவனை
                        அருமறைகள் போற்றும் ஏழுமலையானை

                                                சரணம்

                         தருமசிந்தை சத்திய நெறியுடன்
                         ஒருநாளும் முகுந்தனவன் திருவடி மறவாத
                         திருவுள்ளம் பெரும் பேறு எனக்கருள வேண்டுமென
                         திருவண்பரிசாரமெனும் திருத்தலத்துறைபவனை

ஶ்ரீராம நாம பாராயணம்

                   ஶ்ரீராம ராம ராமேதி ரமே ராமே மனோரமே |
                   ஸஹஸ்ரனாம தத்துல்யம் ராமனாம வரானனே ||




                                       

                        ஶ்ரீராம நாம பாராயணம்

                                   பல்லவி

                  ஶ்ரீராம ராம ராம ராம என்று சொல்லுவீர்

                  காமம் மோகம் லோபமென்னும் அறுபகைகள் வெல்லுவீர்

         

                                  அனுபல்லவி 

                  நாராயணன் நாமம் ஓராயிரம் ஓதி

                  பாராயணம் செய்த பலனனைத்தும் எய்துவீர்

                                     சரணம்

                 பூமியில் நம்மனைவருக்கும் கேசவன் அவனது

                 நாமசங்கீர்த்தனமே அனைத்திலும் சிறந்தது

                 பாமரர்க்கும் பண்டிதர்க்கும் எளிமையான வழியிது

                 சோமசுந்தரர் அன்னை பார்வதிக்குச் சொன்னது

                  

தேவாதி தேவா

                                          தேவாதி தேவா



                                                 பல்லவி

                                   தேவாதி தேவா  ஶ்ரீ பத்மநாபா
                                   மூவாசைப்பிணியகல உன் பதம் பணிந்தேன்

                                               அனுபல்லவி

                                    மாவாய் பிளந்து மூவுலகும் காட்டிய
                                    ஶ்ரீவாசுதேவா அச்சுதா கேசவா

                                                     சரணம்

                                    பரம புருஷனே புருஷோத்தமா
                                    பரம்பொருளே ஶ்ரீ பரந்தாமா
                                    பரம்பதம்தனில் நிலைத்திருக்கும்
                                    பரமாத்மா ஶ்ரீமன் நாராயணா

ஶ்ரீ ரங்கநாதன்

                                       ஶ்ரீ ரங்கநாதன்



                                              பல்லவி

                              ஶ்ரீரங்கநாதனை நாளும் பணிந்தேன்

                              கோரசம்சாரக்கடலினைக் கடந்திடவே

                                              துரிதம் 

   

                               கோரினவரங்களைத் தருபவன் கேசவன் 

                               கோவர்த்தனம்தனைக் குடையெனப் பிடித்தவன்

                                                 அனுபல்லவி

                                ஶ்ரீரங்கநாயகி மனங்கவர் நாயகன்

                                சாரங்கன் சாதுஜனங்களைக் காப்பவன்

                                                     சரணம் 

                                சாரதியாய் நின்று பார்த்தனுக்குதவிய 

                                ஆராவமுதன் அனந்தபத்மநாபன்

                                பாரிலொரு வைகுண்டம் என்னும் புகழ் விளங்கும்

                                சீர்மல்கும் திருவரங்கம் திருத்தலத்தில் பள்ளிகொண்ட

ஏலவார்கழலி

                                               ஏலவார்கழலி


                                                       பல்லவி

                                    ஏலவார்குழலியின் மலர்த்தாள் பணிந்தேன்
                                    காலபயம் பவரோகம் அணுகாமல் காத்தருள

                                                     அனுபல்லவி

                                    ஆலமுண்டகண்டன் ஏகாம்ரேச்வரரை
                                    ஆலிங்கனம் செய்து பூசித்த அன்னை

                                                          சரணம்

                                     நீலவண்ணகண்ணன் கேசவன் சோதரி
                                     சாலச்சிறந்த காஞ்சிமாநகரில்
                                     ஞாலமுய்யவென எழுந்தருளிக் காட்சி தரும்
                                     சீலமிகு காமாட்சி ஏகாம்ரேச்வரி
                                   
                                     

வேங்கடரமணன்

                                   வேங்கடரமணன்


                                           பல்லவி

                           கழலடி நிழலே துணை என்றும்
                           அழகன் வேங்கடரமணனின் கருணை

                                         அனுபல்லவி

                           குழலூதி மனங்களைக் கொள்ளை கொண்டவன்
                            ஏழுமலைவாசன் கோவிந்தன் கேசவன்
     
