ஶ்ரீ விளையாட்டு விநாயகன்

                     ஶ்ரீ விளையாட்டு விநாயகன்


                               பல்லவி
 
                    ஶ்ரீ விளையாட்டு விநாயகனை
                    மாவிடை வாகனன் மகனைத் துதித்தேன்

                             அனுபல்லவி

                    சேவற்கொடியோன் வள்ளியை மணந்திட
                    ஆவலுடன் உதவிய ஆனைமுகத்தோனை

                                  சரணம்

                    தேவரும் மூவரும் நந்தியும் கணங்களும்
                    யாவரும் வணங்கிடும் கருணைக்கடலை
                    தேவாதி தேவனை வேழமுகத்தோனை
                    ஆவினங்கள் மேய்க்கும் கேசவன் மருகனை
                     

கண்ணெதிரில் கேசவன்

                              கண்ணெதிரில் கேசவன்


                                         பல்லவி

                     கண்ணெதிரில் கண்டாலும் உன்னை அறியாத
                     மூடரை நான் என்னென்று சொல்வேன் கேசவா

                                      அனுபல்லவி

                     தொண்டு செய்பவராய் நேசமுள்ள நண்பராய்
                      திண்ணையிலுறங்கும் மௌனியாய் குருவாய்

                                          சரணம்

                      வண்ணமயில் தோகையில் மின்னும் பேரழகாய்
                      தண்மதியாய் தாரகையாய் வானவெளியில் கதிரவனாய்
                      வண்ணமுள்ள பூக்களாய் அதில் தோன்றும் வாசமாய்
                      பண்ணிசையில் ஓசையாய் பாட்டின் பொருளாய்

காளிங்க நடனம்

                             காளிங்க நடனம்

                                       பல்லவி

                   ஆடும் அழகைக்காண கோடிக்கண் வேண்டும்
                   காளிங்கன் தலைமீது கால் வைத்துக் கேசவன்

                                    அனுபல்லவி

                   வேடிக்கையாக ஒரு கையில் வால்பிடித்து
                   மறுகையில் பலவித அபிநயங்கள் காண்பித்து

                                       சரணம்

                    தண்டைகள் குலுங்கிட கொண்டையசைந்தாட
                    குண்டலங்களிரண்டும் காதில் தானாட
                    வண்டினிசைக்கேற்ப மயில்பீலியாட
                    அண்டசராசரங்களனைத்துமுடனாட

                    வண்ணமுத்துமாலைகளும் அணிமணிகளுமாட
                    கண்டோரும் மெய்மறந்து வியந்தவனைக் கொண்டாட
                    விண்ணோரும் வான்வெளியில் மலர்தூவி நின்றாட
                    பண்ணிசைக்கும் குழலாட கைவளைகள் சேர்ந்தாட

பேசும் தெய்வமே கேசவா

                   பேசும் தெய்வமே கேசவா



                               பல்லவி

                   கேசவா உந்தன் திருநாமம் என்நாவில்
                   ஓயாது உரைத்திடும் வரம் தரவேண்டும்

                             அனுபல்லவி

                   ஆசாபாசங்கள் அனைத்தையும் துறந்து
                   நேசமுடன் உந்தன் திருவடி நினைந்து

                                சரணம்

                    தேசுடை மூர்த்தியே விளக்கின் சுடரில்
                    வீசும் ஒளியே வாசமலரே
                    மாசிலாமணியே கலியுகந்தனிலே
                    பேசும் தெய்வமே ஆராவமுதே

                    

ஆதி கேசவா

              ஆதி கேசவா

                   பல்லவி

        உனையன்றி உலகில் வேறொரு தெய்வம்
        வேண்டிலேன் என்றும் ஆதி கேசவா

                  அனுபல்லவி

         நினைந்துருகி மனமார அனுதினம் துதித்திடும்
         எனையாட்கொள்ள முக்தியளித்திட

                      சரணம்

          தினையளவு துதித்தாலும் பனையளவு பலன் தரும்
          வினைதீர்த்தருளும் வேங்கடமுடையானே
          நினைப்பவர் மனங்களைக் களிப்புறச் செய்திடும்
          அனைவருக்கும் அருளளிக்கும் ஆராவமுதே 

ஶ்ரீ வரலக்ஷ்மி

                         ஶ்ரீ வரலக்ஷ்மி


                              பல்லவி

                 ஶ்ரீ வரலக்ஷ்மி நீ வரவேண்டும்
                 தேவர்கள் பணிந்திடும் திருமகளே அலைமகளே

