சமயம் இதுவே

                                             
                                                சமயம் இதுவே



                                                    பல்லவி

                                         சமயம் இதுவே  கேசவா
                                         நமஸ்கரித்திடும் என்னை ஆண்டருள

                                                   அனுபல்லவி

                                         அமரரும் முனிவரும் இந்திரனும் பிரமனும்
                                         நமச்சிவாயனும் பணிந்திடும் மலனே

                                                      சரணம்

                                         கமலமலரமர் திருமகள் மார்பனே
                                         கமலநாபனே மதுசூதனனே
                                         நமனாய்க் கம்சனைக் காய்ந்த கண்ணனே
                                         சமம் தனக்கொருவரும் இல்லாத தேவனே

கார்த்திகேயன்

                                          கார்த்திகேயன்


                                                பல்லவி

                           கார்த்திகேயனை கௌரிமைந்தனை
                           கீர்த்திமிகு குமரனை பணிவுடன் துதித்தேன்

                                              அனுபல்லவி

                           பார்த்தவர் மனம் களிக்கச் செய்திடும் அழகனை
                           கூர் வேலேந்தும் வேலாயுதனை
         
                                                   சரணம்

                           நாற்கவிகள் கொண்டாடும் சேவற்கொடியோனை
                           நாற்றிசையும் புகழ் விளங்கும் கேசவன் மருகனை
                           ஆற்றுப்படை போற்றும் பாடல் நாயகனை
                           ஏற்றமிகு கந்தனை சிங்காரவேலனை

பச்சைமலை முருகன்

                                        பச்சைமலை முருகன்



                                                  பல்லவி

                          பச்சைமலை முருகனை காண வேண்டுமென
                          இச்சை கொண்டு துதித்தேன் எனக்கருள்வாயென

                                               அனுபல்லவி

                          அச்சுதன் கேசவன் விரும்பும் மருகனை
                          நச்சரவணிந்த ஈசன் சிவன் மகனை

                                                    சரணம்

                          துச்சமாய் சூரனை வதம் புரிந்தவனை
                          மெச்சி வானோர் போற்றும் கார்த்திகேயனை
                          பச்சிளம் பாலனாய் பழனியில் நின்றவனை
                          இச்சகம் புகழும் சேவற்கொடியோனை
                          

ஏழுமலையான்

                                     ஏழுமலையான்


                                            பல்லவி

                        எங்கும் நிறைந்திருக்கும் ஶ்ரீநிவாசனை
                        ஏழுமலையானை பக்தியுடன் துதித்தேன்

                                          அனுபல்லவி

                        மங்கையலமேலு கைத்தலம் பற்றிய
                        வெங்கடாசலபதியை பங்கயபதத்தானை

                                               சரணம்

                        சங்கும் சக்கரமும் கையிலேந்தும் கேசவனை
                        பங்கயநாபனை பரமதயாளனை
                        சிங்கமுகத்தானை சங்கரன் நேசனை
                        சங்கடம் களைந்திடும் ஶ்ரீமன் நாராயணனை

புள்ளிமயில் வாகனன்

                                    புள்ளிமயில் வாகனன்


                                             பல்லவி

                          வள்ளி தெய்வானை மணவாளா
                          புள்ளிமயில் வாகனா காத்தருள்வாய்

                                           அனுபல்லவி

                          உள்ளன்புடன் துதிக்கும் அடியவர்க்கெல்லாம்
                          வெள்ளமெனக் கருணையளித்திடும் கந்தனே

                                               சரணம்
                         
                          தெள்ளுதமிழ் வளர்த்த சங்கம்தனை வளர்த்த
                          தெள்ளியனே குகனே கேசவன் மருகனே
                          முள்ளாயுறுத்தும் பவவினை களைந்தெனை
                          அள்ளியணைத்து ஆண்டருள வேண்டினேன் 

அரங்கன்

                                           அரங்கன்


                                             பல்லவி

                         முரளீதரனை முகுந்தனைக் கேசவனை
                         பரந்தாமனைப் பணிவுடன் துதித்தேன்

