மோதகப் பிரியன்

   

                        மோதகப் பிரியன்    

  

                              பல்லவி 

                         மதுர மோதகப் பிரியனைக்  கரிமுகனை

                       சதுர் மறை போற்றும் கணபதியைத் துதித்தேன்        
                                                        
                                               அனுபல்லவி

                          யதுகுல திலகன் கேசவன் மருகனை

                          அதிசய ஆனைமுகத்தோனை சுமுகனை

                                                 துரிதம் 

                            ரதிபதி சுரபதி சரச்வதியின்பதி 

                           தேவசேனாபதி நிதிபதி துதித்திடும் 

                                                    சரணம்

                         கதிரவனொரு கோடி தரும் ஒளியை விடவும்

                           அதிகம்  ஒளியுடைய  தேவாதி தேவனை

                            விதியையும் மாற்றும் வலியுடையவனை

                             மதிசேகரன் மகனை மதவாரணமுகனை



                                 

                         

கண்ணன்

                             கண்ணன் 

                                                பல்லவி 

                          பங்கயனாபன் பதமலர் பணிந்தேன் 

                          சங்கும் சக்கரமும் கைகளிலேந்திடும் 

                                               அனுபல்லவி 

                          எங்கும் நிறைந்திருக்கும் செங்கண்மால் கேசவன் 

                           சங்கரனும் மோகம் கொண்ட மோகினி வடிவினன் 

                                                சரணம் 

                           மங்கை  திருமகளைத் தன் மார்பில் தாங்கும் 

                           வெங்கடரமணன்  திருமலை வாசன் 

                            தங்கு தடையின்றி தருமம் தழைக்கவே 

                             இங்கு எழுந்தருளி நம்மைக் காத்திடும் 

                             

                              

                           

மகாகணபதி

                               மகாகணபதி 

                                         பல்லவி 

                          கணங்களின் அதிபதியை  மகாகணபதியை 

                          வணங்கினேன் எனக்கருள வேண்டுமென த்துதித்து 

                           

                                             அனுபல்லவி 

                            பணம் புகழ் பதவி அனைத்தையுமளிப் பவனை 

                             குணநிதியை  கரிமுகனை கேசவன் மருகனை 

                                                       சரணம் 

                              பிணக்காட்டில் திரியும் ஈஸ்வரன் மகனை 

                              மணம் தரும் மாலைகள் மணிமாலையணிந்தவனை 

                               பிணியிடர்  களைபவனை பிறபிறப்பறுப்பவனை 

                                தணிகேசன் சோதரனை ஆனைமுகத்தோனை 

                                 

                               

                                           

                                          

கலியுகத்தெய்வம்

                கலியுகத்தெய்வம் 

                                  பல்லவி


                     கண்ணனே கலியுகத்தில் கண்கண்ட தெய்வம்

                      புண்ணியம் செய்தோர்க்கு கண்ணெதிரில் காட்சி தரும்

                                  அனுபல்லவி

                     விண்ணோரும் மண்ணோரும் எந்நாளும் துதித்திடும்

                     தண்மதி முகத்தினன் மாமாயன் கேசவன்

                                        சரணம்

                     வண்ணமயில் பீலியும்  மரகதச் சுட்டியும்

                     கொண்டையில் சூடி மாலைகளணிந்து

                     தண்டையும் கொலுசும் கால்களில் பூட்டி

                     வெண் பட்டுடுத்தி  அழகுடன் மிளிரும்           (  கண்ணனே ....)

