பத்மாவதியின்......
பல்லவி
பத்மாவதியின் பாதம் பணிந்தேன்
பத்மாசனம் தனில் வீற்றிருக்குமன்னை
அனுபல்லவி
உத்தமன் ஶ்ரீநிவாசனும் பிரமனும்
தட்சிணாமூர்த்தியும் துதித்துப் போற்றும்
சரணம்
நித்தியம் நிலைத்திடும் செல்வமும் புகழும்
சித்தத்தில் ஞானமும் மகிழ்ச்சியும் நலகிடும்
உத்தமி சென்ன கேசவன் பத்தினி
பக்தருக்கருள் தர கோமந்தகப் பதி வளர்
இராகம் : சாலகபைரவி தாளம்: ஆதி
கமலாம்பிகையின்.......
பல்லவி
கமலாம்பிகையின் சரணகமலங்களை
பணிவுடன் சரணடைந்தேன் .....ஶ்ரீ.....
மத்திமகாலம்
அமரரும் அசுரரும் அமரேந்திரனும் அஜபா நடமிடும் தியாகராஜரும்
கமலாலயன் மாலன் குபேரன் காமன் கணபதி கந்தன் போற்றும்
அனுபல்லவி
கமலநாபன் கேசவன் சோதரி
கமலா மனோகரி திரிபுரசுந்தரி
சரணம்
காமனைக் கண்ணழலால் எரித்த காமேச்வரனின்
வாமத்தில் இடங்கொண்ட கோமளவல்லி
சாம முதல் வேதங்கள் போற்றும் காமேச்வரி
முக்தி தரும் திருவாரூர் தலம் வளர் பராசக்தி
இராகம் : கமலாமனோகரி தாளம் : ஆதி
கமலநாபன்......
பல்லவி
கமலநாபன் கேசவன் சகோதரி
கமலாம்பிகையின் மலர்த் தாள் சரணம்
அனுபல்லவி
நமச்சிவாயன் வன்மீக நாதன்
கமலமலரமர் பிரமன் குமரன்
மாற்றுரைத்த கணபதி மற்றும்
அடியவரனைவரும் துதித்துப் போற்றும்
சரணம்
சமயக்குரவர் நால்வரும் போற்றிய
கமலலோசனி திரிபுரசுந்தரி
அமைதியுடன் மாமேருவிலமர்நது
ஆரூர்தனில் அருளாட்சி புரியும்
இராகம் : கேதாரம் தாளம்: ஆதி
எங்கும் நிறைந்திருக்கும்.......
பல்லவி
எங்கும் நிறைந்திருக்கும் சிங்காரவேலன்
பொங்கும் கருணையுடன் அருட்காட்சி தந்தான்
அனுபல்லவி
மங்காத புகழ் மேவும் மயிலாபுரி வளர்
கற்பகாம்பிகையின் திருநிறைச்செல்வன்
சரணம்
திங்களைப் பழிக்கும் திருமுகத்தாள் வள்ளியும்
பங்கய மலர் நாணும் தெய்வானையும் அருகே
மங்களமாய் கொலுவிருக்க மயிலாசனந்தன்னில்
செங்கண்மால் கேசவன் மருகன் முருகன்
நம்பிடுவீர்......
பல்லவி
நம்பிடுவீர் திரு நாராயணன
நலம் தரும் மாலனைக் கேசவனை மாதவனை
அனுபல்லவி
கும்பிடுவீர் தினம் கோவிந்தனை
கோசலை மைந்தன் ஶ்ரீராமனை
சரணம்
தும்புரு நாரதரும் இந்திரனும் தேவரும்
சம்புவும் பிரமனும் முனிவர்களும் பானுவும்
அன்புடன் திருமகளும் சந்திரனும் அனைவரும்
இன்புற வணங்கிடும் பாற்கடல் வாசனை
கனிந்தருள்......
பல்லவி
கனிந்தருள் புரிவாய் காமாக்ஷி
இனி துயர் தாளேன் தாள் பணிந்தேன்
அனுபல்லவி
முனிவரும் தேவரும் மூவரும் போற்றும்
தனிப் பெருந்தேவி ஏகாம்ரேச்வரி
சரணம்
இருள்சூழ் கானகம் போதுமென் வாழ்க்கை
பொருள் புகழ் போகம் புலன்சுவை மிருகங்கள்
அருள் கூர்நதெனையே ஆண்டருள் தாயே
கருணைக் கடலே கேசவன் சோதரி
ஓராயிரம் ......
பல்லவி
ஓராயிரம் நாமம் சொல்லியழைத்தாலும்
பாராமுகம் ஏனோ சென்ன கேசவா
அனுபல்லவி
ஆராவமுதனே திருக்குடந்தை அருட்கடலே
சாரங்கபாணியுனைச் சரணடைந்தேன்
சரணம்
சேராத இடம் சேர்ந்து சிறுமதியால் தவறு செய்தேன்
தீராவினைப் பயனால் திண்டாடியலைந்தேன்
நாராயணனே உனதருளால் மனம் திருந்தி
சீரான வாழ்வு பெற உனதடிமை உனைப் பணிந்து
இராகம்:தைர்யமுகி ( 9ல் ஜன்யம்) தாளம்: ஆதி
எத்தனை......
