சோதனை வந்தாலும்.....

                              சோதனை வந்தாலும்.....

                                                                   பல்லவி

                                              சோதனை வந்தாலும் வேதனை தந்தாலும்
                                              பாதமே என் துணை ஶ்ரீரகு ராமா

                                                                 அனுபல்லவி

                                              வேதங்கள் முழங்கிடும் மயிலையில் காட்சி தரும்
                                              கோதண்டராமனே திருமாலே கேசவனே

                                                                     சரணம்

                                               சீதக்கடலில் பள்ளி கொண்டிருக்கும்
                                               மாதவனே மதுசூதனனே
                                               பாதகஞ்செய்த அரக்கரை அழித்தவனே
                                               ஆதரவு தந்தெனை ஆண்டருள வேண்டினேன்

                                               
                                             
                                               

திருவுள்ளமிரங்காதா.......

                            திருவுள்ளமிரங்காதா.......

                                                        பல்லவி

                                          திருவுள்ளமிரங்காதா ஶ்ரீ ராமா
                                          ஒரு தவறும் செய்யாத எனக்கருள உந்தன்

                                                        அனுபல்லவி

                                          பெருமைக்குரிய திருவின் நாயகனே
                                          அருமறைகள் போற்றும் தேசுடைய கேசவனே

                                                             சரணம்

                                          குருவும் தந்தையும் தாயும் நீயெனவே
                                          கருதி உனைத்துதித்தேன் கருமாமுகில் வண்ணா
                                          கரும வினைப்பயனால் கட்டுண்ட என்னை
                                          கருணையுடன் விடுவித்து காத்தருள வேண்டினேன்
     

சந்ததம் .......

                             சந்ததம் .......

                                                           பல்லவி

                                       சந்ததம் ஶ்ரீராமனை ரகுகுல திலகனை
                                       சிந்தையில் வைத்து சீரடி போற்றினேன்

                                                         அனுபல்லவி
                                   
                                         கந்தம் தரும் துளபமாலையணிந்தவனை
                                         இந்திரன் பிரமன் நரர்சுரர் பணிபவனை

                                                              சரணம்
                                     
                                        மந்திரமோதும் முனிவர்கள் துதித்திடும்
                                        இந்திரநீலமணி நிறமொத்த மேனியனை
                                        சந்திர வதனமும் சுந்தர வடிவுமுடை
                                        உந்தி கமலனை கேசவனை மாலனை
                                       
                                          

சங்கீத ஞானமும்........

                          சங்கீத ஞானமும்........

                                                             பல்லவி

                                         சங்கீத ஞானமும் உன்னிடம் பக்தியும்
                                         பங்கயநாபனே பெற உனைத் துதித்தேன்

                                                           அனுபல்லவி
   
                                          தங்கும் பொருள் தரும் திருமகளை மார்பில்
                                          மங்களமாய் வைத்திருக்கும் கேசவனே ஶ்ரீராமா

                                                                 சரணம்

                                          சங்கும் சக்கரமும் சாரங்கமும் வாளும்
                                          எங்கும் எப்போதும் ஏந்தி நின்று காட்சிதரும்
                                          செங்கண்மாலே சாரங்கபாணியே
                                          பொங்கரவணை துயிலும் ஶ்ரீமன் நாராயணனே
               

                                         

தேவரும் முனிவரும்......

                                தேவரும் முனிவரும்......

                                                           பல்லவி

                                         தேவரும் முனிவரும் தேவேந்திரனும்
                                         யாவரும் வணங்கிடும் ராமா எனக்கருள்வாய்

                                                         அனுபல்லவி

                                         சேவடி பணிந்திடுமடியார்க்கருள்பவனே
                                         மூவுலகும் கொண்டாடும் திருமலே கேசவனே

                                                              சரணம்

                                         கோவில் குளமென்று யாத்திரை புரிந்ததில்லை
                                         நாவிலுன் நாமம்தனை தோத்திரம் செய்ததில்லை
                                         பாவியேனின்று மனம் வருந்தித் திருந்தி
                                         தூவி மலர் சொரிந்து உனதடி பணிந்தேன்
                                       
                                          

உனக்கிது அழகோ........

