நாராயணன் நாமம்

                                நாராயணன் நாமம்


                                           பல்லவி

                       நாராயணாவென்று சொன்னாலும் போதும்
                       நாவினிக்கும் செவி குளிரும் செல்வங்கள் சேரும்

                                        அனுபல்லவி

                       பாராயணம் செய்ய உகந்த திருநாமம்
                       தீராவினை தீர்க்கும் கேசவன் நாமம்

                                           சரணம்

                       கூறுமடியர்கள் குறை போக்கும் நாமம்
                       நாரதரும் நான்முகனும் சுகசனகாதியரும்
                       பாரோரும் புகழ்ந்தேத்தும் திவ்ய நாமம்
                       ஓராயிரம் பெயரில் உயர்ந்த திருநாமம்
                       
                     
                     
                     
                     
                       

ஶ்ரீராமதூதன்

                                       ஶ்ரீராமதூதன்



                                             பல்லவி

                       ஶ்ரீராம தூதனை மனமாரத் துதித்தேன்
                       பாரெங்கும் புகழ் விளங்கும் ஆஞ்சநேயனை

                                           அனுபல்லவி

                      ஓராயிரம் நாமம் இருந்தாலும் கூட
                      ஶ்ரீராம நாமமே போதுமென்று வணங்கிடும்

                                             சரணம்

                      புத்தியும் ஞானமும் செல்வமும் நல்வாழ்வும்
                      சத்திய நெறியும் பணிவோர்க்கருளும்
                      எத்திசையும் கொண்டாடும் கேசவன் நேசனை
                      உத்தமனை உயர் வாயுகுமாரனை

                     

                     

                        

வண்புருடோத்தமன்

                                    வண்புருடோத்தமன்


                                           பல்லவி

                         வண்புருடோத்தமனை வானவர்கோனை
                         கண்ணனைக்கேசவனை மனமாரத் துதித்தேன்

                                         அனுபல்லவி

                         கண்கவர் பேரழகி புருடோத்தமநாயகி
                         அண்மையிலிருந்து அழகுடன் காட்சிதரும்

                                               சரணம்

                          தண்மதிமுகத்தானை தாமரை பதத்தானை
                          உண்டுலகுமிழ்ந்தானை வெண்ணையுண்ட வாயனை
                          விண்ணோரும் மண்ணோரும் சுகசனகாதியரும்
                          கொண்டாடிப் போற்றும் புண்டரீகாக்ஷனை
                        

நீதான் துணை

                                நீதான் துணை



                                          பல்லவி

                     நீதான் துணையென்றும் கோவிந்தா
                     பாதாரவிந்தம் சரணடைந்தேன்

                                       அனுபல்லவி

                     மாதா பிதா குரு தெய்வமென்று
                     யாதுமாகி நின்ற பரம்பொருளே கேசவா

                                          சரணம்

                     வேதாகமசாஸ்த்ர புராணங்கள் போற்றும்
                     சீதாபதியே மதுசூதனா
                     ஆதாரம் நீயே அகிலமனைத்திற்கும்
                     ஆதரவு தந்தெனையே ஆட்கொள்ள வேண்டும்

வரசித்தி விநாயகன்

                                 வரசித்தி விநாயகன்



                                          பல்லவி

                     வணங்கினேன் வரசித்தி விநாயகன் பதம்
                     கணங்களின் தலைவன் வேழமுகத்தழகன்

                                         அனுபல்லவி

                     குணங்களில் சிறந்து விளங்கிட விரும்பியும்
                     தனம் புகழ் கல்வியனைத்தும் பெற வேண்டியும்

                                            சரணம்

                     பிணங்கிய குறமகள் வள்ளியை முருகன்
                     மணந்திட உதவிய ஐங்கரன் ஆனைமுகன்
                     இணையவன் கருணைக்கு ஈடில்லையென்றே
                     துணையந்தக் கேசவன் மருகனெனத்துணிந்து

நம்பிக்கை

                                           நம்பிக்கை


                                  கதிரவன் நாளையும் உதிக்கும் 
                                  வசந்தம் மீண்டும் வரும்
                                  செடிகள் திரும்பவும் பூக்கும்
                                  மரங்கள் மறுபடியும் காய்க்கும்
                                  கொடிகளில் இலைகள் துளிர்க்கும் 
                                  இன்றும் நிலாக் காயும்
        
                                    .. .. .. .. ..  .. ..

                                  தேவன் தரிசனம் கிடைக்கும்

உமாமகேஸ்வரன்

                                உமாமகேஸ்வரன்


                                           பல்லவி

                        உமாமகேச்வரனைப் பணிந்தேன்
                        இமவான் துதித்த நமச்சிவாயனை

                                       அனுபல்லவி

                        குமாரன் ஆளுடைப்பிள்ளையும் முருகனும்
                        கமலநாபன் தாடாளனும் போற்றும்

                                           சரணம்

                         தாயினும் மேலான கருணைமிகு தயாபரனை
                         நோய் தீர்க்கும் மருத்துவனை வைத்தீச்வரனை
                         ஊழ்வினைப் பயன் போக்கும் கேசவன் நேசனை
                         சீர்மல்கும் சீர்காழி தலத்தில் விளங்கும்

அயோத்தி ராமன்

                                அயோத்தி ராமன்
             

                                          பல்லவி

                      அயோத்தி ராமனை மனமாரப்பணிந்தேன்
                     சரயூ நதிக்கரை அருகில் விளங்கும்

                                       அனுபல்லவி

                       சுயம்வரம்தனில் வில்வளைத்தொடித்து
                       ஜானகி தேவியின் பொற்கரம் பற்றிய

                                            சரணம்

                        மாதவம் புரிந்திடும் முனிவர்களும் மற்றும்
                        சீதா தேவியும் இளையவன் இலக்குவனும்
                        ஆஞ்சநேயனும் வணங்கி நிற்கும்
                        ஆதவகுலத்துதித்த நாயகன் கேசவன்  ( அயோத்தி..)

                        நூதனமான பேதங்களால் வந்த
                       வேதனையனைத்தும் தீரவேண்டுமென்று
                        சோதனைகள் பல கடந்து வந்து
                        மாதவனவனையே அனுதினம் துதித்து

                        

புன்னகை தவழும்

                                                                                            ராகம்: கல்யாணவசந்தம்
                                                                                            தாளம்: ஆதி


                                               புன்னகை தவழும்

                                                 பல்லவி

                                புன்னகை தவழும் சென்ன கேசவன்
                                தன்னடி தொழுதேன் சென்னையம்பதிதனில்

                                               அனுபல்லவி

                                 என்னிரு கண்கள் செய்த புண்ணியம்
                                 தன்னிரு தேவியர் இருபுறமுடையவன்

                                                    துரிதம்

                                 பொன்னெழில் மேனியைக்கன்னலையருகே
                                  முன்னின்று காணும் பாக்கியம் பெற்றேன்

                                                    சரணம்

                                 உன்னி உன்னியுன் மலரடி தொழுவதன்றி
                                 என்ன கைம்மாறு செய்வேன் எந்தன்
                                 சென்ன கேசவப்பெருமாளே என்று
                                 பன்னிப்பன்னி மனம் நொந்தேன்