                                             துரிதம்

                         நரர் சுரர் நாரதர் நான்முகனிந்திரன்
                         சுகசனகாதியரனைவரும் துதித்திடும்
                                     
                                          அனுபல்லவி

                          இரக்கமுடன் பக்தரைக் காத்திட அவதரித்து
                          அரக்கரை வதம்செய்த மாலனை வாமனனை

                                                 சரணம்

                           வரம் தரும் திருக்கரமும் அபயகரமும் காட்டும்
                           பரமதயாளனை  புண்டரீகாக்ஷனை
                           தரணியில் புகழ்மிகு திருவரங்கம் திருத்தலத்தில்
                           அரங்கனாயெழுந்தருளி அரவணையில் பள்ளி கொண்ட

அம்புஜவல்லி

                                    அம்புஜவல்லி


                                        பல்லவி

                      அம்புஜவல்லியுன் அரவிந்த பதம்தனை
                      நம்பித்துதித்தேன் நலம் தருவாயென

                                       துரிதம்

                       உம்பர்கள் முனிவர்கள் நாரதர் நான்முகன்
                       அம்பிகை கலைமகள் அனைவரும் போற்றும்

                                      அனுபல்லவி

                       அம்புஜநாபன் கேசவன் மணிமார்பில்
                       அழகுடன் வீற்றிருக்கும் கடலரசன் மகளே

                                           சரணம்

                       பம்பரமாக சுழலுமிவ்வுலகின்
                       சாட்டையைக் கையிலேந்தி ஆட்டுவிக்கும்
                       பாம்பணைமேல் பள்ளிகொண்ட நாராயணனின்
                       அன்பு மனங்கவர் அலைமகளே திருமகளே

பாத தரிசனமே

                                              பாத தரிசனமே


                                                      பல்லவி

                                 பாத தரிசனமே புண்ணியம் - கோவிந்தன்

                                                  அனுபல்லவி
       
                                   வேதமுதல்வன் நாதவடிவினன்
                                   மாதவன் கேசவன் மதுசூதனன்

                                                        சரணம்

                                    கீதையை ஓதிய  வாசுதேவன்
                                    பூதனையரக்கியைக் கொன்ற கண்ணன்
                                    யாதவன் நந்தகோபன் குமரன்
                                    ராதையின் மனங்கவர் தேவகிமைந்தன்




      ( தாளம்: கண்ட த்ருபுடை)
            

கமலமலரமர்

                                       கமலமலரமர்


                                                பல்லவி

                                 கமலமலரமர் மயூரவல்லியின்
                                 கமலபதங்களை களிப்புடன் பணிந்தேன்

                                              அனுபல்லவி

                                 கமலநாபன் கேசவன் மனங்கவர்
                                 செங்கமலவல்லி செல்வாம்பிகையின்

                                                 சரணம்

                                 அமரரும் முனிவரும் உமையும் பாரதியும்
                                 அமரேந்திரனும் நாரதரும் நான்முகனும்
                                  நமஸ்கரித்து கரம் பணிந்தேத்தும்
                                  அமுதவல்லியெனை காத்தருள வேண்டுமென

அனந்தபுரம் பத்மநாபன்

                                            அனந்தபுரம் பத்மநாபன்

                                                       பல்லவி

                           பாம்பணைமேல் பள்ளிகொண்ட பத்மநாபன் பதம் பணிந்தேன்
                           அனந்தபுரம் திருத்தலத்தில் அழகுடன் காட்சி தரும்

                                                      அனுபல்லவி

                           பாம்பின் தலைமீது கால் வைத்து நடம் புரிந்த
                           ஶ்ரீக்ருக்‌ஷ்ணன் கேசவன் யாதவகுல திலகன்

                                                           சரணம்

                           உலகுயிரனைத்தையும் படைத்தும் காத்தும்
                           நிலைபெறச்செய்தும் பலவித விளையாடல்
                           எளிதுடன் செய்திடும் பரமபுருஷன்
                           நிலம் நீர் நெருப்பு காற்று வெளியானவன்