                                                 

                                            உனக்கிது அழகோ........

                                                                 பல்லவி

                                                உனக்கிது அழகோ ஶ்ரீ ஜெயராமா
                                                எனக்கருள இன்னும் தாமதம் செய்வதேன்

                                                               அனுபல்லவி
 
                                                சினந்து நீ வெறுத்தாலும் பரிந்தெனை அணைத்தாலும்
                                                உனது திருவடியே சதமெனத் துதித்தேன்

                                                                    சரணம்

                                                சனகாதி முனிவரும் நாரதரும் நான்முகனும்
                                                அனு தினம் வணங்கிடும் ஆதிகேசவனே
                                                பனையளவு இடர் வரினும் தியளவாய்ச் செய்திடும்
                                                இனகுலதிலகனே கோசலை பாலனே

அன்னை சீதையின்....

                            அன்னை சீதையின்....
      

                                                                பல்லவி

                                            அன்னை சீதையின் கரம் பிடித்ததாலன்றோ
                                            இன்னம் புகழ் கீர்த்தி அடைந்தாய் ஶ்ரீராமா

                                                              அனுபல்லவி                                        
                                                                                                                                                                                         
                                               முன்னம் மாயா சீதையை ராவணன்
                                               தன்னுடன் சிறையெடுத்து இலங்கையில் வைத்தான்

                                                                   சரணம்

                                                பன்னக சயனனே பார்புகழ் கேசவனே
                                                தன் சக்தியாலவனை எரிக்காமலே
                                                உன்னை அரக்கனுடன் போரிட வைத்து
                                                உன் பெருமை உலகறியச் செய்த எங்கள்
           
                                             
                     
                                             

மோகமென்னும்......

                               மோகமென்னும்......

                                                             பல்லவி

                                       மோகமென்னும் மாயையில் மூழ்காமல் மனமே
                                       மோகனராமனை துதித்திடுவாய் தினமே

                                                           அனுபல்லவி

                                        போகம் தரும் மகளிர் தேகம்தனை நினையாமல்
                                        யோகம் தந்திடும் நாம பஜனம் செய்து
                                     
                                                                சரணம்
   
                                        சாகசகங்கள் நிறைந்த இவ்வுலக வாழ்வில்
                                        சோகங்கள் நீங்கி சுகமனைத்தும் பெற
                                        ஆகம வேத புராணங்கள் போற்றும்
                                        நாகத்தணையானவன் நாமமே நம் துணை
                                       

                                       
                                       
                                     
                               
                                       

தூமலர் தூவி......

ராஜிவாயதலோசனம் ரகுவரம் நீலோத்பலஸ்யாமளம்
மந்தாரான்சிதமண்டபே ஸுலலிதே
ஸெளவர்ணகே புஷ்பகே |
ஆஸ்தானே நவரத்ன ராஜிகச்சிதே
ஸிம்ஹாஸனே ஸம்ஸ்திதம் ஸீதாலக்ஷ்மணலோகபா லஸஹிதம்
வந்தே முனீந்த்ராஸ்பதம் ||

                              தூமலர் தூவி......

                                                        பல்லவி

                                         தூமலர் தூவிப் பாதம் பணிந்தேன்
                                         மாமறை கொண்டாடும் மலர் நாபனே ராமா

                                                       அனுபல்லவி

                                         பூமகள் சீதையும் இளையவனுமுடனிருக்க
                                         பூமலர் பொன்மலரலங்கார மண்டபத்தில்

                                                             சரணம்

                                         தாமரை மலர்க் கண்ணனே ஶ்ரீராமா
                                         காமனும் மயங்கும் நீலவண்ணனே
                                         மாமுனிவர்கள் அடைய விரும்பும்
                                         பூமண்டலம் போற்றும் தலத்துறைபவனே
                                        

சதமல்ல இவ்வுலக.......