                 
                      வெண்ணை பால் தயிர் விரும்பி உண்ணும்

                       மண்ணையுண்ட வாயன் பங்கய  நாபன்

                        கண் கவரழகன் கோபியர் லோலன்

                        பண்ணிசைத்து குழலில் பரவசம் காட்டிடும்   ( கண்ணனே )


                       உண்ணும் சோறும் பருகும்  நீரும் 

                       தின்னும் வெற்றிலையும் அனைத்துமவனே 

                       எண் திசையும் ஏழுலகும்  ஞாயிறும் திங்களும் 

                       அண்டசராசரங்களனைத்துமவனே                 (   கண்ணனே )

                       

மணக்குள கணபதி

மணக்குள கணபதி 

பல்லவிகணபதிராயனை அனுதினம் துதித்தேன் 

வணங்கிடுமெனையே காத்தருள வேண்டுமென

 அனுபல்லவி 

தணலேந்தும் முக்கண்ணன் சங்கரன் மகனை 

கணங்களின் அதிபதியை கேசவன் மருகனை

 சரணம் 

இணை தனக்கொருவரும் இல்லாத இறைவனை

 குணம் கல்வி செல்வம் அளித்திடும் கரிமுகனை 

துணை நின்று அடியவர் இடர் வினை களைபவனை 

மணக்குளம் பதிதன்னில் வீற்றிருப்பவனை

உலகம் உருண்டை

உலகம் உருண்டை

பர்மா பஜாரில்
வெள்ளைக்காரப் பெண்மணி
 தமிழ் பேசும் துலுக்கரிடம்
சைனா பீங்கான் குடுவையை
ஆங்கிலத்தில் பேரம் செய்து
வாங்கும் போது நான் நினைத்தேன்
உலகம் சிறிதுதான்  !!!!

ஸ்ரீ ஹயக்ரீவர்

                               ஸ்ரீ ஹயக்ரீவர் 

                                            பல்லவி

                         பரிமுகக் கடவுளை ஸ்ரீ ஹயக்ரீவரை

                         தரிசனம் செய்து பிரார்த்தனை புரிந்தேன்                                  

                                       துரிதம் 

                          நரர்சுரர் நாரதர் சுகசனகாதியர் 

                         சுரபதி நான்முகன் கரம் பணிந்தேத்தும் 

                                          அனுபல்லவி

                          பரிவுடன் தனது பக்தருக்கெல்லாம்

                           கரிசனத்துடனே நலமளிப்பவனை

                                                சரணம்

                            அறிவிற் சிறந்தவனை ஆனந்தமானவனை

                            சரி நிகர் தனக்கொருவர் இல்லாத தேவனை

                            மறைகளை மீட்டவனை மாதவனைக் கேசவனை

                             அரி நாராயணனை  எனக்கருள வேண்டுமென 

                           

                         

விநாயகன்

                                     

                                 விநாயகன் 

                                                             பல்லவி

                                     தாயும் தந்தையுமே உலகமென்றுணர்த்திய

                                     சேயவனை கணபதியை மனமாரத் துதித்தேன்

                                                               துரிதம்

                                       ஞாயிறும் திங்களும் நந்தியும் கணங்களும்

                                        தேவரும் மூவரும் யாவரும் பணிந்திடும்

                                                           அனுபல்லவி

                                     ஆயகலைகள் அறுபத்து நான்கினையும்

                                      நேயமுடன் நமக்களிக்கும் ஆனைமுகத்தோனை

                                                                   சரணம்

                                       தூய வெண்கலையுடுத்தும் விக்ன விநாயகனை

                                       தேயும் பிறையணியும் தேவாதி தேவனை

                                       மாயப்பிறப்பறுக்கும் மதவாரணமுகனை

                                       மாயன் கேசவன் மருகனைக் கரிமுகனை

                                     

சிவநாமம்

                               சிவநாமம் 

                                      பல்லவி

                        சிவநாமமே  என்றும்  ஆனந்தமே

                        சிவரூபமே தரும்  பேரின்பமே

                                     அனுபல்லவி
         
                         கவலையிடர் பிணி பவபயம் களைந்திடும்

                          நவநிதி பரகதி அனைத்தையுமளித்திடும்
                       
                                          சரணம்

                          சிவகாமேச்வரியும் நந்தியும் கணங்களும்

                           சிவனடியார்களும் முருகனும் கணபதியும்

                           தவயோக ஞானியரும் பிரமனும் கேசவனும் 

                         அவனியோரனைவரும்  போற்றித் துதித்திடும் 


                          