திருவுள்ளமிரங்காதா

                                திருவுள்ளமிரங்காதா


                                       பல்லவி

                       திருவுள்ளமிரங்காதா கோவிந்தா
                       உருகித்துதித்திடும் உனதடிமையெனைக்காக்க

                                     அனுபல்லவி

                       அருகினில் நீயிருந்தும் அறியாமல் நானிருந்தேன்
                       கருணைக் கடலே ஒருமுறை காட்சிதர

                                           சரணம்

                        பெருமைமிகு திருமலையில் கோயில்கொண்டிருப்பவனே
                         அருமறைகள் போற்றும் திருவேங்கடமுடையானே
                         திருவடி தரிசனம் தந்தாலும் போதும்
                         பெருமிதம் கொள்வேன் ஆனந்தமடைவேன்

ஶ்ரீ நிவாசன்

                     

                                                ஶ்ரீ நிவாசன்


                                                     பல்லவி


                           திருமகளைத் திருமார்பில் தாங்குகின்ற திருமாலின்
                           திருவடிக் கமலங்களை அனுதினம் துதித்தேன்

                                                  அனுபல்லவி

                          அருமறைகள் சாஸ்த்ரபுராணங்கள் போற்றும்
                          பெருமைக்குரிய ஆதிகேசவனின்

                                                     சரணம்

                           வருமிடர் துயர்களை பழவினைப் பயன்களை
                           எரிமுன்னர் வைத்தூறு போலழிக்கும் மாதவனின்
                           திருமலையில் எழுந்தருளி பக்தருக்கு காட்சி தரும்
                           திருவேங்கடமுடையானின் தீனசரண்யனின்

குழந்தை கண்ணன்

                               குழந்தை கண்ணன் 

                                    பல்லவி

              குழந்தை கண்ணனின் மழலை முகம் கண்டு

              ஆனந்தம் கொண்டேன் பரவசமடைந்தேன்

                                  அனுபல்லவி

              அழகிய மயில்பீலி கொண்டையில் சூடி

              நெத்திச்சுட்டியும் கண்மையும் திகழ்

                                    சரணம் 

              தண்டையும் கொலுசும் கால்களிலணிந்து

              குண்டலங்கள் காதில் பொலிவுடன் தொங்க

              முத்துமாலை தோள்வளை கைவளை குலுங்க

              எழிலுடன் விளங்கும் மாதவன் கேசவன்

              

                       

திருவடி சரணம்

                                திருவடி சரணம்



                                            பல்லவி

                        திருவடி சரணடைந்தேன் கோவிந்தா
                        கருணைக் கடலே உனதருள் வேண்டியே

                                         அனுபல்லவி

                         இருவினைப்பயன்கள் இருளெனச்சூழ
                         கருநிறக்கேசவனே ஒளிதருவாயென

                                            சரணம்

                         அரும்பெரும் பதவிகள் போகம் வேண்டாம்
                         பெரும் புகழ் செல்வம் எதுவும் வேண்டாம்
                         ஒருமுறை உந்தன் எதிரில் நின்று
                         தரிசனம் செய்திடும் பாக்யமே போதும்

கோவிந்தன் நாமம்

                                  கோவிந்தன் நாமம்
         

                                          பல்லவி

                         ஆனந்தம் ஆனந்தம் ஆனந்தமே
                         கோவிந்தன் திருநாமம் சொன்னாலும் போதும்

                                        அனுபல்லவி

                        தேனந்தத் திருநாமம் நாவாரச்சொல்வோர்க்கு
                        தானந்தமில்லாத கடல்வண்ணன் திருநாமம்

                                            சரணம்

                        கோவிந்தன் நாமமே சுவையான பாயசம்
                        கேசவன் நாமமதில் இனிப்பூட்டும் சர்க்கரை
                        பாழான இவ்வுலக பந்தங்களை விடுத்து
                        நாமந்த கோவிந்தன் திருநாமம் துதிப்போம்