                            அனுபல்லவி

                 பாவையர் நோன்பிருந்து ஆவணி நந்நாளில்
                 தேவி உனதருளை வேண்டித்துதித்திட

                                சரணம்

                 மாவிலைத்தோரணம் அழகுடன் தொங்க
                 பூவிலும் பொன்னிலும் மாலைகள் சூடி              
                 மெட்டியும் கொலுசும் ஒட்டியாணமும்
                 பட்டுடையும் தரித்து மூக்குத்தி அணிந்து

                 அட்டிகை கைவளை வங்கியும் பூட்டி
                 நெத்தியில் சுட்டியும் பொட்டும் வைத்து
                 மஞ்சள் குங்குமம் மருதாணி பூசி
                 மங்கள வதனமும் எழிலுடன் திகழ

எந்த நேரமும்

                                         எந்த நேரமும்
                         

                                              பல்லவி

                          எந்த நேரமும் கேசவன் திருநாமம்
                          துதித்துக்கொண்டே இருக்க வேண்டும் நான்

                                           அனுபல்லவி

                          உந்திகமல பெருமான் அவனை
                          சிந்தையில் வைத்து சீரடி போற்றி

                                               சரணம்

                          சந்ததம் அவன் நாம சங்கீர்த்தனம் செய்து
                          வந்தனை புரிந்திடும் அருளொன்றே வேண்டினேன்
                          முந்தைய பழவினைப் பயன்கள் தொலைந்திட
                           பந்த பாசத்தளைகளை களைந்திட

வல்வில் ராமன்

                                        வல்வில் ராமன்


                                              பல்லவி

                      உள்ளத்தில் பள்ளி கொள்ள வேண்டுமென விரும்பி
                      திருமாலே மணிவண்ணா திருவடி தொழுதேன்

                                           அனுபல்லவி

                      புள்ளம் பூதங்குடி வல்வில் ராமனே
                      தெள்ளியனே உனதருளை அள்ளி அளித்தென்

                                                சரணம்

                       அள்ளக் குறையாத மாபெரும் சமுத்திர
                       வெள்ளத்தின் நடுவே பாம்பணையில் கிடக்கும்
                       கள்ளழகன் கேசவனே எளியோர்க்கருள்பவனே
                       எள்ளத்தனையேனும் என்னிடத்தில் கருணைவைத்தென்

அக்காரக்கனி

                                    அக்காரக்கனி



                                          பல்லவி

                         சக்கரக்கையனை ஆதிகேசவனை
                         பக்தியுடன் போற்றி மனமாரப் பணிந்தேன்

                                       அனுபல்லவி

                        அக்காரக்கனியாய் யோகநரசிம்மனாய்
                        திருக்கடிகை திருத்தலத்தில் அடியார்க்கு காட்சிதரும்

                                             சரணம்

                        தன்னலமில்லாத தூயமனமும்
                        இன்னிசையறிவும் கல்வியும் ஞானமும்
                        கன்மவினை தொடராத நல்வாழ்வும் செல்வமும்
                        என்றும் எனக்கருள வேண்டுமெனத் துதித்து

பத்மாசினி ( திருப்புல்லாணி )

                                    பத்மாசினி  ( திருப்புல்லாணி )

                                              பல்லவி

                       அன்னை பத்மாசினியின் மலர்த்தாள் பணிந்தேன்
                        பன்னகசயனன் கேசவன் நாயகி

                                           அனுபல்லவி

                       மன்னுபுகழ் புல்லாணித் திருத்தலத்திலெழுந்தருளி
                       ஆதிஜகந்நாதன் மனம் மகிழ உடனிருக்கும்

                                              சரணம்
                     
                       என் வாக்கில் உந்தன் செல்வாக்கை ஓதிட
                       உன்னருள் வேண்டினேன் ஶ்ரீமகாலஷ்மி
                       சின்னஞ்சிறியேன் உபசாரமேற்று
                       இன்னருள் தந்தெனை காத்தருள வேண்டுமென

வானமுட்டிப்பெருமாள் (1)

                               வானமுட்டிப் பெருமாள் (1)


                                        பல்லவி

                        அத்திமரத்தில் எழுந்தருளிக் காட்சி தரும்
                        வானமுட்டிப்  பெருமாளைப் பணிந்தேன்

                                      அனுபல்லவி

                        நித்தியம் துதித்திப்பவர் துயரங்கள் பிணிகள்
                        அத்தனையுமகற்றிடும் பக்தப்பிரியனை

