ஓ ஜகந்நாதா.....

                                       ஓ ஜகந்நாதா.....

                                           
                                                 பல்லவி

                                திருநிறை மார்பனே ஓ ஜகந்நாதா
                                கருணை புரிந்தெனைக் காத்தருள்வாயே

                                                அனுபல்லவி

                                அருமறைகள் இதிகாச புராணங்கள் போற்றும்
                                பெருமைக்குரியவனே மாதவனே கேசவனே

                                                      சரணம்
                   
                                 ஒரு நாளும் உனது திருநாமம் உரைத்திலேன்
                                 பெருமைகளை உன்புகழை மனத்தில் நினைத்திலேன்
                                 கருமவினைப் பயனால் விதியால் கட்டுண்டேன்
                                 திருந்தி மனம் வருந்தி உனையே சரணடைந்தேன்
                               
                                  

தேவாதி தேவனை.....

                                            தேவாதி தேவனை.....



                                                       பல்லவி


                                      தேவாதி தேவனை ஶ்ரீவாசுதேவனை
                                      மூவாசைப்பிணி போக்கும் கேசவனைப் பணிந்தேன்

                                                     அனுபல்லவி

                                      நாவாரப்பாடி மனமாரத்துதிக்கும்
                                      பாவாணர் பக்தருக்கு நற்கதி அளித்திடும்
                                 
                                                         சரணம்

                                      மாவாய் பிளந்தானை மல்லரை வதைத்தவனை
                                      கோவர்த்தன மலையை குடையாகப் பிடித்தவனை
                                      தேவாவென்றழைத்த கரிக்கும் காரிகைக்கும்
                                      மூவா மருந்தாக முன்னின்று காத்தவனை
                                     
                                     

                                   

பதுமநாமனுன்...

                                             பதுமநாமனுன்...


                                                     பல்லவி

                                      பதுமநாபனுன் பதமலர் பணிந்தேன்
                                      யதுகுல திலகா எனையாண்டருள்வாய்

                                                    அனுபல்லவி

                                      மதுகைடபரின் விதி முடித்த மாலனே
                                      மதுசூதனனே மாயக் கண்ணனே

                                                         சரணம்

                                       சதுர்முகனும் தேவர்களும் ஆயர்குலத்தோரும்
                                       சதுர்மறையும் போற்றும் பாலகோபாலனே                                    
                                       குதுகலத்துடனே கோபியர் கொஞ்சும்
                                       மதுராதிபதியே  மாதவனே கேசவனே
                                     
                                        

கதி நீயெனவே

                                   

                                             கதி நீயனவே......



                                                     பல்லவி

                                     கதி நீயெனவே பதமலர் பணிந்தேன்
                                     இதமுடன் எனையே ஆண்டருள்வாயே

                                                    அனுபல்லவி
                                   
                                     நிதி தரும் திருமகள் மனம் கவர்ந்தவனே
                                     மதிமுகத்தவனே மாயக் கண்ணனே
                                   
                                                         சரணம்

                                     விதம் விதமாய்த் தோன்றும் சொந்தங்களும் பந்தங்களும்
                                     சதமல்ல நிலையல்ல இவ்வுலகில் உந்தன்
                                     பதமொன்றே சதமென்று அறிந்த பின்னாலே
                                     மதுசூதனே மாதவனே கேசவனே

மாலனை மாதவனை....

                                        மாலனை  மாதவனை....


                                                     பல்லவி

                                 மாலனை மாதவனை மாவாய் பிளந்தானை
                                 நீலவண்ண மேனியனை மனமாரத்துதித்தேன்
                               

                                                   அனுபல்லவி

                                 சீலமிகு அரங்கத்தரவின் மேல் துயில்பவனை
                                 காலனாய்க் கம்சனை காய்ந்த முகுந்தனை

                                                         சரணம்

                                 ஆலிலை துயின்ற பாலனைக் கேசவனை
                                 கோலமாமணி ரத்தினங்களணிந்தவனை
                                 ஞாலமேழுண்ட வாயனை மதுசூதனனை
                                 சாலச்சிறந்த திருவரங்கம் பதிதனில்