ஆதிகேசவன்

                                 ஆதிகேசவன்



                                              பல்லவி

                          ஆதிகேசவனை மனமாரப் பணிந்தேன்
                          ஆதியந்தமில்லாத  பரம்பொருளை

                                            அனுபல்லவி

                           மேதினியோர் கொண்டாடும் கீதையின் நாயகனை
                           மாதவனைக் கண்ணனை திருவேங்கடமுடையானை

                                                சரணம்

                           திருமலையில் நின்றருளும் மலையப்பசுவாமியை
                           திருவுறை மார்பனை ஶ்ரீநிவாசனை
                           இருநாலெழுத்தானை ஶ்ரீமன் நாராயணனை
                           ஈரேழுலகமும் போற்றும் ஏழுமலையானை

கேசவன் ( பிறந்தநாள் வாழ்த்து)

                                 கேசவன் ( பிறந்தநாள் வாழ்த்து)


                                               பல்லவி

                          கேசவனை வரவேற்றோம் ஆசையுடன் கூடி
                          நேசனவன் பிறந்த நாளைக் கொண்டாடி

                                            அனுபல்லவி

                          நீசரை மாய்த்து தாசரைக் காத்திடும்
                          பாசம் நிறைந்த பாற்கடல் வாசனை

                                                 சரணம்
                 
                            வாசமலர் தூவி நைவேத்தியம் செய்து
                            ஆசுகவி பாடி தோத்திரங்கள் சொல்லி
                            மாசிலாமணியை மாயக்கண்ணனை
                            ஆசி வேண்டியே அவன் தாள் பணிந்து
        

அலமேலுமங்கை மணாளன்

                               அலமேலுமங்கை மணாளன்


                                              பல்லவி

                           திருவுளமிரங்கி எனக்கருள் கேசவா
                           திருமகள் அலமேலுமங்கை மணாளா

                                             அனுபல்லவி

                           கருநீலவண்ணனே கமலக்கண்ணனே
                           திருவேங்கடமலையில் வீற்றிருப்பவனே

                                                 சரணம்

                           தருமநெறி காக்க அவதாரம் பல எடுத்த
                           அருமாகடலமுதே மாதவா கோவிந்தா
                           பெரும்பிணி பவக்கடல் நீங்கிடச் செய்து
                           ஒருமுறை உனது தரிசனம் தந்து

    

                 ஆபத்தில் காத்து நிற்கும் குடையாய் நீ
                 காபந்து செய்து காத்தருள்வாய் கண்ணா

                 கோபர்கள் குலம் காக்க பண்டொருநாள்
                 குன்றுதனைக் குடையாகப் பிடித்தவனே
                 சாபங்கள் தந்திடும் முனிவர்களும்
                  ஆபால பூபாலரனைவருமே உனக்கு
                  சோபனம் பாடிக்கொண்டாடும்
                  பெருமைக்குரிய கருநீலவண்ணனே

                  ஆபத்தில் காத்து நிற்கும் குடையாய் நீ
                  காபந்து செய்து காத்தருள்வாய் கண்ணா

                  

கோவிந்தா கோவிந்தா கோவிந்தா

                             கோவிந்தா கோவிந்தா கோவிந்தா

                   
                                              பல்லவி

                           கோவிந்தா கோவிந்தா கோவிந்தாவென்று
                           நாவந்த கோவிந்தன் நாமமுரைக்கட்டும்

