உத்திராபதீச்வரனை

                        உத்திராபதீச்வரனை.....

                                                         பல்லவி

                                 உத்திராபதீச்வரனை  ஆத்திவன நாதனை
                                 செங்காட்டான் குடியமர்ந்த சிவனைப் பணிந்தேன்

                                                      அனுபல்லவி

                                   சித்தி விநாயகர் பணிந்த கணபதீச்வரனை
                                   நித்திலத் தொத்தெனும் கேசவன் நேசனை

                                                            சரணம்

                                   வித்தியாசமான பைரவ வேடத்தில் வந்து
                                   பக்தன் சிறுதொண்டருகருள் செய்த சிவனை
                                   வித்தகர் போற்றும் அத்தனை ஆதியை
                                   பித்தனைப் பேயனை சத்தியபுரி வாசனை
                                                         

                                   

கணபதீச்வரனை.....

                              கணபதீச்வரனை.....

                                                      பல்லவி

                                       கணபதீச்வரனை ஆத்திவன நாதனை
                                       வணங்கித்துதித்தேன் அருள்தருவாயென

                                                     அனுபல்லவி

                                       குணம் கெட்ட அசுரன் கஜமுகனைக் கொன்ற
                                       கணபதி அடைந்த தோஷம்தனை நீக்கிய

                                                           சரணம்

                                        தணலேந்தும் நெற்றிக்கண்ணனை சிவனை
                                        துணையென உமையவள் கரம் பிடித்த ஈசனை
                                        பணிந்தவர்க்கருளும்  கேசவன் நேசனை
                                        செங்காட்டான் குடியமர்ந்த உத்திராபதீச்வரனை

திருமருகல் சிவனை

                            திருமருகல் சிவனை

                                                     பல்லவி

                                    திருமருகல் சிவனை ரத்தினகிரீச்வரனை
                                    மாணிக்க வண்ணனை மனமாரத் துதித்தேன்

                                                   அனுபல்லவி

                                     திருமால் கேசவன் பிரமன் திருமகள்
                                     திருஞான சம்பந்தர் போற்றித்துதித்திடும்

                                                         சரணம்
                                   
                                     வணிகன் மகனுக்கு வாழ்வு தந்துதவிய
                                     அணங்குறை பங்கனை நமச்சிவாயனை
                                     வண்டுவார் குழலி மனங்கவர் ஈசனை
                                     எனக்கருள வேண்டுமென பதமலர் பணிந்து
         
                                         

                                                     

ஶ்ரீ ராமனை விடவும்......

                         ஶ்ரீ ராமனை விடவும்......

                                                            பல்லவி

                                      ஶ்ரீ ராமனை விடவும் சிறந்தது ராம நாமம்

                                      ஓராயிரம் பெயரில் உயர்ந்த திருநாமம்

                                                         அனுபல்லவி

                                      பாரோர் பணிந்தேத்தும் கேசவன் நாமம்

                                      தீரா வினை தீர்க்கும் ஆராவமுதன் நாமம்

                                                            சரணம்      

                                      சீரடி போற்றி தேவரும் முனிவரும்

                                      நாரதரும் நான்முகனும் தினம் துதிக்கும் நாமம்

                                      வாரணம்  தனக்கபயம் அளித்தவன் நாமம்
     
                                      மாரனையீன்ற நாராயணனின்  நாமம்

                                     

                                     
                                     

                                       

சூரிய குலத்துதித்த.......

          சூரிய குலத்துதித்த.......

                                                              பல்லவி


                                      சூரிய குல திலகனை ஶ்ரீராம சந்திரனை
                                      கோரின வரமருளும் கேசவனைப் பணிந்தேன்

                                                           அனுபல்லவி

                                      கூரிய பாணங்களெய்தி அரக்கரை அழித்தவனை
                                      ஏரிகாத்த ராமனை தசரதன் மைந்தனை

                                                               சரணம்

                                       பாரினில் புகழ் விளங்கும் அயோத்தி மன்னனை
                                       காரிகை சீதையின் கரம் பிடித்த ராகவனை
                                       கரிக்கபயம் தந்தவனைக் கோதண்டராமனை
                                       எனக்கருள வேண்டுமென அனுதினம் துதித்து

எல்லாமும் நீயே.......

                               எல்லாமும் நீயே.......

                                                          பல்லவி

                                          எல்லாமும் நீயே கல்யாண ராமா
                                          நல்லருள் வேண்டியே உன்னடி பணிந்தேன்

                                                         அனுபல்லவி

                                          கல்லைக் காரிகையாய் செய்த கேசவனே
                                          புல்லை ஆயுதமாய் எரிந்த ராகவனே

                                                           சரணம்

                                          சொல்லுக்கடங்காத பேரழகுடையவனே
                                          வில்லை வளைத்தொடித்து ஜானகியை மணந்தவனே
                                          நல்லடியார் நலம் பேணும் கருணாகரனே                                      
                                          வல்லரக்கர் குலமழித்த கோதண்டராமனே

                                          அல்லலிடர் களையும் அரவிந்த பதத்தோனே
                                          சொல்லாலுனைப் பாடி அனுதினம் துதித்தேன்
                                          வல்லவர்க்கும் வல்லவனே வாலியை வென்றவனே
                                          தில்லை ஈசனின் மனங்கவர் நேசனே.