ஶ்ரீராம தூதன்

                                                  ஶ்ரீராம தூதன்




                                                         பல்லவி

                                      ஶ்ரீராம தூதனின் திருவடி பணிந்தேன்
                                      தீரா வினதீர்த்து எனக்கருள வேண்டுமென

                                                     அனுபல்லவி

                                      ஓராயிரம் நாமம் உண்டென்ற போதும்
                                      ஶ்ரீராம நாமமே ஓயாது துதித்திடும்

                                                         சரணம்

                                      ஆராவமுதன் கேசவன் திருவடி
                                      மாறாதிருந்து சேவை புரிந்திடும்
                                      பாரோர் பணிந்தேத்தும் வாயுகுமாரன்
                                      சீராளன் ஊர் போற்றும் அஞ்சனை மைந்தன்

மயில்பீலி மாதவன்

                                               மயில்பீலி மாதவன்


                                                           பல்லவி

                                    மயில்பீலியணிந்தவனே மனதிற்குகந்தவனே
                                    அயனரன் பணிபவனே உன் பதம் துதித்தேன்

                                                         அனுபல்லவி

                                    மயில் வாகனன் போற்றும் மாதவனே கேசவனே
                                    மயூரவல்லியின் மனம் கவர்ந்த மாயவனே

                                                             சரணம்
                                   
                                    குயிலோசை தரும் குழலிசை தருபவனே
                                    இயலிசை நாடக நாட்டிய ரசிகனே
                                    கயல்விழி பாமா ருக்மணி நாயகனே
                                    தயவளித்தெனையே ஆண்டருள வேண்டுமென

சிவகுமாரன்

                                    சிவகுமாரன்

                                                                 பல்லவி

                                            சிவகுமாரனை கணபதியைத் துதித்தேன்
                                            கவலையிடர்பிணி அனைத்தும் நீங்கிட
                                           
                                                              அனுபல்லவி                                        
                                           
                                            நவரத்னங்கள் பதித்த கிரீடமணிந்தவனை
                                            புவனம் உண்டுமிழ்ந்த கேசவன் மருகனை

                                                                   சரணம்

                                            குவலயம் போற்றும் ஓங்கார வடிவினனை
                                            தவழும் நிலவின் கலையணிந்தவனை                                                                                  
                                            பவவினைப் பயன்கள் முழுதும் விலகிட
                                            அவனியிலனைவரும் முதன் முதல் துதித்திடும்
                                         
                                           
                                  

அலைமகள்

                                                  அலைமகள்



                                                     பல்லவி

                               கமலமலர் கயிலேந்திக் கமலமலரிலமர்ந்திருக்கும்
                               கமலமே உனது மலர்ப்பதம் பணிந்தேன்

                                                   அநுபல்லவி

                               கமலநாபன் கேசவன் திருமார்பில் வீற்றிருக்கும்
                               கமலபதத்தாளே உனையே சரணடைந்தேன்

                                                        சரணம்

                               உமையும் கலைமகளும் நேசிக்கும் அலைமகளே
                               சமமென ஒருவரும் இல்லாத திருமகளே
                               கமலாசனனும் நரர்சுரரும் பணிந்தேத்தும்
                               விமலே அமலே மறைபுகழ் மாயே

திருக்குடந்தை ஆராவமுதன்

                                      திருக்குடந்தை ஆராவமுதன்


                                                    பல்லவி

                                  ஆராவமுதன் அவனன்றி கருணைமிகு
                                  வேறோர் தெய்வம் பாரினில் இல்லை

                                                      துரிதம்

                                   நாரதர் நான்முகன் சுகசனகாதியர்
                                   நரர்சுரரிந்திரன் கரம் பணிந்தேத்தும்

                                                  அனுபல்லவி

                                  காரார் குழலாள் கோமளவல்லி
                                  தீராக் காதலுடன் உடனிருந்து போற்றும்

                                                     சரணம்

                                   ஓராயிரம் நாமமுடைய கேசவன்
                                   மாரனை மிஞ்சும் பேரெழில் அழகன்
                                   சீரும் சிறப்பும் மிகு திருக்குடந்தைத்திருத்தலத்தில்
                                   சாரங்கபாணியாய் பள்ளி கொண்டிருக்கும்

                                 
                                   

கமலநாபன்

                                             கமலநாபன்



                                                   பல்லவி                            

                                 கமலநாபனே காத்தருள்வாயென
                                 நமஸ்கரித்தேன் உந்தன் மலர்ப்பதம் தனையே

                                                அனுபல்லவி

                                 அமரரும் சனகாதி முனிவரும் நாரதரும்
                                 நமச்சிவாயனும் நான்முகனும் பணிந்தேத்தும்

                                                    சரணம்

                                 நமனாகிக் கம்சனை வதம் செய்த மாயனே
                                 சமரம் புரிந்து அரக்கர் குலமழித்த
                                 கமலக்கண்ணனே கேசவனே மாதவனே
                                 அமரேந்திரன் கர்வம் தீர்த்த மதுசூதனனே
                                 

குருவாயுரப்பா

                                                    குருவாயுரப்பா


                                                          பல்லவி

                                     கணநேரமெங்கிலும் உனைக்காணவேண்டுமென
                                     திருப்பாதம் பணிந்தேன் குருவாயுரப்பா

                                                        அனுபல்லவி
                                   
                                    மணம் தரும் சந்தனக் களபமணிந்து
                                    மாலைகள் சூடி பொலிவுடன் திகழ
                                                   
                                                            சரணம்

                                    வணங்கிடுமடியார்க்கு அருள்தரும் ஒளியே
                                    அணையா விளக்கே அருளே சுடரே
                                    இணைதனக்கில்லாத தேவாதி தேவனே
                                    துணையாயிருந்து எனையாளும் கேசவனே