                                              அனுபல்லவி

                             கோவிந்தா கோவிந்தா கோவிந்தாவென்று

                             செவியந்த கோவிந்தன் நாமமே கேட்கட்டும்

                                                    சரணம் 

                            கோவிந்தா கோவிந்தா கோவிந்தாவென்று

                            மனமந்த கோவிந்தன் நாமமே துதிக்கட்டும்

                            கோவிந்தா கோவிந்தா கோவிந்தாவென்று

                            விழியந்த கோவிந்தன் வடிவழகைப் பருகட்டும்

                            கோவிந்தா கோவிந்தா கோவிந்தாவென்று

                            கூப்பிய கரமிரண்டும் பாதம் பணியட்டும்

                            கோவிந்தா கோவிந்தா கோவிந்தாவென்று

                            உடலந்த கோவிந்தன் திருவடியை வணங்கட்டும்

திருமால் பெருமை

                                    திருமால் பெருமை

                                              பல்லவி 

                         திருமலையில் கோயில் கொண்ட கோவிந்தா

                         திருமாலிருஞ்சோலைக் கள்ளழகா

                                           அனுபல்லவி 

                          திருக்குடந்தைதனில் கிடந்த சாரங்கா

                          திருவரங்கம் தனில் துயிலும் அரங்கனே கேசவா

                                               சரணம் 

                           திருத்தலங்கள்தோறும் காட்சிதரும் திருமாலே

                           திருவுறைமணிமார்பா திருவேங்கடமுடையானே 

                           திருவனந்தபுரம் தன்னில் பள்ளிகொண்ட பத்மநாபா

                           திருவருள் வேண்டியுன் திருப்பாதம் பணிந்தேன்

அயோத்தி ராமன் ( ராமஜென்மபூமி)

                         அயோத்தி ராமன்  ( ராமஜென்மபூமி)

                                        பல்லவி

                    அயோத்தி ராமனை மனமாரப் பணிந்தேன்
                    சரயூ நதிக்கரை தனில் நின்று காட்சிதரும்

                                     அனுபல்லவி

                   சுயம்வரம் தனிலே வில்வளைத்தொடித்து
                   ஜானகி தேவியின் மலர்க்கரம் பற்றிய

                                         சரணம்

                   மாதவம் புரிந்திடும் முனிவர்களும் மற்றும்
                   சீதாதேவியும் இளையவன் இலக்குவனும்
                   ஆஞ்சநேயனும் கரம்பணிந்தேத்தும்
                   ஆதவகுலத்துதித்த நாயகன் கேசவன்        ( அயோத்தி...)

                   நூதனமான பேதங்களால் வந்த
                   வேதனைகள் தீர வேண்டுமென்று
                   சோதனைகள் பல கடந்து வந்து
                   மாதவனவனை வேண்டியே துதித்து             ( அயோத்தி....)

மயூரவல்லி

                                                மயூரவல்லி



                                                   பல்லவி

                         பொன்மழை பொழிந்திடும் திருமகளைத் துதித்தேன்
                          கன்ம வினைகளைந்து இன்னருள் தந்து
                     
                                                அனுபல்லவி

                         கன்றின் குரல் கேட்டு மடிசுரந்த பசுவைப்போல்
                         அன்புடன் சங்கரர் வேண்டிய வண்ணம்

                                                    சரணம்

                          பன்னகசயனன் கேசவன் திருமார்பில்
                          மின்னும் சோபையுடன் வீற்றிருப்பவளை
                          நன்னெறி தழைக்கும் திருமயிலை திருத்தலத்தில்
                          இன்பமுறக் காட்சி தரும் மயூரவல்லியை
                         
                       

                       

                       

திருவாடானை ஆதிரத்தினேச்வரன்

       
       
                                     திருவாடானை ஆதிரத்தினேச்வரன்



                                                   பல்லவி

                            நாற்றிசையும் புகழ் விளங்கும் ஆதிரெத்தினேச்வரனை
                            போற்றித்துதித்தேன் பவபயம் களைந்தேன்

                                              அனுபல்லவி

                            காற்று நிலம் நீர் நீள்விசும்புமாகி
                            ஏற்றமுடன் ஆடானைத் திருத்தலத்தில் வீற்றிருக்கும்

                                                  சரணம்

                            நேற்று இன்று நாளையும் நீயே
                            கூற்றனே உன்னருளொன்றே போதும்
                            மாற்றெதுவும் வேண்டேன் கேசவன் நேசனே
                            சாற்றிய திருநீற்றின் பொலிவுடன் திகழும் 