                                           சரணம்

                        கத்தும் கடல் நடுவே பள்ளி கொண்டிருக்கும்
                        உத்தமனை திருப் பாற்கடல் வாசனை
                        எத்திசையும் புகழ் விளங்கும் எட்டெழுத்தானை
                        வித்தகர் போற்றும் வைகுண்ட நாதனை
                      

வானமுட்டிப் பெருமாள்

         
                               வானமுட்டிப் பெருமாள்


                                           பல்லவி

                        வானமுட்டிப் பெருமாள் திருவடி பணிந்தேன்
                        கானமிசைத்து பாடிக்கொண்டாடி

                                         அனுபல்லவி

                        ஞானமும் செல்வமும் நல்வாழ்வும் நல்கிடும்
                        பானுகுலதிலகன் திருமால் கேசவன்

                                              சரணம்

                        வானுறை தேவரும் சுகசனகாதியரும்
                        நான்முகனும் நாரதரும் கருடனும் அனுமனும்
                        மோனத்தவம் செய்யும் முனிவரும் பணிந்தேத்தும்
                         தீனசரண்யன் ஶ்ரீமன் நாராயணன்


                            

தர்பாரண்யேச்வரர்

                               தர்பாரண்யேச்வரர்



                                        பல்லவி

                       புல்வனநாதனை தர்பாரண்யேச்வரரை
                       திரு நள்ளாற்றில் கண்டு துதித்தேன்

                                      அனுபல்லவி

                        வல்வினை போக்கும் சனீஸ்வரனும்
                        பிராணாம்பிகையும் அருகிருந்து போற்றும்

                                           சரணம்

                        சொல்லியவண்ணம் தொழுமடியாரைக்காக்கும்
                         மல்லீச்வரனைக் கேசவன் நேசனை                      
                        தொல்பவச்சுழலில் சிக்குண்டு தவிக்கும்
                         அல்பனெனையே ஆண்டருள வேண்டுமென

கும்பேச்வரனை

                              கும்பேச்வரனை




                                      பல்லவி

                    கும்பேச்வரனை  மகாதேவனை
                    அம்பலவாணனை மனமாரத் துதித்தேன்

                                    அனுபல்லவி

                    கும்பமுனிக்கருள் செய்த ஈசனை
                    சம்பு கபாலியை நமச்சிவாயனை

                                         சரணம்

                     அம்புயநாபன் கேசவன் நேசனை
                     உம்பர் முனிவர் தொழும் பரமேச்வரனை
                     நம்புமடியார்க்கின்பமளிப்பவனை
                     வெம்பவக்கடலினைக் கடந்திட வேண்டி
                               
                   

ஶ்ரீலலிதே

                              ஶ்ரீலலிதே


                                 பல்லவி

                    இமவான் மகளே ஶ்ரீலலிதே
                    உமாமகேச்வரி உனையே துதித்தேன்

                               அனுபல்லவி

                    சமானம் யாருளார் கேசவன் சோதரி
                    அரனயனரி பணி  ஶ்ரீதுர்கே

                                  சரணம்

                    அமரரும் முனிவரும் அமரேந்திரனும்
                    குமரனும் கணபதியும் அனைவரும் வணங்கிடும்
                    கமலே கமலமலரமர் காமாக்ஷி
                    கனகமலைதனில் வீற்றிருப்பவளே

மங்களாம்பிகை

                              மங்களாம்பிகை



                                      பல்லவி

                  திங்கள் பிறையணிந்த மங்களாம்பிகையை
                  சங்கரன் பங்கிலுறை ஈச்வரியைத் துதித்தேன்

                                   அனுபல்லவி
                 
                  மங்கையர் கொண்டாடும் மாகாளி சங்கரியை
                  அங்கயற்கண்ணியை அகிலாண்டேச்வரியை

                                       சரணம்

                 செங்கதிரோன் ஒளியையும் மிஞ்சும் ஒளியுடையாளை
                 அங்கமில் மதனும் நாணும் அழகுடையாளை
                 பொங்கரவணிந்த கும்பேசுவரன் மனையாளை                
                  பங்கய நாபன் கேசவன் சோதரியை
               
                 

                 
                  

ஶ்ரீ நரசிம்மன்

                               ஶ்ரீ நரசிம்மன்


                                      பல்லவி

                       ஶ்ரீநரசிம்மனை ஆதிகேசவனை
                       நாநிலம் போற்றும் கடிகையில் துதித்தேன்