                           சதமல்ல இவ்வுலக.......

                                                               பல்லவி

                                           சதமல்ல இவ்வுலக வாழ்வென்றறிந்துமுன்
                                           பதமலரைப் பணியாத மூடரை என்சொல்வேன்

                                                              அனுபல்லவி

                                           நிதமுனைத் துதிக்காமல் காசுபணம் தேடி
                                           விதம் விதமாயலையும் வீணரை என்சொல்வேன்

                                                                    சரணம்

                                           மதம் மொழி இனமெனத் தம்முள் சண்டையிட்டு
                                           பதவி புகழென்று வாழ்நாளை வீணாக்கும்
                                           மதி கெட்ட மாந்தரை நானென்ன சொல்வேன்
                                           கதி நீயே ஶ்ரீராமா எனைக் காத்தருள்வாய்

                                           இதமுறப் பேசி மதிமயக்கி ஏமாற்றும்
                                           புது வித மனிதரை என் சொல்வேன் கேசவனே
                                           உதவாக்கரையாக ஊர்சிற்றித்திரிந்து விட்டு
                                           விதியைக் குறை கூறும் மனிதரை என் சொல்வேன்

ஒருமுறை ஶ்ரீராமா.....

                    ஒருமுறை ஶ்ரீராமா.....

                                                             பல்லவி

                                       ஒரு முறை ஶ்ரீராமா என்றழைத்தால் போதும்
                                       கருணை மழை பொழிவான் காத்தருள் புரிவான்

                                                           அனுபல்லவி

                                       குருவும் தந்தையும் தாயும் தோழனுமாய்
                                       அருகினிலிருந்து அரவணைத்திடுவான்

                                                               சரணம்

                                       தருமநெறி காக்க தரணியிலவதரித்த
                                       பெருமைக்குரிய கேசவன் நாரணன்
                                       இருவினைப் பயன்களால் படுந்துயர் களைந்திடுவான்
                                       திருவின் நாயகன் தீனசரண்யன்

காரணம் வேண்டுமோ.....

                        காரணம் வேண்டுமோ.....

                                                         பல்லவி

                                     காரணம் வேண்டுமோ உன்னைத் துதிப்பதற்கு
                                     ஶ்ரீரகுராமா  கருணைக் கடலே

                                                        அனுபல்லவி

                                     பூரணநிலவே சூரிய குலத்தோனே
                                     பாரினில் உனையன்றி தெய்வம் வேறில்லை

                                                               சரணம்

                                     ஆரணப் பொருளே அருமறைகள் போற்றும்
                                     நாரணனே மார்பில் நங்கையை வைத்தவனே
                                     வாரணம் தனக்கபயம் தந்த கேசவனே
                                     வீர ராகவனே  மாரனையீன்றவனே
                                    

தரிசனம் தந்தெனை.......

                            தரிசனம் தந்தெனை.......

                                                             பல்லவி

                                       தரிசனம் தந்தெனைக் காத்தருள்வாய் ராமா
                                       கரிசனம் என் மேல் உனக்கில்லையா ஐயா

                                                           அனுபல்லவி

                                       சரி நிகர் சமானமில்லாத கேசவனே
                                       கிரிதனைக் குடையாக்கி குவலயம் காத்தவனே

                                                                சரணம்

                                       கரிக்கும் காரிகைக்கும்பயமளித்தவனே
                                       பரிவுடனடியார்க்கு நல்லருள் புரிபவனே
                                       விரிகமல மலரை நாபியில் வைத்திருக்கும்
                                       அரியே  அனைவரும் வணங்கிடும் பரம்பொருளே.
                                     
                                     
                                       

இது என்ன மாயம்..........

                     இது என்ன மாயம்..........