பாகம்பிரியாள்

                                         பாகம்பிரியாள்


                                               பல்லவி

                         பாகம்பிரியாளின் பாதகமலங்களை
                         பற்றித் துதித்தேன் பரவசமடைந்தேன்

                                            அனுபல்லவி

                         சேகரன் பங்கிலுறை சங்கரி ஈச்வரி
                         நாகத்தணையான் கேசவன் சோதரி

                                                சரணம்

                         ஆகமவேத புராணங்கள் போற்றும்
                         ஏகாம்ரேச்வரி காமாட்சி பைரவி
                         சோகம் களைந்தென் மன இருள் நீங்கிட
                         வேகமாய் வந்து ஆண்டருள வேண்டுமென 

பர்வதவர்த்தினி

                                 
                                   பர்வதவர்த்தினி


                                         பல்லவி

                      பர்வதவர்த்தினியின் பாதம் பணிந்தேன்
                      தர்மநெறி தழைக்கும் ராமேஸ்வரம் தலத்தில்

                                       அனுபல்லவி

                       சிற்பரன் ராமநாதனும் பிரமனும்
                       விற்கலை வேந்தன் ஶ்ரீராமனும் போற்றும்

                                         சரணம்

                      பர்வதராஜன் மலயத்வசன் மகளை
                      சற்குண நிற்குண கேசவன் சோதரியை
                      கர்மவினைப்பயனால் கட்டுண்டு தவித்து
                      நிற்கதியாய் நிற்கும் எனைக் காக்க வேண்டுமென
                       

ஶ்ரீராமநாதன்

                                      ஶ்ரீராமநாதன்


                                             பல்லவி

                           ஶ்ரீராமநாதனை வந்தனை புரிந்தேன்
                           பேராயிரம் கொண்ட கேசவன் நேசனை

                                           அனுபல்லவி

                           நூறாயிரம் கோடி முனிவரும் தேவரும்
                           ஶ்ரீராமனுடன் சீதை அனுமனும் வணங்கிடும்

                                                 சரணம்

                           தீராவினை தீர்க்கும் தேவாதி தேவனை
                           மாரனை எரித்தவனைக் காலனைக்காய்ந்தவனை
                           ஈராறு கரத்தோனை குருவாகக்கொண்டவனை
                           பாரோர் புகழ்ந்தேத்தும் ராமேஸ்வரம் தலத்தில்

ஈச்வரி

                                   ஈச்வரி


                                   பல்லவி

                    இந்தினிளம்பிறை சூடிய சங்கரி
                    வந்தருள் தந்தெனை இனிதே ஆதரி

                                  அனுபல்லவி

                    பிந்து மண்டலம் தனிலுறை ஈச்வரி
                    சந்த்ரசேகரன் மனங்கவர் சேகரி

                                     சரணம்

                    இந்திராதிதேவரும் முனிவரும் பிரமனும்
                    நந்தியும் கணங்களும் கந்தன் கணபதியும்
                    வந்தனை புரிந்திடும் கேசவன் சோதரி
                    சந்ததம் உந்தன் பாதமே பணிந்தேன்
                 
                 
                    

நீலவண்ணக்கண்ணன்

                         

                நீலவண்ணக்கண்ணன்

                            பல்லவி 

        நீலவண்ணக்கண்ணன் கழலடி பணிந்தோர்க்கு

        காலபயமேது கவலைகளேது

                         அனுபல்லவி 

        கோலமயில் பீலி கொண்டையில் சூடிய

        பாலக்ருஷ்ணன் தேவகி மைந்தன் 

                              சரணம் 

        காலனாய்க் கம்சனைக் காய்ந்த கேசவன் 

        ஆலிலைதனில் துயின்ற ஆய்ப்பாடிக்கள்வன்

        ஞாலமுண்டவாயன் கோகுலபாலன்

        சாலங்கள் பல செய்யும் மாயன் மதுசூதனன்

துணைபுரிந்தருள்

 

 