                                              சரணம்

                            அழலேந்தும் நெற்றிக்கண்ணனும் பிரமனும்
                            குழுமி நிற்கும் தேவரும் சனகாதிமுனிவரும்
                            முழுமதியும் கதிரவனும் நாரதரும் மூவுலகும்
                            தொழுதேத்தும் கடல்வண்ணன் ஶ்ரீநிவாசன்

நன்மங்கலம் நீலவண்ணன்

                                நன்மங்கலம் நீலவண்ணன்


                                               பல்லவி

                             அன்புடனே என்னை ஆண்டருள் கேசவா
                             நன்மங்கலம் வளர் நீலவண்ணக்கண்ணனே

                                            அனுபல்லவி

                             அன்னைதந்தை ஆசானும் தோழனும் நீயே
                              இன்பம் கூட்டித் துன்பம் களைந்து

                                                  சரணம்

                             அன்று அமரருக்கு அமுதம் அளித்தாய்
                             கன்றுகள் மேய்த்திடும் கண்ணனாயவதரித்து
                             குன்றுதனையேந்தி குவலயம் காத்தாய்
                             இன்றும் கருணையுடன் என் முன்னே தோன்றி

திருக்குடந்தை ஆராவமுதன்

                                 திருக்குடந்தை ஆராவமுதன்


                                               பல்லவி

                            சரணகமலங்களைச் சரணடைந்தேன்
                            பரமனே கேசவா எனக்கருள் புரிவாய்

                                             அனுபல்லவி

                            மரணம் பிறவி இரண்டுமில்லாத
                            பரகதி பெறவே உனதருள் வேண்டி

                                                சரணம்

                            அரனயனிந்திரன் சுகசனகாதியர்
                            நரர்சுரர் நாரதர் மாருதி அனைவரும்
                            கரம்பணிந்தேத்தும் கருணாகரனே
                            திருக்குடந்தை வளர் ஆராவமுதனே

தாமரைமலர்ப்பாதனே

                                     தாமரைமலர்ப்பாதனே



                                             பல்லவி

                           தாமரை மலர்ப்பாதனே  கேசவா
                           மாமறைகள் போற்றும் யாதவகுல திலகா

                                          அனுபல்லவி
 
                          பாமரஜனங்களை காத்தருள்பவனே
                          பாமாருக்மிணி அன்புடன் பணிந்திடும்

                                               சரணம்

                          பூமியும் வானமும் நீரும் நெருப்பும் காற்றும் நீயே
                          வாமனனாய் வடிவெடுத்து மூவடியாலுலகளந்தாய்
                          தீமையே வடிவான கம்சனை வதம் புரிந்தாய்
                          தேமதுரத்தமிழால் உனைப்பாடிப் பணிந்தேன்

கமலநாபன்

                                        கமலநாபன்



                                            பல்லவி

                             கமலசரண்யனே கமலநாபனே
                             கழலடி பணிந்தேன் துணைபுரிவாயே

                                           அனுபல்லவி

                              கமலாசனனும் அமரேந்தினும்
                              உமாபதியும் அமரரும் வணங்கிடும்

                                                 சரணம்

                              நிரந்தரமில்லா உலகில் நிரந்தரம்
                              பரந்தாமனே நீ ஒருவன் மட்டுமே
                              பரம்பொருளே கேசவா உனதருள் வேண்டியே
                              கரம் கூப்பி சிரம் தாழ்த்தி உன்னை துதித்தேன்

நன்மங்கலம் நீலவண்ணன்

                                      நன்மங்கலம் நீலவண்ணன்


                                                      பல்லவி

                                உன்னை நினைந்துருகும் என்னைக்காத்தருள
                                இன்னும் என்ன தயக்கம்    கேசவா

                                                    அனுபல்லவி

                                பன்னகசயன்னே பரமதயாளனே
                                நன்மங்கலம் வளர் நீலவண்ணனே

                                                        சரணம்

                                கன்றின் பசியறிந்து பாலூட்டும் பசுவென்று
                                உன்னடியார் உனைப் புகழும் மொழியும் பொய்யோ
                                அன்று நீ கரிக்கபயம் அளித்த கதையும் பொய்யோ
                                இன்று உனதடிமை மன்றாடி வேண்டி நின்றேன்