                                               பல்லவி

                                    இது என்ன மாயம் ஶ்ரீராமா
                                    மதுசூதனனே கேசவனே

                                                அனுபல்லவி

                                     சதுர்மறையும் சதுர்முகனும் துதித்துப் போற்றும்
                                     மதி முகத்தினனே மலர் நாபனே

                                                    சரணம்

                                     எதுகை மோனையுடன் அலங்காரமாய்
                                     புதுப்புது பாடல்கள் உனைப்போற்றிப் பாடுமென்னை
                                     எதுவுமறியாத புதியவன் போல்
                                     உதாசீனமாய்ப் பார்ப்பதென்ன.

தசரதன் மைந்தனே.....

                             தசரதன் மைந்தனே.....

                                                          பல்லவி

                                      தசரதன் மைந்தனே ஶ்ரீராமச்சந்திரனே
                                      இசை ஞானம் பக்தி இரண்டுமெனக்கருள்வாய்

                                                        அனுபல்லவி

                                      குசன் லவனையீன்ற சீதாராமனே
                                      அசுரர் குலமழித்த கேசவனே மாதவனே

                                                            சரணம்

                                      திசைகளையும் கோள்களையும் பிரமனையும் படைத்தவனே
                                      விசும்பு நீர்நிலம்காற்று  அனலும் ஆனவனே
                                      தசமுகனின் தலை கொய்த கோதண்ட ராமனே
                                      முசுகுந்தன் குலத்துதித்த ராகவனே இன்னமுதே
                                       

உன்னைச் சரணடைந்தேன் ........

                     உன்னைச் சரணடைந்தேன் ........

                                                        பல்லவி

                                       உன்னைச் சரணடைந்தேன் ஶ்ரீ ராமா
                                       என்னை ஆண்டருள இதுவே தருணம்

                                                       அனுபல்லவி

                                      அன்னை தந்தை சொல் கேட்டு வனம் சென்ற
                                      இன்னமுதே கேசவனே இனகுலதிலகனே

                                                            சரணம்

                                       முன்னம் அறியாத சிறு வயதில் யான் செய்த
                                       சின்னஞ்சிறிய பிழை அனைத்தையும் பொறுத்து
                                       பன்னக சயனனே பழவினையால் யான் படும்
                                       இன்னல்கள் அனைத்தும் விலகிட வேண்டியே
          

சீதாபதியே.........

                              சீதாபதியே.........

                                                 பல்லவி

                                         சீதாபதியே ஶ்ரீ ராமா
                                         நீதான் கதியென பதம் பணிந்தேன்


                                                      துரிதம்

                                         சுரபதி பசுபதி சரச்வதியின் பதி
                                          நரர்சுரர் நாரதரனைவரும் போற்றும்

                                                 அனுபல்லவி

                                          ஆதாரம் நீயே அனைத்துலகிற்கும்
                                          மாதா கோசலையின் மனங்கவர் மைந்தனே

                                                      சரணம்

                                          வேதாகமங்கள் சாத்திரங்கள் போற்றும்
                                          மேதாவிலாசம் கொண்ட கேசவனே
                                          பாதாரவிந்தம் பணிந்திடுமடியார்க்கு
                                          ஆதாயமளித்திடும் தேவாதி தேவனே
       
           

                                          

வேதம்

வேதம்

ஸ்ருதி ஸ்ம்ருதி புரணேஷு ராமநாம ஸமீரிதம்
தந்நாம கீர்த்தநம் பூய தாபத்ரய விநாஸநம்.

வேதம் ஸ்ம்ருதி புராணம் இவைகளிலே ராம நாமத்தின் ப்ரபாவம் நன்கு எடுத்துச் சொல்லப்பட்டிருக்கிறது. அத்தகைய ராம நமாவை ஸங்கீர்த்தநம் செய்பவர்களுக்கு ஆதயாத்மிகம்,ஆதிபௌதிகம்,ஆதிதைவிகம் என்ற மூவகைத் தாபங்களும் அகன்று  விடும் என்பது திண்ணம்.

எனக்கென்ன மனக்கவலை........

                    எனக்கென்ன மனக்கவலை........