                    துணைபுரிந்தருள்

                           பல்லவி 

             துணை புரிந்தருள்வாய் கேசவா

             இணையடி நிழலே சதமெனத் துதித்தேன்

                         அனுபல்லவி 

             கணமுமுன் நாமமே உளமார நினைந்து 

             வணங்கினேன் உனதிரு கமலமலர்ப்பதம்

                            சரணம் 

             தணலேந்தும் நெற்றிக்கண்ணனும் பிரமனும் 

             சனகாதி முனிவரும் அமரருமிந்திரனும்

             நாரதரும் திருமகளும் எண்திசை பாலரும்

             பணிந்திடும் பாதனே பாற்கடல் வாசனே

             

காமாட்சி

                                           காமாட்சி


                                               பல்லவி

                            மங்களம் தந்திடும் சங்கரியைத் துதித்தேன்
                            பொங்கும் மூவாசைப் பிணிதனைக் களைந்திட

                                             அனுபல்லவி

                            சங்கரன் பங்கிலுறை அங்கயற்கண்ணி
                            எங்கும் நிறைந்திருக்கும் கேசவன் சோதரி

                                                  சரணம்

                            திங்கள் பிறையணிந்த உமாமகேச்வரி
                            சிங்கவாகனம்தனிலமரீச்வரி
                            சங்கப்புலவர்களின் கவித்திறனை சோதிக்கும்
                            அங்க சௌந்தர்யம் உடைய காமாட்சி
                           
                        

கதறியழைத்தேனே

                                          கதறியழைத்தேனே
                   

                                                       பல்லவி

                                  கதறியழைத்தேனே காதில் விழவில்லையா
                                  உதறிடத்தவறென்ன செய்தேன் கேசவா

                                                    அனுபல்லவி

                                   உதவியென்றழைத்த கரிக்கும் காரிகைக்கும்
                                   இதமுடன் மனமிரங்கி அபயமளித்தவனே
           
                                                         சரணம்

                                   மதுர மொழி பேசும் மாயனே மாதவா
                                   யதுகுல திலகா யாதவ குலதீபா
                                   கதிநீயே அகதியெனை பிழைபொறுத்தாண்டருள
                                   இதுவே தருணம் சரணம் சரணம்
                                   

ஆதிகேசவா

                                           ஆதிகேசவா


                                                  பல்லவி

                           எனைக்காக்க உனையன்றி வேறு யாருள்ளார்
                           அனைத்தும் நீயே ஆதிகேசவா

                                               அனுபல்லவி

                           சுனை நீராய்க் கருணை சுரந்திடும் தெய்வமே
                           பனை போல் பயனளிக்கும் தேவாதி தேவனே

                                                   சரணம்

                            வனவிலங்கெனவே புலன்களனைத்தும்
                            அலைக்கழித்திடுமென் நிலைதனை திருத்தி
                            வினைப்பயனால் நான் படுந்துயர் களைந்திட
                            தினமுமுனைத் துதித்தேன் தீனசரண்யனே
                           
                         
                  

வரலக்ஷ்மி வருக வருக

     

                                   வரலக்ஷ்மி வருக வருக


                                             பல்லவி

                              வருக வருக வரலக்ஷ்மி வருக
                              தருக தருக நலமனைத்தும் தருக

                             
                                               துரிதம்

                            நரர் சுரரிந்திரன் நாரதர் நான்முகன்
                           கரம் பணிந்தேத்தும் மறைபொருள்நீயே

                                            அனுபல்லவி

                             திருமகளுனையே அனுதினம் துதித்தேன்
                             பெருமைக்குரிய கேசவன் நாயகியே

                                                சரணம்

                             பருகிடப் பாயசமும் அன்னமும் இன்னும்
                             பழங்களும் தேனும் பாக்கும் வெற்றிலையும்
                             பெருகிடும் அன்புடன் அனைத்தும் படைத்தேன்
                             அருளளித்தெனையே ஆண்டருள்வாயே