ஶ்ரீபத்மநாபா

                                                ஶ்ரீபத்மநாபா



                                                    பல்லவி

                                  துணை நீயே எனக்கென்றும் ஶ்ரீபத்மநாபா
                                  அணைபோட முடியாத கருணைக்கடலே

                                                  அனுபல்லவி

                                  இணையாக உனக்கோர் தெய்வம் வேறில்லை
                                  அணையாத ஒளிவிளக்கே சென்ன கேசவா

                                                      சரணம்

                                  மனக்கவலையிடர் நீங்கி வினைப் பயனகன்றிட
                                  தினமுன்றன் திருநாமம் ஓதியே துதித்தேன்
                                  அனந்தபுரம் பதிதன்னில் பாம்பணையில் பள்ளிகொண்ட
                                  தினகரகுலதிலகா தீனசரண்யா

மீனாக்ஷி

 


                                                  மீனாக்ஷி


                                                    பல்லவி

                                 சாமகானம்தனை மிகவும் ரசித்திடும்
                                 மீனாக்ஷி உந்தன் பாதம் பணிந்தேன்

                                                  அனுபல்லவி

                                 சோமசுந்தரர் மனங்கவர் அன்னையே
                                 பாமரனெனையே காத்தருள்வாயே

                                                     சரணம்

                                நாமகளும் பூமகளும் நரர்சுரரும் போற்றும்
                                அங்கயற்கண்ணி அன்னபூரணி
                                ஶ்ரீநகரம்தனில் விளங்கும் ராஜராஜேச்வரி
                                மாமதுரை அரசாளும் கேசவன் சோதரி

சரவணபவகுகன்

                                     சரவணபவகுகன்


                                           பல்லவி

                            சரவணபவகுகனை சண்முகனை
                            கரம் கூப்பி சிரம் தாழ்த்தி பணிவுடன் துதித்தேன்

                                          அனுபல்லவி 

                             அரவணை துயிலும் கேசவன் மருகனை
                              சூரனை வதம்செய்த சுப்பிரமணியனை

                                                  சரணம்

                              பரமசிவனும் உமையும் மடிவைத்துக் கொஞ்சிய
                              முருகனைக் குமரனை வேலாயுதனை
                              குறமகள் வள்ளி தெய்வானை உடனிருக்கும்
                              சிங்காரவேலனை சேவற்கொடியோனை

                                             

ஆராவமுதன்

                                         ஆராவமுதன்



                                             பல்லவி

                             ஆராவமுதனை அனுதினம் துதித்தேன்
                             பாரோர் பணிந்தேத்தும் நாராயணனை

                                            அனுபல்லவி

                              ஶ்ரீராமனாயன்று தசகண்டனை வென்ற
                              வீரராகவனை தசரத குமாரனை

                                                 சரணம்

                               விடநாகத்தணையானை சக்கரபாணியை
                               கிடந்தவாரெழுந்த சாரங்கபாணியை
                               குடந்தைக் கேசவனை கோதண்டபாணியை
                                வடமதுரை மைந்தனை நீலவண்ணனை

ஆதிகேசவன்

                                        ஆதிகேசவன்



                                               பல்லவி

                         ஆதிகேசவனைப் பிரார்த்தனை செய்தேன்
                         ஆதியந்தம் இல்லாத பரம் பொருளை

                                              துரிதம்

                          சங்கரன் நான்முகன் நாரதரிந்நிரன்
                          ஐங்கரன் சரவணன் தேவர்கள் பணிந்திடும்

                                              அனுபல்லவி

                           மேதினி போற்றும் மயூரவல்லியை
                           மார்பினில் தாங்கும் கருணாமூர்த்தியை

                                                   சரணம்

                             கீதநாட்டியக் கலாரசிகனை
                              நாதவடிவினனை வேதப்பொருளை
                              வீதி உலா வந்து எளியோர்க்கருளும்
                              சோதியைச் சுடரை மதுசூதனனை

                                             