                                                      பல்லவி


                                       எனக்கென்ன மனக்கவலை ஶ்ரீராமா
                                       உனதிரு பதமே கதியெனத் துதித்தபின்

                                                     அனுபல்லவி

                                       தனக்குவமையில்லாத தனிப்பெரும் தெய்வமே
                                       அனைத்தும் நீயே ஆதி கேசவனே

                                                        சரணம்

                                        வனமாலை துளபம் கௌத்துபமணிந்தவனே
                                        சனகாதி முனிவரும் நரர்சுரரும் வணங்கிடும்
                                        அனந்த சயனனே ஆதிமூலமே
                                        ஜனன மரண பயம் களைந்தேன் உனதருளால்
 
                                      

தெய்வ பக்தியில்லாத.......

                           தெய்வ பக்தியில்லாத.......

                                                  பல்லவி

                                  தெய்வ பக்தியில்லாத இசை ஞானம் வீணே
                                  மெய்ப்பொருளே ராமாஇரண்டும் எனக்கருள்வாய்

                                                அனுபல்லவி

                                  பொய்யும் புரட்டும் மலிந்த இவ்வுலகில்
                                  மெய் ஞானம் பெறவே உனைப் பணிந்தேன் கேசவனே

                                                      சரணம்

                                  செய்யாதன எதுவும் செய்யாதிருந்திடவும்
                                  ஐயமும் பிச்சையும் இயன்றவரை செய்திடவும்
                                  வையத்து வாழ்ந்திடும் மனிதருக்கு உதவிடவும்
                                  பையத்துயின்றிடும் பரமனே வேண்டினேன்
                                 
                                  

கண்ணனும் நீயே........

                            கண்ணனும் நீயே........

                                                           பல்லவி

                                       கண்ணனும் நீயே ராமனும் நீயே
                                       வண்ணமுற எனைக் காக்கும் தெய்வமும் நீயே

                                                        அனுபல்லவி

                                       எண்ணமெலாம் உனையே நினந்துருகி தினமும்
                                       பண்ணிசைத்து பாடித் துதித்தேன் கேசவனே

                                                            சரணம்

                                       உண்ணும் சோறும் பருகும் நீரும்
                                       தின்னும் வெற்றிலையும் அனைத்தும் நீயே
                                       விண்ணவரும் மண்ணவரும் வியந்து போற்றும்
                                       மண்ணையுண்ட வாயனே தசரத ராமனே
                                     

                                                             

இனிது உன் நாமம் .........

                           இனிது உன் நாமம் .........

   

                                                     பல்லவி

                                          இனிது உன் நாமம் ஶ்ரீ ராமா
                                          இனிது உன் வதனம் இனிது உன் மேனி

                                                    அனுபல்லவி

                                          இனிது உன் கண்கள் இனிது உன் தோள்கள்
                                          இனிது உன் புன்னகை இனிது உன் பேச்சு

                                                         சரணம்

                                           இனிது அயோத்தி மக்கள் இனிது
                                           இனிது உனை மணந்த சீதையும் இனிது
                                           இனிது நான் வணங்குமுன் திருவடி இனிது
                                           இனிது கேசவனே உனதனைத்தும் இனிது
       





 

தஞ்சமென்றுனை.........

                               தஞ்சமென்றுனை.........

                                                        பல்லவி

                                  தஞ்சமென்றுனைப் பணிந்தேன் தாமரைப் பாதனே
                                  வஞ்சனை செய்யாமல் எனக்கருள் புரிவாய்

                                                      அனுபல்லவி

                                  கஞ்சனைக் காய்ந்த இன்னமுதே கேசவனே
                                   நெஞ்சார உன் நாமம் நாளும் துதித்து

                                                          சரணம்

                                   அஞ்சனவண்ணனே அயோத்தி மன்னனே
                                   நஞ்சரவணை துயிலும் நாராயணனே
                                   வெஞ்சமரிலரக்கர் குலமழித்த ராகவனே
                                   குஞ்சரமன்னனுக்கு அபயமளித்தவனே

                                   

நேசமுடன்.......

                                நேசமுடன்.......