                             ஆவணி திங்கள் வெள்ளிக்கிழமை
                             ஆவலுடன் உனை வரவேற்கின்றேன்
                              பூவிலமர் அலைமகளே என்மனக்
                              கோவிலிலமர்நதிட வரம் தருவாயே
                           

                                             



                             

ஈசன் சிவன் மகன்

                                  ஈசன் சிவன் மகன்


                                             பல்லவி

                      காண்பவர் மனம் மகிழச் செய்திடும் கணபதியே
                      ஆண்டருள்வாயென அடிமலர் பணிந்தேன்

                                           அனுபல்லவி

                      வேண்டுவோர் வேண்டும் வரம் தருபவனே
                      பாண்டவர் நேசன் கேசவன் மருகனே

                                                சரணம்

                       தீண்டுமரவணிந்த விக்னவிநாயகனே
                       தாண்டவம் புரிந்திடும் ஈசன் சிவன் மகனே
                       துவங்கும் கருமங்கள் தடையின்றி நடைபெற
                       அனைவரும் முதல் வணங்கும் ஆனைமுகத்தோனே
              

வாமன கணபதி

                                      வாமன கணபதி

                                             பல்லவி

                          வாமன வடிவில் காட்சி தரும் கணபதியை
                          தூமலர் தூவி மனமாரத் துதித்தேன்

                                            அனுபல்லவி

                          காமனை விடவும் பேரழகுடையவனை
                          ஆமருவியப்பன் கேசவன் மருகனை

                                                 சரணம்

                          சாமமுதல் வேதங்கள் சாத்திரங்கள் போற்றும்
                          ஓமெனும் மந்திரப் பொருளானவனை
                          தாமரைப் பாதனை ஆனைமுகத்தோனை
                          காமக்ரோதாதி அறுபகை நீங்கிட

சங்கரி

                                       சங்கரி

                                        பல்லவி

                           சங்கரி சாம்பவி சந்திரமதி
                           அங்கயற்கண்ணி பதமலர் பணிந்தேன்

                                      அனுபல்லவி

                           சங்கரன் பங்கிலுறை அபிராமி
                           பங்கயநாபன் கேசவன் சோதரி

                                            சரணம்
     
                           திங்கள் பிறையணிந்த கல்யாணி
                           பொங்கரவு சூடிய சிவகாமேச்வரி
                           முங்கிடச்செய்யும் பவக்கடல் கடந்திடவும்
                           சங்கடம் களைந்திடவும் அருள்புரிவாய்

ஏகாம்ரேச்வரி

                                  ஏகாம்ரேச்வரி


                                       பல்லவி

                            ஏகாம்ரேச்வரி  சங்கரி
                            ஶ்ரீகாஞ்சிநகர வாசினி

                                      அனுபல்லவி

                          ஏகாம்ரேச்வரர் உடனிருந்து போற்றும்
                          ஶ்ரீகாமாக்ஷி கேசவன் சோதரி

                                         சரணம்
   
                          மூகாம்பிகையாய் கொல்லூரிலிருப்பவளே
                          பாகம்பிரியாளே பர்வதகுமாரி
                          சோகம் களைந்து சுகமளிப்பவளே
                          பாதம் பணிந்தேன் பரிந்தருள்புரிவாய்

                         

           
                         
                         
                       
                         

ஶ்ரீ லலிதாம்பிகையே

                                    ஶ்ரீ லலிதாம்பிகையே

                                           
                                             பல்லவி

                           பொன்மலைதனிலே வீற்றிருப்பவளே
                           அன்னையே ஶ்ரீ லலிதாம்பிகையே

                                          அனுபல்லவி

                           சென்னகேசவன் சோதரி கெளரி
                           அன்னபூரணி அகிலாண்டேஸ்வரி

                                              சரணம்

                            மன்மதனும் நாணும் பேரழகுடையவளே
                            பன்னகபூஷணி பரமதயாகரி
                            உன்பத மலரே சதமெனத் துதித்தேன்
                            என்னை ஆதரித்தாண்டருள்வாயே