தாடாளன்

                                               தாடாளன்


                                                 பல்லவி

                                தாடாளன் திருவடியை உளமாரப்பணிந்தேன்

                                வாடாமலர் தூவிப் பாமாலை சாற்றி

                                                 துரிதம்

                                சேடனும் பிரமனும் கருடனுமிந்த்ரனும்

                                நாரதர் சுகசனகாதியர் துதித்திடும்

                                                  அனுபல்லவி

                                கோடானுகோடி நரர்சுரரும் முனிவர்களும் 

                                நாடித்துதித்திடும் ஶ்ரீ வாசுதேவன் 

                                                      சரணம்

                               ஈடுபாடுடனே அவன் நாமம் துதிப்போர்க்கு

                               தேடாமலே வந்து தயவளிக்கும் தயாபரன் 

                               பாடாய்ப்படுத்தும் பழவினைப் பயன்களை

                               கேடாகச் செய்திடும் கேசவன் ஶ்ரீக்ருஷ்ணன்

சென்னகேசவன்

                                          சென்னகேசவன்



                                                பல்லவி

                              எங்கிருந்தாலும் என் துணை நீயே
                              பங்கயநாபனே சென்ன கேசவா

                                              அனுபல்லவி

                              மங்கை செங்கமலம் மனங்கவர் மாலனே
                              பொங்கரவணை துயிலும் வைகுண்டவாசனே

                                                    சரணம்

                               சங்கரன் மல்லீச்வரனும் பிரமராம்பிகையும்
                               கந்தகோட்டக் கந்தனும் சக்தி கணபதியும்
                               கரம்பணிந்தேத்தும் கருணாமூர்த்தியே
                               மங்காத புகழ் மேவும் மாதவா கோவிந்தா

நாராயண நாமம்

     


                                 நாராயண நாமம்



                                      பல்லவி

                       நாராயண நாராயண நாராயணவென்று
                       நாவாரத்துதிப்போர்க்கு மூவாசைப்பிணி போகும்

                                     அனுபல்லவி

                      ஓராயிரம் திருநாமம் உண்டு என்றாலும்
                      நாராயணாவென்னும்  ஒரு நாமமே போதும்

                                           சரணம்

                      மாறாத பக்தியுடன் கேசவனின் திருநாமம்
                      பாராயணம் செய்வோருக்கு பல நன்மை உண்டாகும்
                      ஆராவமுதனவன் திருவடியைத் துதித்தால்
                      தீராவினை தீரும் திருவருளும் சேரும்

                      

இதுவே வைகுண்டம்

                                      இதுவே வைகுண்டம்




                                                  பல்லவி

                                இதுவே வைகுண்டம்   -   பாரினில்
                                வேங்கடரமணன் நின்று காட்சி தரும்

                                                 அனுபல்லவி

                                மதுசூதனன் மாலன் வேண்டி வரும் பக்தருக்கு
                                வேண்டும் வரங்களை அள்ளி அளித்திடும்

                                                       சரணம்

                                பேசும் தெய்வமென்றும் கலியுகக்கடவுளென்றும்
                                பாசமுடன் அடியாரைக் காக்கும் ஈசனென்றும்
                                நேசமுடன் அனைவரும் அழைக்கும் கோவிந்தன்
                                 கேசவன் தங்கும் புண்ணியத் திருத்தலம்

நாராயணன் திவ்ய நாமம்

                                  நாராயணன் திவ்ய நாமம்



                                              பல்லவி

                          நாராயணன் திவ்ய நாமம் தினமும்
                          நாவாரச்சொல்வோர்க்கு பேரின்பம் கிடைத்திடும்

                                          அனுபல்லவி

                          பாராயணம் செய்து பக்தியுடன் துதிப்போர்க்கு
                          இகபரமிரண்டிலும் சுகம் பல சேரும்

                                               சரணம்

                          அருமறைப்பொருளும் பிரணவப் பொருளும்
                          குருவழியருளும் அருளும் திருநாமம்
                          பெருமைக்குரிய கேசவன் நாமமந்த
                          இருநாலெழுத்தில் அனைத்தும் அடங்கும்

அரி நாராயணா

                                           அரி நாராயணா


                                                  பல்லவி


                          மனமுந்தன் திருவடியை மறவாதிருக்கவே
                          தினமுந்தன் திருநாமம் பாடித் துதித்தேன்

                                               அனுபல்லவி

                          அனல் புனல் காற்று நிலம் வெளியனைத்தும்
                          அனந்தனே கேசவா நீயென்றறிந்தேன்

                                                    சரணம்

                           எனதுயிருடலனைத்தும் உனது பொருளன்றோ
                           முனைப்புடன் பேணுவதும் உன்கடமைதானன்றோ
                           வினைப்பயனால் துன்பமுறும் எனைக்காக்க வேண்டுமென்றே
                           உனை வேண்டி நின்றேன் அரி நாராயணா