                                   அனுபல்லவி

                      வானுறை தேவர்கள் சனகாதி முனிவர்கள்
                      மானிடர் நாரதர் நான்முகன் பணிந்தேத்தும்

                                         சரணம்

                      மீனாயவதரித்து அருமறைகள் மீட்டவனை
                      ஆனிறை மேயத்தவனை மாயக் கண்ணனை
                      தானாகவே வந்து பக்தருக்கருள்பவனை
                      தீனசரண்யனை திருவாழ்மார்பனை 

மும்முக கணபதி

                               மும்முக கணபதி


                                       பல்லவி

                   மும்முகம் காட்டும் தும்பிக்கையானை
                   நம்பித்துதித்தேன் நலம் தருவாயென

                                    அனுபல்லவி

                   அம்புயநாபன் கேசவன் மருகனை
                   சம்பு கபாலி உமையாள் மைந்தனை

                                        சரணம்

                   தம்பி மருகன் வள்ளியை மணந்திட
                   அன்புடன் உதவிய ஆனைமுகத்தோனை
                   உம்பரும் முனிவரும் நந்தியும் கணங்களும்
                   அம்புயமலரமர் பிரமனும் வணங்கிடும்

திருமீயச்சூர் லலிதாம்பிகை

                       திருமீயச்சூர் லலிதாம்பிகை


 
                                      பல்லவி

                   மீயச்சூர் திருத்தலத்தில் கோயில் கொண்டிருப்பவளே
                   மாயே ஶ்ரீ லலிதாம்பிகையே   -  திரு

                                    அனுபல்லவி

                   தாயுனையே தஞ்சமடைந்தேன்
                   நீயே கைவிட்டால் வேறெங்கு செல்வேன்

                                        சரணம்

                    தாயேயுன் கடைக்கண்ணருளிருந்தால் போதும்
                    தீயினில் தூசாகும் பவவினைப் பயனனைத்தும்
                    சேயெனைக்காப்பது உனக்கொரு பாரமா
                    ஆயிரம் பெயருடைய கேசவன் சோதரி 

அருள்மிகு நீலவண்ணன்

                             அருள்மிகு நீலவண்ணன்


                                           பல்லவி

                        கருடன் மீதேறிவந்து கருணையுடன் எனைக்காக்க
                        தருணம் இதுவே கேசவா

                                        அனுபல்லவி

                        திருமலையில் நின்று கோவிந்தாவென்றழைத்து
                        திருமாலுனை நினைந்து திருவடியைச் சரணடைந்தேன்

                                           சரணம்
   
                        தருமமிகு சென்னை நன்மங்கலம் தலத்தில்
                        பெருமையுடனெழுந்தருளி பக்தருக்கு காட்சிதரும்
                        அருள்மிகு நீலவண்ணப்பெருமாளும் நீயே
                        திருவருள் வேண்டியே தினமுனைத்துதித்தேன்

ஶ்ரீ நிவாசன்

                                 ஶ்ரீ நிவாசன்


                                       பல்லவி

                      ஶ்ரீ வேங்கடேசனை  ஶ்ரீ நிவாசனை
                      ஏழுமலையானை மனமாரத் துதித்தேன்

                                       துரிதம்

                      தேவேந்திரனும் தேவரும் முனிவரும்
                      நாரதர் நான்முகன் அனைவரும் பணிந்திடும்

                                    அனுபல்லவி

                     தேவி அலமேலுமங்கை மணாளனை
                     கோவிந்தராஜனை திருமாலைக் கேசவனை

                                       சரணம்

                      மூவாசைப்பிணிதீர முன்வினைப் பயனகல
                      நாவார கோவிந்தன் திருநாமமுரைத்து
                      காவாவாவென்று கதறியழைத்து
                      தேவாதிதேவனவன் திருவடியைப் பணிந்து
           

ஓங்கார கணபதி

                             ஓங்கார கணபதி


                                         பல்லவி

                      உனதருள் வேண்டினேன் கணபதியே
                      எனது மனக்கவலை அனைத்தும் நீங்கிட

                                       அனுபல்லவி

                      கனவிலும் நினைவிலும் உனையே துதித்து
                      தினமுன் திருவடியை மறவாமல் பணிந்தேன்

                                            சரணம்

                      தேங்காய்ப் பழம் பூ தாம்பூலம் வைத்து
                      பாங்காகப் பலவித வழிபாடு செய்தேன்
                      நீங்காத நிம்மதி நீயெனக்கருள்வாய்
                      ஓங்காரப் பொருளே கேசவன் மருகனே