                                                          பல்லவி

                                         நேசமுடன் பேச உனக்கென்ன தயக்கம்
                                         ஆசையுடன் பணிந்த என்னுடனே ராமா

                                                        அனுபல்லவி

                                           ஈசன் சிவபெருமான் போற்றும் கேசவனே
                                           கோசலைப்புதல்வனே மாசிலாமணியே

                                                             சரணம்

                                          தாசனெனப் பணிந்த மாருதியுடனுமே
                                          பேச  இளையவனைத் தானே பணித்தாய்
                                          வாச மலர் தூவி நாளுமுனைத்துதிக்கும்
                                          நீசனெனை நீயே காத்தருள்வாயே

                                                     

வேறொரு தெய்வம்......

                       வேறொரு தெய்வம்......

                                                      பல்லவி

                                 வேறொரு தெய்வம் எனக்கில்லை உலகில்
                                 ஆராவமுதே கேசவனே ஶ்ரீ ராமா

                                                    அனுபல்லவி

                                 பூரணசந்திரனை பழிக்கும் முகமுடையவனே
                                 நாரணனே நாற்கவி போற்றும் பேரழகே

                                                      சரணம்

                                 பாரினில் உனக்கிணை வேறே யாருளர்
                                 நீர்நிலை குளங்கள் சமுத்திரமாகுமோ
                                 நாரதர் நான்முகன் நரர்சுரர் பணிந்திடும்
                                 சூரிய குலத்தோனே மாரனைப் படைத்தவனே
                                 

பலவிதமாயுன்னை.......

                        பலவிதமாயுன்னை.......   

                                                    பல்லவி

                                    பலவிதமாயுன்னை பாடி த்துதித்தேன்
                                    நலமருள்வாயே ஶ்ரீ ஜெயராமா

                                                     அனுபல்லவி

                                    உலகனைத்தும் படைத்தும் காத்தும் கேசவனே
                                    நிலைநிறுத்தியும் லீலைகள் புரிபவனே

                                                         சரணம்

                                    நிலமகள் சீதையை மணம் புரிந்த ராகவனே
                                    நலந்தரும் நாமங்கள் பல உடையவனே
                                    விலங்கெனத்திரிந்திடும் புலன்களனைத்துமொரு
                                    நிலைபெற வேண்டி மலரடி பணிந்து
                         
                                   
                                   
                       

   

கோடிவினை தீர்க்கும்......

                      கோடிவினை தீர்க்கும்......

                                     

                                       பல்லவி

                                         கோடிவினை தீர்க்கும் கோதண்டராமனை
                                         நாடித் துதித்தேன் நல்லருள் பெற வேண்டி

                                                          அனுபல்லவி

                                         வாடிடுமடியார்கள் நலம் பேணும் கேசவனை
                                         ஈடிணையில்லாத கலியுக க்கடவுளை

                                                              சரணம்

                                         நாடித்துதித்த கரிக்கபயம் தந்தவனை
                                         வேடிக்கையாய் பல லீலைகள் செய்தவனை
                                         சூடிக்கொடுத்த சுடர்க்கொடி நேசனை
                                         பாடிக் கொண்டாடி பாதம் பணிந்து
                                       
                                         

இரக்கம் வரவில்லையா........

                                இரக்கம் வரவில்லையா........

                                                          பல்லவி

                                         இரக்கம் வரவில்லையா ஶ்ரீராமா
                                         கரம் கூப்பி சிரம்தாழ்த்தி உனை வணங்கும் என்மீது

                                                        அனுபல்லவி

                                          நரனாய்ப் பிறந்து நல்வழி காட்டி
                                          அரக்கர் குலமழித்த அழகிய கேசவனே

                                                              சரணம்

                                          அரியே கோவிந்தா என்றலறியழைத்த
                                          கரிக்கும் காரிகைக்கும் அபயமளித்தாயே
                                          வரம் பெற்ற அகலிகைக்கு சாபவிமோசனமும்
                                          பரிவுடன் சபரிக்கு பரகதியும் தந்தாயே
                                  

அடைக்கலம் நீயே....