திருவரங்கநாதன்

                                          திருவரங்கநாதன்



                                                 பல்லவி

                         திருவரங்கநாதனை திருவுறைமணிமார்பனை
                         கருணை நிறைந்தவனைக் கேசவனைப் பணிந்தேன்

                                              அனுபல்லவி

                         பெருங்கோயில் கொண்டவனை நம்பெருமாளென்பவனை
                          இருதாளும் வணங்கி மீண்டும் மீண்டும் துதித்தேன்

                                                    சரணம்

                          அருந்தவ முனிவர்களும் நரர் சுரரும் நாரதரும்
                          திருவரங்கநாயகியும் பிரமனும் போற்றும்     ( திருவரங்க..)
                           வருமிடர் பவப்பிணி அனைத்தையும் களைந்திடும்
                           திருமாலை மாதவனை ஶ்ரீமன் நாராயணனை ( திருவ.....)
                         
                         
                           

தாயே பராசக்தி

                                        தாயே பராசக்தி


                                                 பல்லவி

                                 பரிந்தருள்புரிவாய் தாயே பராசக்தி
                                 அரியயனரன் பணி கேசவன் சோதரி

                                               அனுபல்லவி

                                  எரிதழலேந்தும் ஈசன் பங்கிலுறை
                                  கரிய நிறத்தவளே சங்கரி கௌரி

                                                    சரணம்

                                  விரிந்து பரந்த மாயா உலகில்
                                  சரியும் தவறும் நெறி அறியாமல்
                                  புரியதவனாய் சுற்றித் திரிந்தேன்
                                  வறியவன் எனையே அரவணைத்தெடுத்து
                                   

மரகதவண்ணன்

                                      மரகதவண்ணன்


                                              பல்லவி

                           மரகதவண்ணனே மதுசூதனனே
                           சரணம் சரணம் திருவடி சரணம்

                                             துரிதம்

                           சுரபதி ரதிபதி தனங்களின் அதிபதி
                           கணபதி மாருதி பணிந்திடும் ஶ்ரீபதி

                                            அனுபல்லவி

                           பரகதியடைந்திடும் வரம் பெற வேண்டியே
                           பரமனே கேசவா உனைச்சரண்டைந்தேன்
   
                                                   சரணம்

                           கரம் கூப்பி சிரம் தாழ்த்தி அரவிந்த பதம் பணிந்தேன்
                           புரந்தர விட்டலனே கருணைக் கடலே
                           இரக்கம் இன்னும் வரவில்லையா கண்ணா
                           முரளீதரனே முகுந்தா கண்பாராய்

ஶ்ரீ ரங்கநாதனை

                          ஶ்ரீ ரங்கநாதனை


                                     பல்லவி

                 ஶ்ரீரங்கநாதனை ப்ரார்த்தனை செய்தேன்
                  ஶ்ரீரங்கநாயகி அருகிருந்து போற்றும்

                                   அனுபல்லவி

                  சாரதியாய் தேர் நடத்தி பார்த்தனுக்கருள் செய்த
                  கார்வண்ணன் கண்ணனை கேசவனை மாதவனை

                                        சரணம்

                   கோரசம்சாரக்கடலினைக் கடந்திட
                   நாரணன் திருவடிச்சரணமே துணையென
                   ஆராவமுதனவன் அடிமலர் துதித்தேன்
                   பாராதிருந்தால் வேறெங்கு செல்வேன் 

கண்ணன் கழலடியை

                                  கண்ணன் கழலடியை


                                           பல்லவி

                       கண்ணன் கழலடியைப் பற்றிடும் அடியார்கள்
                       திண்ணமாயெய்துவர் வைகுண்டம் பரமபதம்

                                        அனுபல்லவி

                       எண்ணமும் செயலும் மனமும் ஒரு நிலையாக
                       கண்ணாலும் கருத்தாலும் அவனருளைப் பெறவேண்டி

                                             சரணம்

                       மண்ணில் பிறந்துழலும் மாந்தரனைவரும்
                       விண்ணுலகத்திந்திரரும் தேவரும் முனிவரும்
                       தண்மதியும் கதிரவனும் போற்றித்துதித்திடும்
                       வண்புருடோத்தமன் கேசவன் மாதவன்