பாலச்சந்திரன்

                                        பாலச்சந்திரன்



                                          பல்லவி

                         பாலச்சந்திரன் பாதம் பணிந்தேன்
                         காலபயம் கவலை அனைத்தும் துறந்தேன்

                                      அனுபல்லவி

                         ஆலமுண்ட நீலகண்டன் நமச்சிவாயனும்
                         நீலாயதாட்சியும் விரும்பும் தலைமகன்

                                           சரணம்

                          நீலவண்ணன் கேசவன் மருகன்
                          வேலாயுதனின் அன்பு சோதரன்
                          சீலமிகு பிள்ளையார் பட்டி திருத்தலத்தில்
                          கோலமுடன் காட்சி தரும் கற்பக விநாயகன் 

ஆதிகேசவன்

                                   ஆதிகேசவன்


                                         பல்லவி

                      நல்லவண்ணம் வாழ்ந்திடவே நாளுமுனைத் துதித்தேன்
                      எல்லாமும் நீயே ஆதி கேசவா

                                      அனுபல்லவி

                      அல்லல் பவபயம் அனைத்தும் நீங்கி
                      இல்லறத்தில் இன்பமும் அமைதியும் பெற்று
 
                                            சரணம்

                        வல்லரக்கன் கம்சனை வதம் செய்தவனே
                        மல்லன் சாணுரன் பூதனையைக்கொன்றவனே
                        நல்லவர் வாழவும் தீயவர் மாயவும்
                        நன்மங்கலத்துதித்த நீலவண்ணனே
             

கமாக்ஷி

                                            கமாக்ஷி


                                             பல்லவி

                         புரியாத புதிரும் நீயோ கமாக்ஷி
                         அரியயனரனும் கரம் பணிந்தேத்தும்

                                          அனுபல்லவி

                         விரிகமல மலரும் பாசாங்குசமும்
                         கரமலரிலேந்தும் கருணைத்தெய்வமே

                                              சரணம்

                          சரியும் தவறும் அறியாத பருவத்தில்
                          தெரியாமல் நான் செய்த பிழையெல்லாம் பொறுத்து
                          பரிந்தருள்புரிந்திட வேண்டியுனைத் துதித்தேன்
                          கரியவன் கேசவன் அன்பு சோதரி

வேதவல்லி நாதன்

                                  வேதவல்லி நாதன்

                                            பல்லவி

                        நீலவண்ணன் நீயே எனை சோதித்தால்
                        ஞாலம்தனில் எனக்கு வேறு புகலேது

                                         அனுபல்லவி

                       காலடி நிழலே சதமெனத் துதித்தேன்
                       மாலனே கேசவா மனமிரங்கி எனக்கருள்வாய்

                                            சரணம்

                       பாலகிருஷ்ணனாய்க் காளிங்கன் தலைமீது
                       கோலமுடன் களிநடம் புரிந்த கோபாலனே
                       சாலச்சிறந்த நன்மங்கலம் தலத்தில்
                       வேதவல்லியுடனமர்ந்து காட்சியளித்திடும் 

நீலவண்ணன் (நன்மங்கலம்)

                               நீலவண்ணன் (நன்மங்கலம்)



                                        பல்லவி

                        ஒருவனே தெய்வம் இவ்வுலகில் அனைவருக்கும்
                        குருவும் தந்தையும் தாயும் அவனே
       
                                     அனுபல்லவி

                        தருமமிகு சென்னை நன்மங்கலம் தலத்தில்
                        கருணையுடன் காட்சிதரும் நீலவண்ணன்

                                          சரணம்

                         அருமறை இதிகாச புராணங்கள் போற்றும்
                         அருந்தவ முனிவர்களும் யோகியரும் ஞானியரும்
                         நரர் சுரரும் நாரதரும் நான்முகனும் துதிக்கும்
                         பெருமைக்குரிய திருமால் கேசவன் 

கற்பக கணபதி ( பிள்ளையார்பட்டி)

                                     கற்பக கணபதி ( பிள்ளையார்பட்டி)

                                                 பல்லவி

                            அருள்மிகு கற்பக கணபதியைத் துதித்தேன்
                            தருமநெறி காக்கும் நகரத்தார் பணிந்திடும்

                                                 துரிதம்

                            கணங்களும் நந்தியும் தேவரும் முனிவரும்
                            அமரேந்திரனும் பிரமனும் வணங்கிடும்