பல்லவி
எத்தனை துன்பம் நீ எனக்களித்தாலும்
உத்தமனே கேசவா உனை நான் மறவேன்
அனுபல்லவி
நித்தமும் உனதிரு திருவடி பணிந்தேன்
சித்தத்தில் இருத்தி உனையே துதித்தேன்
சரணம்
கத்தும் கடல் நடுவே பள்ளி கொண்டிருக்கும்
வித்தகனே விமலா வேத தத்துவனே
இத்தரையில் வினைப்பயனால் யான்படும் துயர்நீங்க
ஒத்தாசை புரிந்திட உனை வேண்டி நின்றேன்
இராகம் : சோகவராளி ( 9ல் ஜன்யம்) தாளம்: ஆதி
குருவாயூரப்பன்.......
பல்லவி
குருவாயூரப்பன் திருவடி பணிந்தேன்
துரிதம்
கருணை வடிவான கலியுகவரதன்
நரர்சுரர் துதித்திடும் அரவிந்தபதத்தினன்
அனுபல்லவி
திருப்பாற்கடலுறை திரு நாராயணன்
துரிதம்
அருள் தரும் கண்ணன் தேவகி மைந்தன்
கம்சனைக் காய்ந்த ஶ்ரீவாசுதேவன்
சரணம்
தருமம் தழைக்கும் குருவாயூர் தலத்தில்
திருவிளையாடல் பல செய்து களித்த
கருணாமூர்த்தி கேசவன் அவனது
அருளைப் பெற விரும்பியே அடியேன்
இராகம் : ராகவசந்த( 14ல் ஜன்யம்) தாளம்:ஆதி
ஆரோகணம் : ஸரிம்பநிதஸ்
அவரோகணம்: ஸ்நிதம்பமகரிஸ
பரிகாசம் ஏனய்யா.......
பல்லவி
பரிகாசம் ஏனய்யா கேசவா
புரியாதவன் போல் சிலையாக நின்று
அனுபல்லவி
பரிந்தருள் வேண்டியே பாடிடும் என்னையே
தெரியாதவன் போல் பாவனை கொண்டு
சரணம்
தரித்திரன் குசேலன் கேட்காமலே
கருணையுடன் பொருள் அள்ளித்தந்தாய்
கரிராஜன் அழைத்ததும் விரைந்து சென்றாய்
சரி நிகர் இவருக்கு நானில்லையா
இராகம் : ஶ்ரீதீவிரவாஹினி ( 46ல் ஜன்யம்) தாளம்: ஆதி
நரசிம்மன் ......
பல்லவி
நரசிம்மன் பொற்பாதம் நாளும் துதித்தேன்
மறு ஜென்மம் இல்லாத வரம் பெற வேண்டியே
அனுபல்லவி
அரவிந்த பதத்தினன் பரம புருஷன்
பிரகலாதன் பணிந்திடும் ஶ்ரீமன் நாராயணன்
சரணம்
நரர்சுரர் இந்திரன் நாரதர் நான்முகன்
கரம் பணிந்தேத்தும் தேவாதி தேவன்
வரம் தரும் கேசவன் ஶ்ரீ வாசுதேவன்
புரந்தர விட்டலன் மங்களகிரி வளர்
இராகம்: குருப்பிரியா ( 64ல் ஜன்யம்) தாளம்:ஆதி
வா வா நீலவண்ணா.......
பல்லவி
வா வா நீலவண்ணா வா என்னைக்காக்க வா
அனுபல்லவி
தேவாதி தேவா வா திருத்தங்கும் மணிமார்பா
மூவாசைப் பிணி போக்க வா கேசவா
சரணம்
நாவாரத் துதித்திடும் அடியவர் துயர் நீக்க
ஏவாமலே வரும் மாதவா வா
ஆவினங்கள் மேய்க்கும் ஆயர்குல விளக்கே வா
நன்மங்கலம் வளர் வாசு தேவா வா
இராகம் : பாலசந்த்ரா( 72ல் ஜன்யம்)தாளம்:ஆதி
உனையன்றி......
பல்லவி
உனையன்றி எனக்கொரு துணை உலகில் யாருளார்
நினைந்துருகிக் கண்ணனே உன் பதம் பணிந்தேன்
அனுபல்லவி
வினைப்பயன்கள் யாவும் களைந்தருள வேண்டுமென
முனைந்துனையே வேண்டினேன் நன்மங்கலத்துறைபவனே
சரணம்
தினையளவுன் திருநாமம் சொன்னாலும் போதும்
பனையளவு கருணையுடன் பயன்கள் தருபவனே
அனைத்துலகும் முனிவர்களும் கடவுளரும் போற்றும்
எனையாண்ட கேசவனே கருநீலவண்ணனே
இராகம் : பவானி ( 44 வது மேளத்தில் ஜன்யம்)
கோலம் காண......