பண்டரிநாதன்

                                          பண்டரிநாதன்



                                                பல்லவி

                              பாண்டுரங்கனை பண்டரிநாதனை
                              ஆண்டருள்வாயென்று வேண்டித்துதித்தேன்

                                              அனுபல்லவி

                               வேண்டுதல் வேண்டாமை இல்லாதவனை
                               பாண்டவர் நேசனைக் கண்ணனைக் கேசவனை

                                                     சரணம்

                                காண்பவர் மனங்களைக்  கொள்ளை கொள்ளும்
                                மீண்டும் மீண்டும் காணத்தூண்டும்  -  பேர்
                                ஆண்மையுடையவனை வாசுதேவனை
                                வேண்டுவோர் வேண்டும் வரம் தருபவனை

முருகையா

                                           முருகையா

                                               பல்லவி

                                  பதமலர் பணிந்தேன் முருகையா
                                  சதமென உனையே அனுதினம் துதித்து

                                             அனுபல்லவி

                                  வதம்செய்து சூரன் உடல்தனைக் கிழித்து
                                  சேவலும் மயிலுமாயாட்கொண்ட குமரா
                       
                                                  சரணம்
                                 
                                   இதம் தரும் இவ்வுலக வாழ்வென்றும் நிலையல்ல
                                   விதம் விதமான உறவும் சுற்றமும்
                                   எதுவும் சதமல்ல என்றே ஏழையேன்
                                   பதுமநாபன் கேசவன் மருகா
                                    

கேசவ மாதவ முரளீதரா

                               
                                  கேசவ மாதவ முரளீதரா


                                              பல்லவி

                                   கேசவ மாதவ முரளீதரா
                                   நேசமுடன் என்னைக் காத்தருள்வாய்

                                            அனுபல்லவி

                                   பாசத்தளைகளை களைந்திடும்  அச்சுதா
                                   பாதம் பணிந்தேன் பாற்கடல்வாசா

                                                சரணம்

                                   வாசமலர் மாலைகள் வனமாலை கௌஸ்துபம்
                                   ஆசையுடன் அணிந்திடும் பதுமநாபனே
                                   மாசிலாமணியே மதுசூதனனே
                                   பேசும் தெய்வமே கலியுகக்கடவுளே

ஶ்ரீ ஆதிகேசவன்

   


                                                 ஶ்ரீ ஆதிகேசவன்

                                               
                                                    பல்லவி


                                   ஆதிகேசவன் பாதம் பணிந்தேன்
                                   மயூரவல்லி அருகிருந்து துதித்திடும்

                                                   அனுபல்லவி

                                   மேதினி போற்றும் உடையவருடனிருக்கும்
                                   உலகளந்த தாடாளன் மதுசூதனன் - ஶ்ரீ
                                     
                                                        சரணம்

                                   வேதியரோதிடும் மறைகளின் பொருளவன்
                                   சோதியாய் சுடராய் ஒளியாயிருப்பவன்
                                   பாதிமதி சூடும் அரனும் பிரமனும்
                                   தீதறியா முனி நாரதரும் பணிந்திடும் 

அழைத்தாலே போதும்

   

                                   அழைத்தாலே போதும்
             

                                               பல்லவி

                       அழைத்தாலே போதும் கண்ணெதிரில் வருவான்
                       மழையாக அருள்பொழிவான் கேட்டவரம் தருவான்

                                             அனுபல்லவி

                       கழல் தொழுது மெய்யுருகி உளமார நினந்து
                       பழகு தமிழ் மொழியில் பாமாலை புனைந்து

                                                 சரணம்

                       பூவில் வாசமாய் தேனில் சுவையாய்
                       நாவில் சொல்லுமாய் சொல்லின் பொருளாய்
                       சீவனாய்ப் பரமனாய் ஒளியாய் வளியாய்
                       தேவனாயனைத்துமாய் இருக்கும் கேசவனை

தென்னாங்கூர் பாண்டுரங்கன்

                             தென்னாங்கூர் பாண்டுரங்கன்


                                            பல்லவி

                          பாண்டுரங்கனின்  பாதகமலங்களை
                          பணிவுடன் வணங்கி பரவசமடைந்தேன்

                                          அனுபல்லவி

                          காண்டீபன் சாரதியாய் பாரதப்போர் நடத்தி
                          பாண்டவர்க்குத் துணை நின்ற கண்ணன் கேசவன்