வேழமுகன்

                             

                               வேழமுகன் 

                                                      பல்லவி
                         
                             வேத முதல்வனை விக்ன விநாயகனை

                              பாதம் பணிந்து பக்தியுடன் துதித்தேன்

                                                   அனுபல்லவி

                              பாதி உமைக்கீந்த சங்கரன் மகனை

                              ஓதக்கடல் துயில் கேசவன் மருகனை

                                                         சரணம்

                               வேதனையிடர் நீக்கும் வேழ முகத்தோனை

                               ஆதவனும் நாணும் காந்தியுடையவனை

                                பூத கணங்களின் தலைவனைக் கரிமுகனை

                                 நாதவினோத சங்கீத ரசிகனை

                               


                               


                             

வாரண முகன்

                          வாரண முகன் 

                                                 பல்லவி

                            அலங்காரமாயமர்ந்து  அழகுடன் காட்சி தரும்

                             நலம் தரும் கணபதியை உளமாரத் துதித்தேன்

                                                  அனுபல்லவி

                             உலகை உண்டுமிழ்ந்த கேசவன் மருகனை

                             மலைமகள் மைந்தனை ஆனைமுகத்தோனை

                                                     சரணம்

                               நிலவின் கலையணிந்த வாரணமுகனை

                               கலைமகள் அலைமகள் நேசிக்கும் கரிமுகனை

                               உலகனைத்தும் போற்றும் விக்ன விநாயகனை

                               மலர் தூவியெனையாள வேண்டுமெனப் பணிந்து

முழுமுதற்கடவுள்

                             முழுமுதற்கடவுள் 

                                                        பல்லவி 

                               என்ன சொல்லி உன்னைத் துதிப்பேன் 

                               பன்னகாபரணன் மகனே கணபதியே 

                                                     அனுபல்லவி 

                               பொன்னடி பணிவதன்றி  வேறொன்றறியேன் 

                                சென்ன கேசவன் மருகனே கரிமுகனே 

                                                         சரணம் 

                                அன்னையும் தந்தையுமே அகிலமனைத்துமென 

                                முன்னமுணர்த்திய முழுமுதற் கடவுளே 

                                 சின்னஞ் சிறியேன் செய்த பிழை பொறுத்து 

                                  இன்னருள் தந்தெனை ஆண்டருள்வாயே 

 

சுமுகன்

                                     சுமுகன் 

                                                 பல்லவி
   
                                அழகிய கணபதியை ஆனைமுகத்தோனை

                                 கழலடி நிழலே சதமெனத் துதித்தேன்

                                                 அனுபல்லவி

                                 மழுவேந்தும் முக்கண்ணன் மகனைக் கரிமுகனை

                                  குழலோன் கேசவன் நேசனை  சுமுகனை

                                                     சரணம்

                                   உழன்று திரியுமென் மனமொரு நிலைபெறவும்

                                   பழவினைப் பயன்களால் படுந்துயர் நீங்கவும்

                                    மழை நிற மேனியன் அவனருள் வேண்டி

                                    பழகு தமிழ் மொழியில் பாமாலை புனைந்து
                                   

                             

குழலோன்

                                   குழலோன் 

                                                பல்லவி

                              குழலாக உன் கையில் நானாக வேண்டும்

                              அழகா உன்னதரங்கள் எனைத்தீண்ட வேண்டும்

                                                 அனுபல்லவி

                               குழலில் நீயணிகின்ற அழகு மயிலிறகோ

                               கழல் சூடும் தண்டைகளோ ஆனாலும் போதும்

                                                      சரணம்

                               மழை மேக நிறம் கொண்ட நீலவண்ணக்கண்ணா

                                நிழலுந்தன் கழலடியே  திருமாலே கேசவா

                                பழகு தமிழ் மொழியில் பாமாலை புனைந்து

                                 அழகனே உனதிரு மலர்ப் பதம் பணிந்தேன்


                                    