இந்தளூர் பரிமளரங்கன்

                                            இந்தளூர் பரிமளரங்கன்


                                                             பல்லவி


                                   சந்ததம் உந்தன் மலர்ப் பதமே பணிந்தேன்
                                   இந்தளூர்த் தலம் வளர் பரிமளரங்கனே
                                 

                                                           அனுபல்லவி

                                   நிந்தை புரிந்திடும் நீச அரக்கருக்கும்
                                   உன் தயை தந்திடும் தீனசரண்யனே

                                                                சரணம்

                                   தந்தை சொல் காக்க வனம் சென்ற ராமனே
                                   நந்தகுமாரனே நவநீதக் கண்ணனே
                                   பந்தபாசம் பவவினைப் பயன் தொலைய                              
                                    எந்தையே கேசவா எனக்கருள் புரிவாய்

                                 

கண்ணனைக் காண.....

                                              கண்ணனைக் காண.....



                                                               பல்லவி

                                      கண்ணனைக் காணக்கண்ணாயிரம் வேண்டாமோ
                                      மண்ணையுண்டவாயன் மாமாயன் கேசவன் - அழகு

                                                             அனுபல்லவி

                                       தண்மதி முகத்தினன் தாமரைப் பதத்தினன்
                                       மண்மகள் திருமகள் மனங்கவர் மாதவன்
                               
                                                                  சரணம்
         
                                       பண்ணிசைத்து குழலூதி உள்ளங்களை கொள்ளை கொள்ளும்
                                       கண்கவர் பேரழகன் கார்வண்ண மேனியன்
                                       விண்ணோரும் மண்ணோரும் அண்ணாந்து பார்த்து
                                       கண்ணாரக் கண்டு பணிந்தேத்தும் வடிவழகன்
                                     
                                       புண்ணியம் செய்தோர்க்கு கண்ணெதிரில் காட்சி தரும்
                                       வண்ணமிகு உருவினன் வானுறை தேவன்
                                       மண்மிசை தோன்றி ஆவினங்கள் மேய்ப்பவன்
                                       எண்ணித்துதிப்போரின் உள்ளங்களிலுறைபவன்

                                     
                                    

எனக்கொரு

                                          எனக்கொரு...



                                                       பல்லவி


                                     எனக்கொரு பிறவி இனியும் வேண்டாம்
                                     உனதருளாலே திருமாலே கேசவா

                                                     அனுபல்லவி

                                     உனது திருவடி நிழலே சதமென
                                     கனவிலும் நினைவிலுமுன் நாமமே துதித்தேன்

                                                          சரணம்

                                     வனமாலை துளபம் கௌத்துபமணிந்தவனே
                                     சனகாதி முனிவரும் நரர் சுரரும் நாரதரும்
                                     தினம் பணிந்தேத்தும் திருப்பாற்கடலுறங்கும்
                                     அனந்தசயனனே ஶ்ரீமன் நாராயணனே

                                                             துரிதம்

                                                கேசவ   மாதவ    கோவிந்தா
                                                ஶ்ரீதர முரளி ஜனார்த்தனா
                                               
                                     

சும்மாயிருந்தால்..

                                           சும்மாயிருந்தால்..


                                                         பல்லவி

                                     சும்மாயிருந்தால் நானென்ன செய்வேன்
                                     எம்மானே கேசவா எனக்கருளாமல் நீ

                                                       அனுபல்லவி

                                     இம்மாநிலம் போற்றும் தேவாதி தேவனே
                                     நம்மாழ்வார் பாடிப் பரவிய பரமனே

                                                            சரணம்

                                     பெம்மான் சிவனும் பிரமனும் நாரதரும்
                                     உம்பரனைவரும் கரம் பணிந்தேத்தும்
                                     நம்பெருமாளே நாராயணனே
                                     நம்பித்துதித்தேன் ஆண்டருள்வாயே

திருக்குறுங்குடி நம்பி

                                                 திருக்குறுங்குடி நம்பி




                                                         பல்லவி

                                   திருக்குறுங்குடியில் நின்றருளும் நம்பியின்
                                   திருப்பாதம் பணிந்து திருவருள் வேண்டினேன்

                                                       அனுபல்லவி

                                   திருமகள் குறுங்குடி வல்லியின் மனங்கவர்
                                   பெருமைக்குரிய அழகிய நம்பியெனும்