                                             அனுபல்லவி

                             கருணையுடன் பிள்ளையார்பட்டியில் எழுந்தருளி
                             திருக்காட்சியளித்திடும் ஆனைமுகத்தோனை

                                                   சரணம்

                              கருமங்கள் தொடங்குமுன் அனைவரும் வணங்கிடும்
                              ஒரு பகையுமில்லாத உத்தம தேவனை
                              திருமால் கேசவன் விரும்பிடும் மருகனை
                              அருமறைகள் கொண்டாடும் ஐங்கரனை கரிமுகனை

வாதாபி கணபதி

       
                                 
                                     வாதாபி கணபதி
                       

                                              பல்லவி

                         வாதாபி கணபதியே உனைத்துதித்தேன்
                         நீதான் துணையென்றுன் திருவடி பணிந்து
   
                                           அனுபல்லவி

                        வேதாகம சாத்திர புராணங்கள் போற்றும்
                         வேழமுகத்தோனே திருவாரூர் தலம்வளர்

                                                 சரணம்

                         ஆதாரம் நீயே அனைத்துயிர்க்கெல்லாம்
                         மாதா பிதா குரு அனைத்தும் நீயே
                         பாதாரவிந்தம் பணிவோர்க்கு நலமருளும்
                         ஓங்கார வடிவினனே கேசவன் மருகனே

கமலவிநாயகன்

                                கமலவிநாயகன்


                                        பல்லவி

                     கமலவிநாயகன் கமலபதம் பணிந்தேன்
                     கமலநாபன் கேசவன் மருகன்
       
                                     அனுபல்லவி

                     கமலாலயனின் ஒரு சிரம் கொய்தவன்
                     கரிமுகன் ஐங்கரன் ஏகதந்தன்

                                            சரணம்

                     அமரரும் முனிவரும் அமரேந்திரனும்
                     உமையுடன் சிவனும் நந்தியும் கணங்களும்
                     குமரனும் தமிழ் மூதாட்டியும் போற்றும்
                     உமாசுதன் சுமுகன் வேழமுகத்தோன்

சென்ன கேசவன்

                            சென்ன கேசவன்


                                    பல்லவி

                     அருகிலிருந்தும் அறியாமலிருந்தேன்
                     திருமாலே உனையே தேடித்திரிந்தேன்

                                 அனுபல்லவி

                     குருவாய்த்தந்தையாய்த் தாயாய்த்தோழனாய்
                     அருந்தவ முனிவர்க்கு அடியார்க்குத் தொண்டனாய்

                                    சரணம்

                     பெருமை வீண் புகழ் பேசித்திரிந்தேன்
                     கருமவினைப் பயனால் கட்டுண்டு தவித்தேன்
                     திருந்தி மனம் வருந்தி உனையே துதித்தேன்
                     கருணையுடன் எனைக் காத்தருள் கேசவா
      

திருவலஞ்சுழி கணபதி

                      திருவலஞ்சுழி கணபதி


                                   பல்லவி

                  வலஞ்சுழி கணபதியே பதமலர் பணிந்து
                  வலம் வந்து உனையே தினம் துதித்தேன்  - திரு

                                 அனுபல்லவி

                  நலமுடன் கல்வியும் செல்வமும் நல்வாழ்வும்
                  குலமும் ஞானமும் நீயெனக்கருள்வாய்

                                     சரணம்

                  ஜனனமரணமென்னும் பவச்சுழல் களைந்து
                  வினைதீர்ப்பவனே கேசவன் மருகனே
                  தனக்குவமையில்லாத தனிப்பெருந்தெய்வமே
                  உனதருள் இல்லையேல் உலகுயிர் நிலைக்குமோ

வேங்கடகிருஷ்ணன்

                                வேங்கடகிருஷ்ணன்



                                            பல்லவி

                          பார்த்தசாரதியை வேங்கடகிருஷ்ணனை
                          காத்தருள்வாயென தஞ்சமடைந்தேன் (ஶ்ரீ)

                                         அனுபல்லவி

                          வார்த்தையினாலே வர்ணிக்க இயலாத
                          மூர்த்தியைக் கேசவனை ருக்மிணிரமணனை

                                              சரணம்

                          ஆர்த்தெழும் கடலோரம் திருவல்லிக்கேணியில்
                          தேர்ப்பாகனாய் நின்று பக்தருக்கருளும்
                          பார்த்தனுக்கு சாரதியை பஞ்சவர் நேசனை
                          பார்புகழ் கண்ணனை கருநீலவண்ணனை