                                                 சரணம்

                          திருமகள் ருக்மிணி மனம் மகிழ உடனிருக்கும்
                          திருவுறை மார்பன் கருமுகில்வண்ணன்
                          அருள் தரும் கோவிந்தன் அருமாகடலமுதன்
                          பெருமைக்குரிய தென்னாங்கூர் தலம் வளர்

மகாவிஷ்ணு

                                       மகாவிஷ்ணு


                                        பல்லவி

                           மகாலக்ஷ்மியை மார்பில் வைத்திருக்கும்
                           மகாவிஷ்ணுவை வணங்கித் துதித்தேன்

                                      அனுபல்லவி

                           மகாபாபங்கள் முன்வினைப் பயன்கள்
                           அகன்றிடச் செய்து காத்தருள்வாயென

                                           சரணம்

                           சகாதேவனைப் போலவே அன்புடன்
                           விகாரமில்லா மனத்துடன் துதிப்பவர்
                           சுகானுபவம்தனை அடைந்திடச் செய்திடும்
                           மகானுபாவனை மாலனைக் கேசவனை

ஏகாம்ரேச்வரி

Ayurdehi dhanam dehi

vidyam dehi maheswari

samasthamakhilam dehi

dehi me Parameshwari

                                            ஏகாம்ரேச்வரி

                                                  பல்லவி 

                             ஆயுள் ஆரோக்கியமும் கல்வியும் செல்வமும் 

                             தாயுள்ளத்துடனே தந்தருள்வாய் ஈச்வரி

                                               அனுபல்லவி

                             தேயும் பிறைநிலவை நெற்றியில் சூடிய

                              மாயே மரகதமே கேசவன் சோதரி

                                                   சரணம் 

                             தூயவளே துதித்திடும் அடியவர்க்கெல்லாம்
                             நீயாக க்கருணையளித்திடும் காமாஷி
                             தேயாத புகழ் மேவும் காஞ்சிமாநகர் வளர்
                             தாயே தயாகரி ஏகாம்ரேச்வரி
                             

கணபதி நீயே

                                           கணபதி நீயே


                                                    பல்லவி

                                    கணபதி நீயே அருள்புரிவாயே
                                    இணையடி நிழலே சதமெனத்துதித்தேன்

                                                  அனுபல்லவி

                                    கணங்களும் நந்தியும் தேவரும் முனிவரும்
                                    வணங்கிடும் முழுமுதற்கடவுளே ஐங்கரனே

                                                      சரணம்

                                    பணிந்திடும் அடியார்க்கு நலமளிப்பவனே
                                    மணிகண்டன் சோதரனே கேசவன் மருகனே
                                    தணலேந்தும் நெற்றிக் கண்ணன் மைந்தனே
                                    அணிமணிமாலைகள் அணிந்த கரிமுகனே
                                    

திருவரங்கன்

                                                 திருவரங்கன்



                                                     பல்லவி

                                  அன்புடன் என்னை ஆதரிக்க வேண்டுமென
                                  திருவரங்கநாதனை மனமாரப் பணிந்தேன்

                                                   அனுபல்லவி

                                  கன்மவினைகளால் படுந்துயர் நீங்கி
                                  இன்பமும் நல்வாழ்வும் நிம்மதியும் பெறவே

                                                       சரணம்

                                 தென்னிலங்கை ராவணனை வென்று பகைமுடித்து
                                 தன்னைச்சரண்டைந்த இளவலுக்கு முடிசூடி
                                 சூடிக்கொடுத்த சுடர்க்கொடியை ஆட்கொண்ட
                                 அரங்கமாநகருளானைக் கேசவனைத்துதித்தேன் 

கேசவ மாதவ கோவிந்தா

                                         கேசவ மாதவ கோவிந்தா


                                                      பல்லவி

                                      கேசவ மாதவ கோவிந்தாவென
                                      ஆசையுடன் அழைத்து உனைத்துதித்தேன்

                                                    அனுபல்லவி
 
                                       பேசுந்தெய்வமாய் கலியுகந்தனிலே
                                       வாசம் செய்திடும் ஶ்ரீநிவாசா

                                                       சரணம்

                                       தேசுடை அலமேலுமங்கை மணாளா
                                       மாசிலாமணியே வேங்கடமுடையானே
                                       வாசமலர் தூவி பதம் பணிந்து
                                       ஈசனே எனையும் ஆண்டருள வேண்டுமென