                     அடைக்கலம் நீயே....

                                                        பல்லவி

                                      அடைக்கலம் நீயே ஆரமுதே ராமா
                                      கடைக்கண் வைத்தெனை காத்தருள்வாயே

                                                       அனுபல்லவி

                                      படைநடத்தி அரக்கர் குலமழித்த கேசவனே
                                      இடை மெலிந்த சீதையின் கரம் பிடித்த ராகவனே

                                                             சரணம்

                                      இடையர் குலம் காத்த மதுசூதனனே          
                                      குடையாக க்குன்றேந்தி குவலயம் காத்தவனே
                                      விடையேறும் ஈசன் மகேசன் நேசனே
                                      தடையின்றி உனதருள் கிடைத்திடப் பணிந்தேன்
                         

நிகருனக்கொருவர்.........

                       நிகருனக்கொருவர்.........

                                                          பல்லவி

                                     நிகருனக்கொருவர் இல்லை இவ்வுலகில்
                                     அகிலம் போற்றும் கல்யாண ராமா

                                                         அனுபல்லவி

                                     பகலவன் குலத்துதித்த மாதவனே கேசவனே
                                     இகபரமிரண்டிலும் சுகமளிக்கும் ராகவனே

                                                             சரணம்

                                       குகனுடன் ஐவரென்று நேசமுடனுரைத்தவனே
                                       புகழ்மிகு அயோத்தி மாநகர் மன்னனே
                                       சகமனைத்தும் புகழும் சீதையின் நாயகனே
                                       புகலெனப் பணிந்து உனைச்சரணடைந்தேன்
                                     
                                     
                                     

                                      

நீயருள்வாய்......

                         

                               நீயருள்வாய்......

                                                      பல்லவி

                                       நீயருள்வாய் ஶ்ரீ ரகு குலதிலகா
                                       தாயினும் மேலான தயாபரனே எனக்கு

                                                    அனுபல்லவி
             
                                        ஞாயிறை மிஞ்சும் தேசுடைய கேசவனே
                                        ஆயிரம் நாமங்களுடைய ராகவனே
                                       
                                                          சரணம்

                                         தூயவனே துயர் துடைத்திடும் மாயனே
                                         மாய மானைக்கொன்ற சீதாராமனே
                                         நேயமுடன் உனது திருவடி பணிந்தேன்
                                         நோயெனும் பவவினை அகன்றிட வேண்டினேன்
                                       
                                       

தாள் பணிந்தேன்........

                              தாள் பணிந்தேன்........

                                                             பல்லவி

                                        தாள் பணிந்தேன் ராமா தயை புரிவாயே
                                        ஆள்வதுன் தர்மம் நீயறியாயோ

                                                          அனுபல்லவி

                                         நாள் முழுதும் உன் நாமமே துதித்தேன்
                                         தோள்வலியில் சிறந்த கேசவனே ரகுராமா

                                                               சரணம்
                                       
                                         வேள்விகள் தடையின்றி முனிவர்கள் நடத்திட
                                         ஆளென நின்று உதவிய ராகவனே
                                         நீள் விசும்பு அனல் புனல் காற்று நீரானவனே
                                         மாள்வதும் பிறப்பதுமாயான என் சுழலொழிய
                                          

கண்ணுறங்கு...........

                                  கண்ணுறங்கு...........

                                                       பல்லவி

                               கண்ணுறங்கு கண்ணுறங்கு ஶ்ரீராமா கண்ணுறங்கு
                               பண்ணிசை பாடி பதமலர் பணிந்தேன்

                                                    அனுபல்லவி

                               மண்ணிலவதரித்து மானிடனாய்த் திரிந்த
                               புண்ணியனே புவனம் போற்றும் கேசவனே

                                                          சரணம்

                               கண்டவர் மனம் மயங்கும் கருமணியே இன்னமுதே
                               புண்டரிக மலரமர்ந்து புவனம் படைத்தவனே
                               தென்னிலங்கை அரக்கர்தம் சிரம் கொய்த மன்னவனே
                               எண்திசையும் புகழ் விளங்கும் செம்பொன்னே தேனே

                               விண்ணவரும் மண்ணவரும் வியந்து பாராட்டும்
                               தண்மதி முகத்தோனே தாமரை பதத்தோனே
                               பெண்மணி சீதையின் மனம் கவர்ந்த பேரழகே
                               கண்மணியே ராகவனே கோசலை மைந்தனே

                             
                             
                             
                             
                               
                             
           

அருள் தரும் ஶ்ரீராமன்.......