பல்லவி
கோலம் காண வாரீர் ஆலிலை
பாலன் மாலோலன் ஶ்ரீ கிருஷ்ணன் திருக்
அனுபல்லவி
லீலைகள் புரிந்திடும் பாலகிருஷ்ணன்
ஆயர் குல பாலன் யசோதை மைந்தன்
சரணம்
ஞாலமுண்ட வாயன் பாலகோபாலன்
சீலமிகு நன்மங்கலம் பதிதன்னில்
நிலமகள் திருமகளுடன் கோயில்கொண்ட
நீலவண்ணன் சென்னகேசவன் திருக்....
இராகம் : விஜயாபரணி தாளம் : ஆதி
வைத்திய வீரராகவன்.......
பல்லவி
வைத்திய வீர ராகவன் பாதம் பணிந்தேன்
ஐவாய் நாகத்தணை மீது கிடந்தானை திரு எவ்வுள்
அனுபல்லவி
மைத்தடங்கண்ணி கனகவல்லியைத் தன் மார்பில்
வைத்திருக்கும் திருமார்பன் மாதவன் கேசவன்
சரணம்
சதுர்முகன் சங்கரன் சாலிஹோத்திர முனிவரும்
எதிர் நின்று தொழுதேத்தும் பத்மநாபன்
யாதவ குல திலகன் மதுசூதனன் மாயன்
மதுகைடபாதி அரக்கரை மாய்த்த
இராகம் : ஶ்ரீ ராகம் தாளம் : சாபு
அருணாசலமே.......
பல்லவி
அருணாசலமே எனையாண்ட சிவமே
அன்பின் பொருளாகி நிற்கும் சிவமே
அனுபல்லவி
ஒருநாளும் உனை நான் மறவேன் சிவமே
பிரமனும் கேசவனும் தேடிய சிவமே
சரணம்
எளிதாக எல்லோர்க்கும் அருளும் சிவமே
உலகமனைத்திலும் நிறைந்த சிவமே
அடியார் மனத்தினுள் அமர்ந்த சிவமே
இசையால் தமிழால் யான் பாடும் சிவமே
ஒளியாகி வெளியாகி காற்றாகி சிவமே
நிலமாகி நீராகி நின்றாடும் சிவமே
ஊனாகி எனக்குள்ளே உயிராகி சிவமே
தேனாகித் தித்திக்கும் ஓங்கார சிவமே
இராகம் : செஞ்சுருட்டி தாளம் : ஆதி
ஶ்ரீ பிருஹந்நாயகியை.......
பல்லவி
ஶ்ரீ பிருஹந்நாயகியை மனமாரத் துதித்தேன்
அபய கரம் நீட்டி ஆதரிக்கும் அன்னை
அனுபல்லவி
ஶ்ரீ பிருஹதீஸ்வரர் மனம் கவரும் மங்கை
தஞ்சை பெரிய கோயில் வளர் நங்கை
சரணம்
கணபதி முருகன் நந்தி தேவனும்
கலைமகள் அலைமகள் அனைவரும் போற்றும்
பெரிய நாயகி பிறையணி சங்கரி
நலம் பல நல்கிடும் கேசவன் சோதரி
இராகம்: குமுதக்ரியா தாளம் : ஆதி
மகிஷாசுரமர்த்தினி ......
பல்லவி
மகிஷாசுரமர்த்தினி மலர்ப்பதம் பணிந்தேன்
அரக்கன் மகிடனை மாய்த்த அன்னையே ...ஶ்ரீ
அனுபல்லவி
மகா காளிதேவி பாகவதம் போற்றும்
ஶ்ரீ லலிதா திரிபுரசுந்தரி
சரணம்
மகாலக்ஷ்மி சரஸ்வதி நீயே
மகாதேவன் பிரமன் பணிந்திடும்
மகாதேவி கேசவன் சோதரி
மகிதலம் போற்றும் நவராத்திரி நாயகி
துரிதம்
சுகசனகாதியர் இந்திரனும் தேவரும்
சந்திரன் சூரியன் திசைகளும் துதித்திடும்
இராகம் : தேவகுஞ்சரி தாளம் : ஆதி
உமா மகேச்வரி ........
பல்லவி
உமா மகேச்வரி கௌரி காமாக்ஷி
ரமா சரஸ்வதி போற்றும் காத்யாயனி
அனுபல்லவி
உமாபதி ஶ்ரீ ஏகம்ப்ரேச்வரர்
சதா நினந்திடும் ஏகம்ப்ரேச்வரி
சரணம்
குமாரர் கணபதி முருகனும் வணங்கிடும்
கமலாமனோகரி கேசவன் சோதரி
அமைதியும் கருணையும் அளித்திடும் பாப
விமோசனம் தரும் காஞ்சி நிவாசினி
இராகம் : ஜனரஞ்சனி தாளம் : ஆதி
#யாத்திரை
முன்னாலே இருவர்
வெண்சங்கம் முழங்கி வர
பின்னாலே பத்து பேர்
பின் தொடர ஊர்வலமாய்
நடுவிலே நான்கு பேர்
சுமந்து வரும் பல்லக்கில்
இல்லாரும் இருப்பாரும்
எல்லாரும் ஓர் நாள்
செல்வார்கள் கட்டாயம்
புனித யாத்திரை