அரங்கன் ஆடினானூஞ்சல்

                                             அரங்கன் ஆடினானூஞ்சல்


                                   திருமறைகள் நான்கினையும் சங்கிலியாய்க் கட்டி

                                   திருவனந்தனணையாக அதன்கிழே விரித்து

                                   சரம் சரமாய் மலர் மாலை அலங்காரம் செய்து

                                   திருவரங்கன் பள்ளிகொண்டு ஆடினானூஞ்சல்


                                   திருமகளும் திருச்சங்கும் திருவாழியும் ஏந்தி

                                   கருடனும் சேனையரும் ஏழுலகும் தேவரும்

                                   அருள் மாறனும் மற்றும் ஆழ்வாரும் காண
                                   
                                   திருவரங்கன் பள்ளிகொண்டு ஆடினானூஞ்சல் 

                                
                                    தருமநெறி தழைத்தோங்க தரணியிலே உதித்த 

                                    பெருமைமிகு நம்பெருமாள் ஸ்ரீ ரங்கநாதன் 

                                     இரு நாலு திரு எழுத்தின்  ஏற்றம் விளங்க 

                                      கருணையுடன் எழுந்தருளி  ஆடினானூஞ்சல் 

                                
                                    

                       

                   

ஆனை முகன்

                                          ஆனை முகன் 

                                                         பல்லவி

                             கணநாதனைக் காணக் கண் கோடி வேண்டும்

                             அணங்குகள் சித்தியும் புத்தியும் அருகிருக்கும்

                                                     அனுபல்லவி

                             கணங்களின் அதிபதியை கேசவன் மருகனை

                             தணலேந்தும் நெற்றிக் கண்ணன் சிவன் மகனை

                                                         சரணம்

                              வணங்கிடுமடியார்க்கு நலமளிப்பவனை

                              பிணங்கிய குறமகள் வள்ளியை முருகன்

                              மணந்திட உதவிய ஆனைமுகத்தோனை

                              இணை யொருவர் தனக்கு இல்லாத தேவனை 

                             

கரிமுகன்

                                             கரிமுகன் 

         
                                                       பல்லவி

                              தினமொரு விதமாகக்  காட்சி தரும் கணபதியை

                               அனாத நாதனை மனமாரத் துதித்தேன்

                                                           அனுபல்லவி

                              ஜனன மரண பயம் போக்கிடும் கரிமுகனை

                              வினையிடர்  களைந்திடும் விக்ன விநாயகனை

                                                              சரணம்

                                அனந்த சயனன்  கேசவன் மருகனை

                                 அனல் புனலேந்திய நெற்றிக் கண்ணன் மகனை                            

                                 வனவிலங்கெனத் திரியும் புலன்களை அடக்கவும்

                                  மனமொரு நிலைபெறவும்   அவனருள் வேண்டி
     






                               

                                                           

                             
                             


                   

கணநாயகன்

                                 கணநாயகன் 

                                            பல்லவி

                             பரிந்தருள் புரிவாய் ஸ்ரீ கண நாயகா

                             அரியயனரன்  பணி  விக்ன விநாயகா

                                            அனுபல்லவி

                              கரிய நிறத்தழகன்  கேசவன் மருகா

                              சரிநிகர் சமான மில்லாத தேவா

                                               சரணம்

                               திரிபுர மெரித்த பரமசிவன் மகனே

                                வறியவர்க் கருளும் வாரண முகனே

                                மரித்தலும் பிறத்தலுமில்லாதொழிந்திட

                                 கரிமுகனுனையே கதியெனத்துதித்தேன் 

கதி நீயே கேசவா

   