                                                            சரணம்

                                    அருந்தவ முனிவரும் தேவரும் பிரமனும்
                                    குரு நாரதரும் பாணனும் போற்ற
                                    தரும நெறி காக்க தரணியில் அவதரித்த
                                    திருமால் கேசவன் வைணவ நம்பி
                                 

உன்னைத் துதித்திடும்

                                                    உன்னைத் துதித்திடும்



                                                           பல்லவி

                                       உன்னைத் துதித்திடும் என்னைக் காத்தருள
                                       இன்னம் தாமதிப்பதேன் கேசவா

                                                         அனுபல்லவி

                                       அன்னை செங்கமலம் அருகிருந்து போற்றும்
                                       பன்னக சயனனே பரம தயாளனே

                                                              சரணம்

                                       முன்னமொரு கரிக்கபயம் அளித்ததுவும்
                                       பின்னொருநாள் காரிகையின் மானம் காத்ததுவும்
                                       சொன்னவண்ணம் பக்தருக்கு செய்ததெல்லாம் கதையோ
                                       மன்னு புகழ் மாதவனே மனமிரங்கி அருள்வாயே

கணங்களின் அதிபதி

                                          கணங்களின் அதிபதி


                                                        பல்லவி

                                   கணங்களின் அதிபதியை சிவகுமாரனை
                                   வணங்கித் தொழுதேன் காத்தருள்வாயென

                                                      அனுபல்லவி

                                    கணங்களும் நந்தியும் அமரரும் முனிவரும்
                                    பணிந்திடும் கரிமுகனை கேசவன் மருகனை

                                                          சரணம்

                                    பிணங்கிய வள்ளியை சேவற்கொடியோன்
                                    மணந்திட உதவிய ஆனைமுகத்தோனை
                                    இணைதனக்கொருவரும் இல்லாத தேவனை
                                    அணைத்தெனை ஆண்டிட வேண்டுமனத் துதித்து

ஶ்ரீராம தூதன்

                                                  ஶ்ரீராம தூதன்




                                                         பல்லவி

                                      ஶ்ரீராம தூதனின் திருவடி பணிந்தேன்
                                      தீரா வினதீர்த்து எனக்கருள வேண்டுமென

                                                     அனுபல்லவி

                                      ஓராயிரம் நாமம் உண்டென்ற போதும்
                                      ஶ்ரீராம நாமமே ஓயாது துதித்திடும்

                                                         சரணம்

                                      ஆராவமுதன் கேசவன் திருவடி
                                      மாறாதிருந்து சேவை புரிந்திடும்
                                      பாரோர் பணிந்தேத்தும் வாயுகுமாரன்
                                      சீராளன் ஊர் போற்றும் அஞ்சனை மைந்தன்

மயில்பீலி மாதவன்

                                               மயில்பீலி மாதவன்


                                                           பல்லவி

                                    மயில்பீலியணிந்தவனே மனதிற்குகந்தவனே
                                    அயனரன் பணிபவனே உன் பதம் துதித்தேன்

                                                         அனுபல்லவி

                                    மயில் வாகனன் போற்றும் மாதவனே கேசவனே
                                    மயூரவல்லியின் மனம் கவர்ந்த மாயவனே

                                                             சரணம்
                                   
                                    குயிலோசை தரும் குழலிசை தருபவனே
                                    இயலிசை நாடக நாட்டிய ரசிகனே
                                    கயல்விழி பாமா ருக்மணி நாயகனே
                                    தயவளித்தெனையே ஆண்டருள வேண்டுமென

சிவகுமாரன்

                                    சிவகுமாரன்

                                                                 பல்லவி

                                            சிவகுமாரனை கணபதியைத் துதித்தேன்
                                            கவலையிடர்பிணி அனைத்தும் நீங்கிட
                                           
                                                              அனுபல்லவி                                        
                                           
                                            நவரத்னங்கள் பதித்த கிரீடமணிந்தவனை
                                            புவனம் உண்டுமிழ்ந்த கேசவன் மருகனை

                                                                   சரணம்

                                            குவலயம் போற்றும் ஓங்கார வடிவினனை
                                            தவழும் நிலவின் கலையணிந்தவனை                                                                                  
                                            பவவினைப் பயன்கள் முழுதும் விலகிட
                                            அவனியிலனைவரும் முதன் முதல் துதித்திடும்