செங்கமலவல்லி

                                     செங்கமலவல்லி



                                                பல்லவி

                             கமலவல்லியின் பாதம் பணிந்தேன்
                             கமலநாபன் கேசவன் மனங்கவர்

                                             அனுபல்லவி

                             அமரேந்திரனும் நாரதரும் நான்முகனும்
                             சுகசனகாதியரும் கரம் பணிந்தேத்தும்  ( செங் )

                                                   சரணம்

                             தனம் குலம் கல்வி நல்வாழ்வு அடைந்திட
                             மனமொரு நிலைபெற அமைதியுடன் விளங்க
                             வினைப்பயனனைத்தும் நலமுடன் தொலைந்திட
                             முனைப்புடன் அனுதினம் மனமாரத் துதித்து 

சுருட்டப்பள்ளி சிவன்

                                  சுருட்டப்பள்ளி சிவன்


                                         பல்லவி

                            சுருட்டப்பள்ளி சிவனை சங்கரனை
                            இருவினைப் பயன்தொலைய அனுதினம் பணிந்தேன்

                                        அனுபல்லவி

                             அருள்தரும் சர்வமங்களாம்பிகையின்
                             மடிமீது தலைசாய்த்து பள்ளிகொண்ட ஈசவரனை

                                             சரணம்(துரிதம்)

                             நாரதர் நான்முகன் நாரணனுடனே
                             வால்மீகி முனிவரும் நந்தியும் கணங்களும்
                             நரர்சுரரிந்திரன் கரம் பணிந்தேத்தும்
                             வரங்களையருளும் கேசவன் நேசனை

வெள்ளக்குளம் அண்ணன்பெருமாள்

       

                                 வெள்ளக்குளம் அண்ணன்பெருமாள்



                                                    பல்லவி

                                உள்ளம் களிக்குதே மெய்சிலிர்க்குதே
                                வெள்ளக்குளம் அண்ணன் தரிசனம் கண்டால்

                                                அனுபல்லவி

                               உள்ளன்போடு துதித்திடும் அன்பர்க்கு
                               அள்ளக் குறையாத கருணையளிப்பவன்

                                                   சரணம்

                               சங்கும் சக்கரமும் உடைவாளும் கையிலேந்தி
                               மங்களமாய்த் திருமகளைத் தன்மார்பில் தாங்கி
                               எங்கும் பிரகாசமாய் எழுந்தருளிக் காட்சி தரும்
                               பங்கயபாதன் திருநாங்கூர் கேசவன்

கோவிந்தன் திருநாமம்

                            கோவிந்தன் திருநாமம்


                                         பல்லவி

                 கோவிந்தன் திருநாமம் சொன்னாலும் பேரின்பம்
                 தேவாதிதேவன் திருமலைவாசன்

                                     அனுபல்லவி

                 மூவாசைப்பிணி போக்கும் முன்வினைப் பயன் நீக்கும்
                 நாவாரத் துதிப்போர்க்கு நலமனைத்தும் சேர்க்கும்

                                           சரணம்

                கரிக்கபயம் தந்த கேசவன் நாமம்
                அபலையின் மானம் காத்த மாதவன் நாமம்
                அருந்தவ முனிவரும் அமரரும் இந்திரனும்
                அடியாரனைவரும் துதித்திடும் நாமம் 

மீனலோசனி

                                              மீனலோசனி



                                                   பல்லவி

                                கமலாம்பிகையே காத்தருள்வாயெனை
                                கமலமலர்ப் பதம் தனயே துதித்தேன்

                                                  அனுபல்லவி

                                இமவான் மகளே மீனலோசனி
                                சோமசுந்தரர் உடனுறை ராணி

                                                       சரணம்

                                 அமரரும் முனிவரும் அமரேந்திரனும்
                                 குமரனும் கணபதியும் கரம்பணிந்தேத்தும்
                                 உமையே கௌரி கேசவன் சோதரி
                                 மாமதுரையரசாளும் அங்கயற்கண்ணி


                               
  

நீலாம்பரி

                                             நீலாம்பரி


                                                பல்லவி

                                துணைபுரிந்தருள்வாய் நீலாம்பரி
                                வணங்கியுன் பதம் பணிந்தேன் ஶ்ரீகாமாட்சி

                                             அனுபல்லவி

                               இணையுனக்காருளார் நித்யகல்யாணி
                               நீலவண்ணன் கேசவன் சோதரி

                                                   துரிதம்

                               கணங்களும் நந்தியும் அமரரும் போற்றும்
                                ஏகாம்ரேச்வரர் நாயகி கௌரி

                                                    சரணம்

                                பணம் பெண் போகமெனத் தேடித்திரிந்தேன்
                                கணக்கிலடங்காத தவறுகள் புரிந்தேன்
                                குணமறிந்து மனம் வருந்தி தினமுனைத்துதித்தேன்
                                கணநாதன் தாயே உனையே வேண்டினேன்

ஏலவார்குழலி

                                       ஏலவார்குழலி



                                               பல்லவி

                             ஶ்ரீலலிதே பணிந்தேன் பாதாரவிந்தம்
                             பாலாம்பிகையே பைரவி சரணம்

                                            அனுபல்லவி

                            மாலன் கேசவன் மாதவன் சோதரி
                            பாலன் வேலன் அன்னையே கௌரி

                                                சரணம்

                            ஞாலமனைத்தையும் படைத்தும் காத்தும்
                            கோலாகலமாக ஶ்ரீநகரம் தன்னில்
                            சீலமுடன் மாமேரு மீதில் வீற்றிருக்கும்
                            ஏலவார்குழலி நித்ய கல்யாணி