                               கதி நீயே கேசவா 

   
                                          பல்லவி

                      நீயன்றி  வேறு யார் எனை ஆட்கொள்வார்

                       ஓயாதுனையே துதித்தேன் கேசவா

                                         அனுபல்லவி

                       தாயும் தந்தையும் குருவும் தோழனும்

                        நீயே என்றுன் திருவடி பணிந்தேன்

                                             சரணம்

                        காயம்  சதமென  கருதியே   நாளும்

                        மாயையில் மூழ்கி மனம் களித்திருந்தேன்

                        நோயெனும் வெம்பவச்சுழலில் விழுந்தேன்

                        மாயனே மனம் திருந்தி  உனைச்சரணடைந்தேன்

 
       

சித்தி விநாயகன்

                                                           
                                                       

                            சித்தி விநாயகன் 

                                                           பல்லவி

                                  புத்தாடை உடுத்திய சித்தி விநாயகனை

                                  அத்தன் சிவன் மகனை கரம் கூப்பித் துதித்தேன்

                                                     அனுபல்லவி
                                                   
                                  முத்தமிழைக்  கலைகளை ரசித்திடும் கரிமுகனை
                                 
                                   தத்துவப் பொருளை கேசவன் மருகனை    

                                                       சரணம்

                                 மத்தாடும் தயிர்போலத்தத்தளிக்கும் சித்தத்தை

                                 சத்தமின்றி ஒருநிலை அடைந்திடச் செய்திடவும்

                                 நித்தமுமவன் பதம் புத்தியில் நிலைத்திடவும்

                                  உத்தமிப் புதல்வனை மகா கணபதியை

                                       

கலியுகத் தெய்வம்

                                          

                                     கலியுகத் தெய்வம் 

    

                                            பல்லவி 

                           கண்கண்ட  தெய்வமாய் கலியுகந்தனில் விளங்கும் 

                            மகா கணபதியை  மனமாரத் துதித்தேன் 

                                           அனுபல்லவி 

                            தண்மதி பிறையை  தலையில் சூடிய 

                            கண் கவர்  அழகனை கேசவன் மருகனை 

                                               சரணம்  

                             அண்ட சராசரரங்களனைத்தையும் காப்பவனை 

                             பண்ணிசை நாட்டியக் கலைகளை ரசிப்பவனை                             

                              

                            விண்ணோரும் மண்ணோரும் வியந்து போற்றும் 

                            புண்ணியனை பூத கணங்களின் தலைவனை 

                             

                           

                            

                            

     

மோதகப்பிரியன்

                மோதகப்பிரியன்                          

                                  பல்லவி

                 தேவாதி தேவனை மகாகணபதியை

                  நாவாரப்பாடி மனமாரத் துதித்தேன்

                                   அனுபல்லவி

                  மாவாய் பிளந்த  கேசவன் மருகனை

                  தேவானை மணவாளன்  குமரன் சோதரனை
                               
                                         சரணம்

                  மூவாசைப் பிணிபோக்கும் முன்வினைப் பயன் நீக்கும்

                  ஓங்கார வடிவினனை  மோதகப்பிரியனை

                  மாவிடை வாகனன் மகனைக் கரிமுகனை

                  பூவுலகோர் போற்றும்  ஆனைமுகத்தோனை


                 




                 

                   

நவசக்தி விநாயகன்

                           நவசக்தி விநாயகன் 

                                          பல்லவி 

                    நவசக்தி  விநாயகனைப் பணிந்தேன் 

                    கவசமணிந்து அழகுடன் காட்சிதரும் 

                                       அனுபல்லவி 

                    தவமுனிவர்களும் நந்தியும் பிரமனும் 

                    சிவகணங்களும் அமரரும் வணங்கிடும் 

                                         சரணம்

                     பவப்பிணியிடர் களையும் ஆனைமுகத்தோனை 

                      உவகையுடன் துதிக்கும் பக்தருக்கருளும் 
     
                      சிவசக்தி மைந்தனை கேசவன் மருகனை 

                       அவனியோரனைவரும் துதித்துப் போற்றும்