                         அருள் தரும் ஶ்ரீராமன்.......

                                                               பல்லவி

                                             அருள் தரும் ஶ்ரீராமன் பதமலர் பணிந்தேன்
                                             இருள் சூழென் வாழ்வு ஒளியுறச் செய்திட


                                                                துரிதம்

                                              நரர்சுரர் நாரதர் சுகசனகாதியர்
                                              பிரமன் இந்திரன் கரம் பணிந்தேத்தும்

                                                             அனுபல்லவி

                                              கருடன் மீதேறி பவனி வரும் கேசவன்
                                              தரும நெறி காக்க அவதாரமெடுத்தவன்

                                                                 சரணம்

                                              துருவனுக்கும் பாலன் பிரகலாதனுக்கும்
                                              கருணையுடன் காட்சி தந்து அவரிடர் தீர்த்தவன்
                                              துருபதன் மகளின் மானம் காத்தவன்
                                              பெருமை மிகு கோசலையின் அருமை மைந்தன்


                                           
                                               

தாமரைக் கண்ணனே........

                       தாமரைக் கண்ணனே........

                                                        பல்லவி

                                          தாமரைக் கண்ணனே ஶ்ரீராமா
                                          தூமலர் தூவியுன் பாதம் பணிந்தேன்

                                                        அனுபல்லவி

                                          நேம நிஷ்டைகள் எதுவும் நான் செய்ததில்லை
                                           நாம பஜனை யொன்றே செய்து துதித்தேன்
                                         

                                                             சரணம்

                                          பாமரர் பண்டிதர் அனைவரும் துதித்திடும்
                                          காமனைப் படைத்த கேசவனே ரகுராமா                                      
                                          பூமியில் ஜென்மம் எடுத்து சலித்தேன்
                                          தாமதமின்றியே மோட்சம் தந்திடுவாய்
                                         
                                         
                                                   

தயரதன் மைந்தனே......

                        தயரதன் மைந்தனே......

                                                    பல்லவி

                                    தயரதன் மைந்தனே தயாகரனே
                                    தயவளித்தெனையே காத்தருள்புரிவாய்

                                                   அனுபல்லவி

                                   அயனுடன் அமரரும் அமரேந்திரனும்
                                   நயமுடன் பணிந்தேத்தும் ஶ்ரீ ஜெயராமா

                                                       சரணம்

                                    கயவராய்த் திரிந்த அரக்கர் குலத்தை
                                    புயலெனத் தோன்றி வதைத்த கேசவனே
                                    இயலிசை நாடக நாட்டியப் பிரியனே
                                    துயரறு சுடரடி தொழுது பணிந்தேன்
                                   

அழகிய ரகுவரனை.......

                           அழகிய ரகுவரனை.......

                                                           பல்லவி

                                     அழகிய ரகுவரனை அயோத்தியர் கோமானை
                                     பழகு தமிழில் பாடி மனமாரத்துதித்தேன்

                                                       அனுபல்லவி

                                      நிழலென இளையவனும் திருமகளும் உடனிருக்க
                                      கழலடி பணிந்து அனுமனும் அமர்ந்திருக்கும்

                                                            சரணம்
                                    
                                      முழுமதி முகமும் கதிரவனொளியும்
                                      திகழும் தேசுடைய இனகுல திலகன்                                                      
                                      சுழலும் சக்கரமும் சங்கும் வைத்திருக்கும்
                                      குழலூதும் கண்ணனும் கேசவனுமவனே